Acts 17

1Teketa tee Paula' naanka Sailas Ampipolis ee'noko Apolonia'navuntu'kai tankinureta Tesalonaika'namono-koo poretu' te' ee'noo' Ju'nupoong biikanava pava dootuu'nava otoko'noo'. 2Ee'noko Paula' teva-koo tumparara daankiaru' temu'keta nkoarako'na' aarumo siompui; 3Ee'noko beenang doong nko-nko-ita uaaning-koo teke tata'eeko' teing ninka tee Daari Meekung-koong kara-koo, Paula'ke siraka'antavuma ee'noko tasi'antavurima teing-koo tee nii' domamuri taremuriainoo'koo tero Pako'pari'nii' tee Daari Meekunge tampuu'na' baike kune'ura napo' boo'keta daa'aravaing-koong. Ee'noko aa'puko', “Aung ee'nara Jiisuu' ninge sira'pamaung dii'koo tee naning tero Pako'pari'nii' nemperimaung.” 4Ee'noko nii'ninge Ju'nupoonge taaravaara masika'antavaara tee Paula' naanka Sailas siompaaretu', ee'noko napo' mmau' Ju'deeaing Kumponing-koo mee'du'piari otoroko'ning ee'noko nii'ning maniku' mmau' nari', ovontunavo. 5Teka Ju'nupoong-koo pankeng mamairoarira nii'ning taarapiikanuka nkavaarira, karika' tapo'aarira tee osi pankaing naampai maanto'antavau', ee'noko Jeesoni bakanava pava putu'au' teinge Paula' naanka nantoong-anko sing-antavaree'naang piavoroma. 6Ee'noko tenang tenaanka ooaarearura teinge tee Jeesoni ee'noko nii'ning baito-nupoong baranta'aari berou' temono tarenuka-anko bokiaama aa'paama, “Aing kansi' ookutunairu apee bere'antavaamaing a' napo' amono-koo poroi. 7Ee'noko anka aunge Jeesonie onkeonke'uri. Ee'noko ainge ookarai niikaang daurarong~ pankaing, tee Siisa', bakaang boto toto'pai kapoo' nkoaamang aa'paama, ‘Nii'nung daurarong otong, miring Jiisuu'.’” 8Ee'noko temono osi pankamono-kooninge ovooka'nuka ninka oraka' noru'au' tee' taaravaara. 9Ee'noko aa'paaru', “Mooni' tutung siperiko deeko' kiimata-ita tenkeng-antararampii'naang ee'noko tee temurii' kapoo' nkoverimaung napo' nkoveriaruko deeko' aung mooni' dama' napo' tororerorompiaing.” Teketa mooni' dua'aio' teinge sing-antavaaru'. 10Ee'noko teinge baito-nupoonge te'mung ee'na'mung Paula' naanka Sailas tenkeng-antavaaretu' Beeria'namono-aape, ee'noko Beeria' basiareta Ju'nupoong biikanava pava dootuu'nava-koo kuung beretu'. 11Teing aing Ju'nupoong teke otoroko'ning biikaang noru' aa'na' daate'nii'nanka teing-koo Tesalonaika'ke otoroko'ning-koo, ai' teinge beekaang kara aa'na' tampa' taaravaako' ee'noko doong kante Daari Meekung-koo minkuaako'ning-koo bii'ka deeruaako' masikanaare oo-koo piavoroma. 12Tee'koo teing-koo mmau'ke masika'antavau', ee'noko teing Ju'deeaing-koo ovontung nari' aa'ning maniku' ee'noko donkaang. 13Teketa Ju'nupoonge Tesalonaika' otoroko'ninge taaravau' Paula'ke Kumponing bakaang kara daankivuko Beeria'navuntu'koo, tee' taaravaara te' napo' porou' irikung-antavuriko turang daa'antavaava'naang nantoong karinga-koo meu'ke. 14Ee'noko teing baito-nupoonge deempariko'ninge namu'ke Paula' tenkeng-antavau' pirung-aape navunge danto, teka Sailas naanka Timoti teke temono-koo otoretu'. 15Teinge Paula' tanatavai nari' nanaako'ninge Aateni-namono-koo basi-antavau', ee'noko Paula' botoaru' Sailas naanka-anko Timoti, nauaareko namu'ke poree'naang tee-anko. Teketa Paula' te' otoko teing tenkenau'. 16Aung aa' tee Paula' teke Aatenie tenaanka Sailas naanka Timoti nempuresi otoitaa' kumponing tositosinanka-koong baka-oonanka mmau' teka temono-koo oovurira domang aa'na' karinsi'ou'. 17Teketa pava dootuu'nava-koo Ju'nupoong biikanava-koo tumparara teke karai tata'eeko' Ju'nupoong ninka ee'noko teing Ju'deeaing Ju'nupoong ninka nari' dootuu'ariko'ning, napo' baaveroma bema doong kante tee' nari' tata'eeko' te' poroko'ning ninka. 18Nii'ninge napo' norukasi'nankai kune'aama tata'eeko' aa'ninge Epikurian-navitu ee'noko Sitoiki'navitu. Teing-koo nii'ninge aa'paako', “Aunge kara baukoi aming minkuvumaang?” Nii'ninge napo' aa'paako', “Nna' aung kumponinanka akovora'kooning biikaang kara daankivumaung-pina' oro'paramang.” Aung tee Jiisuu' ee'nara daankivuko tee', napo' boo'keta daa'aru'nung-koo. 19Ee'noko teinge moo'aara tee biikanoo' kaka'dekeroma be'antavau' miring Areopakasi, aa'paama, “Naumeriai tee kapoo' nerakamurii' dake nantoong nau-antaverimaung. 20Ai' dake kapoo' tee damisimaing nii' taara-antamering, tee'koo nii' miru'noo' noru'koo piamorimang tee-koo kapoo'koo.” 21Enang tee teing ookara Aateni-nupoong ee'noko damisimainku teke otoroko'ning kapoo' nii'nung nko-koo piavoroaruu' teka doorenananka taara-koo ee'noko nau-koo piavorou'. 22Tee'koo Paula' Areopakasi-koo meu' donkonura aa'puu', “Dii' nantoong Aateni-nupoong, ninge dii' avutevu'dariri aa'na' pareka nkonuka oorampimatoing. 23Ai' ninge tankinama tee meekanairu ooankotaa' nii'noo' boonturoma ooansing taa'ni'anta ee'pina' daariari otoko, ‘Aung Kumponing tee noru'ampiaung bakaang.’ Teka tee naning dii'ke parekaverimaung noru'eria' tee aung ninge naurampimang dii'. 24Tee Kumponing ookutunung kansi' nkovuu'nung ee'noko ookara kapoo'nanka kansi'koo otoromaing tee ee'nara Ovoring paning-koong ee'noko kansi'koonge, teka teke boontunava naninge kanivumanoo'ke otoaung. 25Kapoo'koo apuka'paravaunge. Naninge bakaang birenge pakuvuarupeu', ai' teie ee'narai baka ookara nantoong domang ee'noko domaang avurimaunge ee'noko ookara kapoo'nanka. 26Ee'noko teie tee nii' ookara nantoonanka narung-eta nkomuru' ookutunairu-koo kansi'koo o'norii'naang. 27Batei miru'memuru' o'noriainaroong, napo' o'noriainairu bono'memuru' te' o'nori Kumponing besi'ampiaina' aa'pampima, ‘Ai' pa taampampima pe'numpampii'naang.’ Teka tee tee isipo'ke otoa' nii'koo naruna' naruna', ai' nii' teing tee-koo o'nori domamariri nanampimaang naning-naummuri. 28Tee' dii'ka diikaninge kena toronukai kena toroaama minkuaamana' aa'paamana', ‘Nii' teing baurukaa' masikeng.’ 29“Nii' teing Kumponing baurukaa' deemariri ee' noru'ampiauka': Tee Kumponing tee Kooro dovang-koo siliva' ee'noko kapang teka'nii' nantoonge tamung nuuruupiaama matauna' teka'paamaung. 30Urikamu' nantoong noru' otoroaruko'nang Kumponinge tamung oovuriko', teka enang tee Kumponinge ookara nantoong ookutunairu-kooning baka narung Kumponing masikung-anko bere'arii'naang botoaring tompimpuri'neeng-koo dama'ke. 31Ai' teie ookara nantoong kansi'nupoong simpe'uriaina'mung tero pinka'antavuu'nung. Narunge naninge teie Pako'pari'uu'nunge~ ookara biikaang aarumo tasi'puitaa' koonto'na' simpe'uriaing, ee'noko nii' ookara tee' nkoaraa'naang tasi'antamuru' tee ee'nara Pako'pari'nii' boo'keta daa'antavura.” 32Teketa tee nii'ninge tee napo' boo'keta daa'anta taaravaara benkenau', teka nii'ninge aa'pau', “Nii' napo' taara-koo piamorimang tee kara naumering.” 33Teketa Paula' tenkenuu' teing-ankoita. 34Teka nii'ning nantoong tee ninka tapo'arira masika'antavau'. Teing-koo nii'nung Daionisias teke kaka'deke-koo narung pankaing ee'noko nani manikuma miring Damaris ee'noko napo' nii'ning nari' tenaanka ninka.

will be added

X\