Acts 21

1Tenang teing ninka si'noora'meerira pirunge danto tenkenampira Koosi-namui'aape tankinampiru', ee'noko dauna'mung Roodes-namui'aape, teketa napo' kato Patara'navuntu'aape. 2Ee'noko teka nii'nareng aareri-nareng ooampiru' Ponisia-navaro Siiria-koonoo'aape pare'araa'naang otoko, ee'noko tereng-koo koinampira nari' meru'. 3Tenang Saiparasi-namui' oro'parako mare'aanameng-koo otoi Siiria-nameensi'aape tankinampiru', ee'noko Taia'navuntu'koo daanto duumemariru' kavonanka be'antavuko'noo' terenge. 4Ee'noko teka Jiisuu' bakaning barevarenuka daa'arampira teke o'noru' ~ke'munta-taa doong. Ee'noko Tanuaang Meekunge Paula' kiimatavaavaina' nauvurio' teinge Paula' poteau' Jerusalema' be'koo. 5Ee'noko tenang niikaning doong teke oto'kooning tankinuio' nii' teketa' teing ninka nari' danto tenkenampiru'. Teing ookara bii'ankaampi ninka ee'noko biurukaa' aareri-koo si'maarii'naang porou' osi pankamono-koo dama'dua, ee'noko piisi'koo teke kinkinampira kunsimarira teke naruna' naruna' si'noora'meeru'. 6Teketa nii' aareri-koo koinampiko teing osi-aape toroariru'. 7Aareri-koo koinampira Taia'keta bera Tolemes basimariru' ee'noko nii'ke te'nupoong baito-nupoong ooarampira tampara tampampima teke na'mung doong o'noru' teing ninka. 8Teketa dauna'mung tenkenampira Sisaria'navuntu'koo duumemariru', ee'noko teka tee Pilipi', tee doorenang tampara daankivuma nanu'bauko, bakanava-koo koinampiru'. Ee'noko tee ninka teke o'noru'. 9Ee'noko, tee ee'nara Pilipi' baurukaa' maniku' karenaumo nampeesiariaing oto'evuko' Kumponing-etaning tarampeeariko'ning. 10Tenang nii' teke nii'ning doong o'noriko narung nakaronara Kumponing-etaing Judia'nameensi'keta daampeto pou' miring Akabas. 11Ee'noko tenang nii'anko poma Paula' bakaang tokonii' nkavura kau' dovang bireng dai'arama aa'puu', “Tanuaang Meekunge ee' minkuvumaang: Tee' nari' Ju'nupoonge teka Jerusalema'ka dai'aavaing naning narung aung ee'nara tokonii' okovenung, ee'noko teing-koo Ju'deeaing-koo bireng-koo sipaavaing.” 12Ee'noko tenang nii'ke Paula' ninka nari' nanampiko'ninge tee' taaravampira teing teke otoroko'ning nari' orokoampiru' tee Paula' daanto Jerusalema' bearoo'naang. 13Teketa Paula'ke maku'urima aa'puu', “Aming-koo dii' birontarima ning domang orari-antamerimaang? Ai' ning tee maamumari o'nong kiimata narung-koo deea', teka boo'koo tee' nari' Ovoring Jiisuu' bakaang miring-koo teke Jerusalema'ke.” 14Ee'noko tenang nii' taaramuriaruio' nii'ke tamung doonko sipampiru' aa'pampira, “Makosi, Ovoring bakaang pia nkoaravaing.” 15Ee'noko teketa nii' maamumarira daanto Jerusalema'aape meru'. 16Ee'noko nii'ning Jiisuu' siompaako'ning Sisaria'keta nii' ninka nari' meru' Neeson bakanava-koo tavo'maarii'naang tee Saiparasi-namui'koonung, tutuna'ning Jiisuu' sionuka ninka nari' otoko'nung, tee ninka nari' o'norii'naang teke Jerusalema'ke. 17Teinge baito-nupoonge Jerusalema' otoroko'ninge oomaarira dotuarima onkeonke'maaru'. 18Teketa dauna'mung Paula' nii' ninka nari' meru' Jeemisi-anko, ee'noko ookara Karistoo'navitu-koo urantanuka te' porou'. 19Ee'noko teing-koo tampara tampura Paula'ke pukevui minku-antavuru' teing kapoo'nanka Kumponinge nkovuu'ning taapo'nairu-koo Ju'deeaing-koo Paula' nanuma daankiarako. 20Ee'noko tenang teinge urantanukai Paula' bakaang minkunaa taaravaara teinge Kumponing pankaing-antavau'. Ee'noko teinge aa'pau' tee, “Oovemaang nii'maiko' arekee'ning nantoong kokorei' otorong Ju'nupoong-koo meu'ke teing baito-nupoong, nka Moosesi-nung boto-ita keta'koo kontenuka. 21Teinge ee'ninge da' daang taararau' dake Ju'nupoong Ju'deeaing ninka nari' otoromaing Moosesi bakaang boto si'koo naueriko biurukaa'koong dopa' napu'aariaroo'naang nauerima ee'noko toomo siompaavaroo'naang tampeko. 22Enang arekee' nko-koo makosi da' tokontaa'neenga? Ai' teinge tee da' poinoo' taaravaava'naang. 23Tee aa' kapoo' nii'ke naurampimatomaung nkoveaing. Nii'koo teing nantoong karenaumo otoromaang bii'ka meeka'pariri oto'koo marakavariru'ning. Bake-koo due'urimang Moosesi-nung toomo siompai kiiroraa'anta ee'noko boontunang tovang nkoaamanoo'keta. 24Bokuerira teing ninka nari' nkorariai kiiroraa'antararima ee'noko tee boontunang-koong kau' karenaumo dake naro'ka moo'evuriai. Tee' pakueriko dapo apuka'pariri napu'arima taa'ni'antavariai tee biikaang maraka-anta tee dupeaing. Ee'noko tee' nkorarako ookarai da' noru'daavaing kapoo' da'koo minkuaamaung tee masikung deea', teka dake daka-koo siompei otong tee boto Moosesi-nung. 25Teka teing Ju'deeaing-koo baito-nupoong teing, nii'ke karavoto daarievorompiru'ning kaka'dekemarira matauampiru'na' taamang kumponing tositosinanka-koo darinii' ee'noko ereng naiaavaroo'naang, bio' tutung tavaama ereng dakoaavaung-koong maa'aavaroo'naang, ee'noko kaukauro nkoaavaroo'naang.” 26Ee'noko teing urantanuka biikaang kara tampa' taaravura Paula'ke teing nantoong karenaumo bokuvurira dauna'mung kiiroraa'antavaru' teing ninka nari'. Ee'noko pava dootuu'nava pankava-koo tumparu' piristi'nanka nauvurii'naang ~kenaanka-taa doong tankinuko kiiroraa'ariaing, naruna' naruna' kante boontuarira teing. 27Teing-koo ~kenaanka-taa doong-koo asi'na'mung oparaa'naang otoko teinge Ju'nupoonge Eesia-nameensi'keta porou'ninge Paula' pava dootuu'nava pankava-koo ooaara nantoong karinga irikung-antavaarira tee moo'au'. 28Bokiaama aa'pau', “Dii' aintaang nii'maikorori' Isireeli-nupoonge pakumereriai. Aung tee naning ookara nantoong osi ookutunairu-koo nau-antavurimaung aing aa'ning turang-antavurima niikaning nantoong ee'noko Moosesi-nung boto ee'noko ava dootuu'nava pankava. Baru'noo' Ju'deeaing ava dootuu'nava pankava-koo tung-antavuriee ava meekava orari-antavuma.” 29Aunoo' tee teinge tee Toropimas Ju'deeaing-koong Epeses-nung ooaara tee ninka otoreko teka temono-koo osi pankamono-koo daang ee' noru'au', “Tee aunge Paula'ke dootuu'nava pankava-koo meekava-koo tung-antavuieeng.” 30Tenang ookara nantoong osi pankaing-koo-nupoong donkonaara nari' kua'parira teinge Paula' moo'aara barantaakiau' dootuu'nava pankava-ita taapo', ee'noko karanaang namu'ke ku'numpau'. 31Ee'noko tenang teinge dupisi'aava'naang nkoaako tee piatooronuka-koong bore' nauau' ookara Jerusalema'nupoong avitoitoi taatoiavariko~. 32Ee'noko teie namu'ke bakaning piatooronuka biikaning daaku'na' tarenuka ninka bokuvurira kua'pariru' doonko teing-aape. Ee'noko tenang teinge tee piatooronuka-koong bore' ooaara teing ninka bakaning piatooronuka ninka nari' Paula' tavu' bakeau'. 33Ee'noko tenang teie tavu'nupoong-koong bore'ke pora Paula' moo'ura botoaru' dai'aava'naang sieenai kevintai. Ee'noko teie tana'urima aa'puu', “Aung baa? Aming nkovuinge?” 34Teinge nantoonge karingai tee bokiaama avitoitoi minkuaako'. Ee'noko tenang naampavaako teie kapoo' masikung nkoaru'nung tasi'puarura tee botoaru' tee piatooronuka biikanava'koo be'anta-koo. 35- 36Ee'noko tenang paatang-koo basiarira tee koonto' piaatooronukai intampaara siroonge nkavau' purumpurunavinge aa'na' pore'antavaariko, teinge miatarai siompaari nanaama aa'paako, “Taveriai, taveriai!” 37Tenang tee Paula' deto pava-koo aa'e-antavaava'naang due'uko te' piatooronuka biikanoo' teie Kiriki'na' karoma aa'puu' tee piatooronuka biikaang bore', “Ninge ee kapoo' naurampeu' da'?” Ee'noko teie ta'ninura aa'puu', “Oi, da' ee Kiriki'nung kara noru'ei otong? 38Da' ee tee Iisipi'nupoong-koong deea' tee temu' Rooma'keta siivenke' tutumpuma nantoong karenaumo kokorei' tooreerenuka mee'bora' sirakamaa'koo be'antavuru'nung?” 39Paula'ke maku'uma aa'puu', “Ning aa' Ju'nung. Nkaang osi tee pankaing, miring Taasus, Silisia-koonoo'. Teka ninge tana'damaang da' taura'meko aing nantoong karavarama'naang.” 40Ee'noko tenang teie taura'puio' Paula' paatang-koo donkonura birenge ka'duu-antavurio' nantoong dooroompariru'. Ee'noko dooroomparirio' Ju' biikaang karai, Iiburuna', karoma aa'puu',

will be added

X\