Acts 19

1Tenang Apolos teke Koorin-navuntu' Akaia'nameensi'koonoo' otoko Paula' Kalesia-nameensi' sipura kansi'ke iu'po'nairue nanuu' bera Epeses-namono-koo tavo'aru'. Teka nii'ning Karistoo' sionuka kune'uru'. 2Ee'noko teie aa'puru' teing, “Dii'ke ee Tanuaang Meekung nkaveru'nung tenang dii'ke masika'antaverira tee?” Ee'noko teinge aa'pau', “A, nii'ke bakei taaravampia' tee Tanuaang Meekung otoing deeko'.” 3Ee'noko teie aa'puru' teing, “Dii' aminamurii'ke meeka'antarariru'nung?” Teinge aa'pau', “Jooni Minkinara bakanamurii'ke meeka'antamariru'nung.” 4Ee'noko Paula'ke aa'puru' teing, “Joonie tee nantoong oraka' nko-ita bere'ariko ntong-koo minkivurima meeka'antavuriko'nung nauvurima tee naning dama' poaing masika'antavaava'naang, ee'noko aa'dampimang, tee masika'antavaava'naang nauvuru'nung tee Jiisuu'.” 5Tee' taaravaara teing tenang tee' meeka'antavariru' Ovoring Jiisuu' bakaang miring-koo. 6Ee'noko tenang Paula'ke bakaang bireng pante'urio' teing tee Tanuaang Meekunge maanto'uru', ee'noko nii'na' karai kareau', napo' tarampeeariru'. 7Teinoo' nantoong nanai'keta kenaanka-pina' ookara. 8Teketa beekuri kaara-koo Doong Uaana'mung kante tee pava dootuu'nava Ju'nupoong biikanava-koo kuung tumparama kara sira'puko' avoroa'. Teing ninka tata'eema nii'ning aroo'antavuriko' Kumponing bakaang muu'koo tasi'pai tung-koo. 9Teka tenang nii'ning kontevoroma, masika'anta-koo kupi'oroma, nantoong-koo oosiariru'ning-koo dutakanoo'ke tee taung Karistoo'navung oraka' minkuaako'. Ee'noko Paula' teing-eta keta'paru' Karistoo' sionuka nari' tee ninka. Ee'noko doong kante tata'eeko' teke bare-antanava miring Tairanus-nava-koo. 10Tee aung tee kemare'ka-koo tee' nkoaru'nung. Tee'koo ookutunairue Eesia-nameensi'kooninge Ovoring bakaang kara taaravau', Ju'nupoong ee'noko teing Ju'deeaing. 11Ee'noko Kumponinge Paula'koo amutemurii' kapoo' ta'ninta'ning oro'antavuu'. 12Ee'noko tee'koo Paula' bakaning ankisipi'nanka ee'noko baaronanka maroita nkavai nanaako' siipa-po'nupoong-anko, ee'noko siipai tenang sipuriko' teing, ee'noko ma'nari orananka bakoariko'. 13Tenang tee Ju'koo nii'ning nankai'nupoong avitoitoi osinankai nanaako' ma'nari orananka bata'koo, ee'noko nii'ning teing-koo Jiisuu'nung miring-koo nantoong-eta ma'nari bata'koo piavoroko' aa'paava'naang, “Nii'ke Jiisuu'nung miring-koo, tee ee'nara Paula'ke daankivumaung, aa'dampimang: Da' ma'naang tenkeniai.” 14Teing nankai'nupoong-koo namaia'ke ~kenaanka-taae tee' ee'na' nko-koo paaravaako'. Temaia' narung pankaing piristi' baurukaa' miring Siiva, Ju'nupoong-koong. 15Teka tee' paaravaako teie ma'naang orarai temaia' maku'urima aa'puru', “Ninge Jiisuu' noru'ansi o'nong ee'noko Paula' noru'ansi o'nong, teka dii' baata?” 16Ee'noko tee naning ee'nara ma'naang orara-po'nung teing-koo dau to'di'arara ookara apoo'uri murasiavurio' teva-ita simpeng mmariau' erenge sisi'arima. 17Ee'noko ookarai Epeses-nupoonge noru'au' ookaviturai aa'noko Ju'nupoonge ee'noko Ju'deeainge. Tee' taaravaara avoro' kuung kai'aru' teing-koo, ee'noko Jiisuu'nung miring daangampau'. 18Ee'noko teing-koo mmau' baito-nupoong otoroko' marunu makempai. Ee'noko teinge nankai' nkonuka-koo nkoaru'na' taaravaara sira'pariru' teing kapoo' oraka' nkoaako'ning. 19Ee'noko biikaning buukunanka teing marunu daariari otoko'ning oosiaara, bane moo' pankainge, nta'ke tai-antavau' ookarai ooaio'. Tee-koo moo' deeruaama naro'ka naruaape kokorei' (50,000) nantoong na'mung doong moo'koo makosi deeruau'. 20Aing ookara kapoo' doore-antavaio' Ovoring bakaang kara purimpari beremparu' urikung onou puru'ui. 21Enang tee teketa aung ee' oro' kapoo' nkoaru'noo'keta, Paula' bakaang tanuaange pia-antavuu' Masedonia'nameensi' ee'noko Akaia'nameensi' danto beero'uritaa' Jerusalema'aape bee'naang. Aa'puu', “Jerusalema' merai'nange teketa napo' Rooma' beero'koo aa'na' piamoi otong.” 22Ee'noko kenaankara bakaning-koo pakupakunanka-koo Masedonia'aape botovuretu', Timoti naanka Erasitas. Tee ee'nara Paula' teke Eesia'ke nii'ning napo' doong otou'. 23Tee batei-koo tee turang pankaing tavo'aru' Karistoo' bakanavung too'dempaama. 24Aa'nou': Epeses-nupoonge teni manikuma kumponing dootuu'aako'nani miring Atimasi, ee'noko naning narung miring Demitereasie siliva'koong kapoo'nanka ta'nampuko' bakaning ninka oki'nareka' baka-oonanka Atemasi dootuu'aako'nava-pina' nari' oro'nanka teni nari' kuunge otoko. Ee'noko nantoonge teni-koo dootuu'arimatoo'naang moo'aako moo' mmau' nkavaako' teinge kake'iiariri ta'nampaako'ninge. 25Tee'koo Demitereasie ee'noko nii'ning nari' nko-nko nkoaako'ning naro' bokuvurira aa'puru', “Ee aing, dii'ke noru'eri otong nii'ke tee aung-koo amurii'koo nko-nko-koo moo' mmau' nkavampimaung. 26Ooverimang dii'ke noru'eri otong teie aunge Paula'ke tee aroo'antavurima bere'antavurimang mmau' nantoong aa'puma, ‘Kumponinanka teing birenge nkoaarimaing teing kumponinanka deea'.’ Tee' minkuvumaung, Epeses-namono-koo naro'ke deea', teka ookutunairu-koo Eesia-nameensi'kooning-koo. 27Ee'noko tee oraka' bakei, ai' niikaang nko-nko poore'aako bakearaa'naang ee'noko napo' tee dootuu'nava teni ovorinaang kumponing Atemasi bakanava tamunsi'nava deemparaa'naang ee'noko teni bakaang meenasi-eta dua'araa'naang pa, teni ee'nani ookara Eesia-nupoong ee'noko ookara kansi'nupoonge dootuu'aamai.” 28Ee'noko Demitereasie tee'puio' taaravaara aa'na' masika' iiravoroma bokiaama aa'pau', “Atemasi teni Epeses-nani ovorinaang.” 29Tee'koo ookara nantoong temono osi pankamono-kooning purumpurunaving karakararearima naampa ninka ookara naro'doma-aape kua'pariru' Kaiasi naanka Aristakas barantaakiaaresi tenaanka Masedonia'nameensi'koonaanka Paula' ninka nari' nanaako'naanka. 30Paula' tee teing nantoong karinga kara-koo piavou', teka teinge Karistoo' siompaako'ninge orokoau' tee karingai tavaa'neeng-koo. 31Ee'noko napo' nii'ninge Eesia-nameensi'koo pankenankai ba'maikori'ke botoarima karai kompai poteau' te' ookara naro'doma be'koo kariarako. 32Enang tee te' naro'arira paapaa'arima bokiaako' avutevu'ai minkuaama nii'ninge nii'na', nii'ninge nii'na'. Daping ookarai noru'aava' aming-koo te' naro' oosiariru'nunge. 33Nii'nung naning teke otoko' miring Aleksanda', ee'noko Ju'nupoonge tee karinga-koo uro'kanoo' donkong-antavau'. Karingai ooaara ee' noru'au', “Aunge pa tampa' noru'ui otong okora'noo'.” Tenang tee bakaang bireng toonuu' dooroong-antavurira siraka'antavurii'naang teing. 34Teka teinge tee Ju'nupoong-koong tasi'paarai'nange, Atemasi daang tampaako'ning-koong, pankaroong kenaanka aua-pina' bokiaama aa'paako', “Atemasi teni Epeses-nani ovorinaang.” 35Tee' nari' nkoariri otoroko' bera tee osi tarenung pora dooroong-antavurira aa'puru' teing, “Dii' nantoong Epeses-nupoong taarameriai. Baie naninge noru'ua' nii' Epeses-nupoong teni ovorinaang Atemasi bakanava dootuu'nava pankava tareampimaing ee'noko tere' kapanare' teni Atemasi bakanare' paning-eta dua'aru'nare' tareampikoo'. 36Aing kapoo' daang tang-koo makosi deea' tasi'peri ka'duurariaing, kapoo' nkoveriauka' dama'ke orarunsiraripeu'nung-pina' oro'. 37Ai' anaanka naninka tenaanka dii'ke po'antaverererinaanka a' kapoo' meekung bakiaa'urea' ee'noko teni ovorinaang niikanani oraka' minkuvurea'. 38Tee Demitereasi ee'noko teing baka-oo teka'nuka tee ninka nari' poroining naning narung tuumpi-koo piavoroaing dei tee tuutunang~ nkoroma daate'ari otong ee'noko kara simpe'nuka~ pankeng otorong, teke tuumpieeaing teing ninka. 39Kapoo' nii'ning minku-koo piarori otoing deeko' koompaara'navitu nauereriaing. Teinge makosina' kaka'dekearima tampaavaina' nkoaravaing. 40Ai' nii' oraka' nkomarimang purumpurunaving bi'mariri tavu'koo tuumpimaaripeu'na'. Rooma'koo pankenge tee' tuumpimaariko dei tampa' maku'arampiarupeu'.” 41Ee'noko tenang tee' minkuvurira teie bake-antavuru' teing te' naro'ariru'ning.

will be added

X\