Acts 18

1Teketa Aateni-namono sipura Akaia'nameensi'koo pare'arama Paula' Koorin-namono-aape beu'. 2Teka narung Ju'nupoong-koong kune'uu' miring Akuila, ba'aang ninka Pirisila ninka, teenoo' Poontusi-nameensi'koong, dama'ke Itali-nameensi'keta pou'nung tenang teie Kalodiasie daurarong~ pankainge Ju'nupoong Rooma'namono-ita tenkenaava'naang tampurio'. Ee'noko Paula'ke tering ee'naring oovuree'naang beu'. 3Tering tering kaandesi tua'urema baavevureko' moo'aama barenanka kanisiiaako'. Ee'noko Paula' tering-pina' nari' nko-nko nkovuko'nung deemparako kaandesi tua' tering ninka nari' pakuvurema otorou'. 4Ee'noko pava dootuu'nava Ju'nupoong biikanava-koo Doong Uaana'mung kante bema teke teing ninka tata'eeko' ee'noko teka nii'ning Ju'nupoong ee'noko Ju'deeaing aroo'antavuru'. 5Tenang Sailas naanka Timoti Masedonia'nameensi'keta poresio' Paula' daankinang narung-koo avaru' sira'puma Ju'nupoong-koo tee Pako'pari'nii' domampuri tarevuriainoo'koo nempaako'nung tee ee'nara Jiisuu'. 6Ee'noko tenang teinge nii'ning Ju'nupoonge turampaama oraka' minkuaako tee bakaang mononopa'keta da'mong tankavuma aa'puru' teing, “Enang aa' dii'ka arisirariaing. Kumponinge maromuu'noo' nkanoo' dupeansing. Enang-eta tee ning Ju'deeaing-anko mee'naang.” 7Ee'noko dootuu'nava-ita tenkenura naning bakanava-koo beu' miring Sisias Taastas, Kumponing-koo dootuu'arako'nung. Bakanava pavanava dootuu'nava-ita due'ke otoko'. 8Ee'noko Karisipasie teing Ju'nupoong biikanava pava dootuu'nava-koo pankainge Ovoring masika'antavuu' bakanava-nupoong nari' tee ninka. Ee'noko mmau'ke Koorin-nupoonge Paula' taaravaara masika'antavaara ntong-koo minkiarira meeka'antavariru'. 9Ee'noko nii'na'mung muunga Ovoringe Paula'koo oro'parara aa'puu', 10“Aroreauka', sira'peai dooroontarava', ai' ning tee da' ninka nari' o'nong. Naninge da' taruauka'nung da' baikeruu'naang, ai' ning nantoong mmau' oto'memung anke amono osi pankamono-koo nkaning deempariaining.” 11Ee'noko teke tee Paula' namare'keta nautaakaara otou' teing-koo meu'ke tee Ovoring bakaang kara nau-antavurima. 12Teketa tenang teie ovo'ma' miring Kaalio' te' Akaia'nameensi' tarevuko'nang Ju'nupoonge nari' tapo'eera Paula' turampaama barampaara tuutunang-koo uro'kanoo' donkong-antavau' aa'paama, 13“Aunge naninge tee nantoong Kumponing-koo daang dootuu'arii'naang aavavurimaatoing botoi orokovui otoina' nko-antavurima.” 14Teka tenang Paula' karoo'naang nkoarako Kaalio'ke aa'puru' teing Ju'nupoong, “Ee aing Ju', aung kapoo' tuumpierimaung orara nko-nko deeko' nii'noo' naning aa'na' orari-anta-koong deeko' tee ninge aroo'dampiaing dii' taara-koo. 15Teka aung kapoo' tee kara-koo miru'nanka-koo ee'noko mirinanka-koo tata' ee'noko dii'ka diikaang boto-koo, ninge simpe'koo piamoa'. Dii'ka simpe'eriaing.” 16Ee'noko tee' minkuvura teie bata'uru' teing teketa kara simpe'doma-ita. 17Ee'noko teketa teinge Siosienis kompau', ee'nara Ju'nupoong biikanava pava dootuu'nava-koo pankaing, ee'noko mura'au' teka kara simpe'doma uro'kanoo'ka. Teka Kaalio' aung-koo kapoo'koo tara'oaruu'. 18Teketa dama'ke Paula' mmau' doong teke otou', ee'noko teketa' ning ee'noko teing nii'ning baito-nupoong si'noora'murira Siiria-nameensi'aape toroaraa'naang danto tenkenuu' Pirisila daring Akuila nari'. Bera Siensiria-namono-koo basiaru'. Paula' tee temu' kapoo' nko-koo marakavaru'nung Kumponing-koo, ee'noko Ju' biikana' siompui tenang-eta deto dapo toto'parava' otoko'. Bera enang dupe-antavura dapo apuka'pari napu'arara aareri-koo koinaara kato berou' Eesia-nameensi'aape. 19Ee'noko Epeses-namono-koo basiarara Ju'nupoong biikanava pava dootuu'nava-aape nanura Ju'nupoong ninka tata'eeko'. 20Teinge pankaroong otoo'naang nia'aio' tee kupi'ou'. 21Teka si'noora'urima aa'puu', “Ning tee dii'anko toromaravaing napo', Kumponing-nung pia deeko'.” Teketa Akuila daring Pirisila nari' sipurima aareri-koo koinura tenkenuu' Epeses-namono-ita. 22Tenang tee Sisaria'namono-koo siarara deto Jerusalema' bera teka dootuu'nupoong karavuri doonko tankinuu' bakanoo' Antioko'. 23Ee'noko teke nii'ning doong otora tenkenuu' osinanka beero'urima Kalesia ee'noko Pirisia'nameensi'kooning ookara Jiisuu' siompaako'ning puring-antavurima. 24Paula' Kalesia-nameensi'ke tee' koroarako tee naning Ju'nung miring Apolos, Aleksandaria-namono-koong tee Epeses beu'nung maneena' minku bauko, ee'noko Daari Meekung-koong kara tampa' tasi'pui otoko'nunge. 25Teenoo' tee naning Ovoring bakanavung-koo nii'noo' basinoo' tampa' barearu'nung, ee'noko domang-eta karoma koonto'na' to'biiari Jiisuu' nau-antavuriko' ee'noko meeka'anta-koo Joonie Minkinara meeka'antavuriko'nameng nameng noru'ui. 26Avoroa' kara tutumpuu' teke Ju'nupoong biikanava pava dootuu'nava-koo, teka tenang Pirisila daringe Akuila taaravureta teringe bokuvureta aa'na' deto kankenkankeng-antavuretu' Kumponing bakanavung. 27Ee'noko tenang Akaia'nameensi'aape pare'araa'naang piavoio' teinge ba'maikori'ke baito-nupoonge puring-antavau' ee'noko Karistoo' sionuka-navitu-anko karavoto~ daariau' tee tampa' onkeonke'aava'naang. Tenang tee te' tavo'arara teie aa'na' pakuvuru' teing Kumponinge piaavuriko masika'antavau'ning. 28Ai' teie tee karika'koo meu'ka tata'eema apoo'uri Ju'nupoong sira'pui nauvurima aa'puko', “Daari Meekunge tee ee' sira'pui otong tee Pako'pari'nii' domanturi tareruriainoo'koo nemperimaung tee ee'nara Jiisuu'.”

will be added

X\