Acts 15

1Teka nii'ning nantoong Judia'keta depeto Antioko'navuntu' porou' baito-nupoong nau-antavaarima aa'paama, “Dii' dopa' napu'dariarura deeko', Moosesie tampuu'na', dii' teing domang-anta komperiauka'ning.” 2Ee'noko Paula' naankai Banabasi taaravureta aa'na' turampaareta tata'eeko'. Teketa Paula' ee'noko Banabasi nii'ning ninka nari' miru'aaretu' Jerusalema'aape deto beroo'naang kara okovuri nkanuka-anko ee'noko dootuu'koo urantanuka-anko aung kapoo' tata'eu'nung-koo nia'kaava'naang. 3Temono-koong dootuu'nupoonge tee' nanu'koo botoaario' Ponisia ee'noko Sameria'nameensi'ka-kooninge deto dooreaari tankinau' Ju'deeaing bere'ariru'nung-koong doorenang, ee'noko teinge tee' dooreaama aa'na' doturotu-antavaaru' teing bii'maikorori' baito-nupoong. 4Tenang teing Jerusalema' basiariko onkeonke'aaru' temono-koo dootuu'nupoonge ee'noko teing-koo urantanukai ee'noko teing kara okovuri nkanukai. Ee'noko teinge nauaaru' ookara Kumponinge nkovuu'nanka teing ninka. 5Teketa nii'ning Karistoo' masika'antavaako'ning Boto Keperuu'navitu-kooning~ daa'arira aa'pau', “Teing Ju'deeaing dopa' toto'parira deeko' makosiaapeu' domaang otoi oto' nka-koo, ee'noko Moosesi-nung boto siong-koo botoarampiai.” 6Teketa tee teing kara okovuri nkanuka ee'noko Karistoo'koonavitu-koo urantanuka naro'ariru' tee aung minkuaava'naang. 7Ee'noko teketa aa'na' tata'eekotaa' Piitai donkonura aa'puru' teing, “Ee aing mmaikori', dii'ke noru'eri otong tero tee Kumponinge ning dii'koo meu'ka miru'muu'nung daankiama'naang tee doorenang tampara Ju'deeaing-koo taaravaara masika'antavaava'naang. 8Ee'noko teie Kumponinge ookara biikaang domang noru'ui otoinge Ju'deeaing onkeonke'urimana' sira'paru'nung Tanuaang Meekung avurima tee' nari' nii' amuru'na'. 9Ee'noko noru' tankatankaang nii'koo meu'ke otoa' aa'noko nii' ee'noko teing, teka nii'pina' kiiroraa'uru'nung biikaang domang masika'antavaako. 10Enang tee' noru'erima dii'ke aming-koo Kumponing paaraverimaang Moosesi-nung boto-koo manki' poru'antavererima teing Karistoo' sionuka? Tee ee'nara boto niikakatauroi ee'noko nii'ke naro'ka nka-koo makosi deeaung. 11Teka nii'ke ee' masika'antavampiri otong nii' niikaang Ovoring Jiisuu' bakaang piaae boo'keta moo'muriainge tee' teing-pina' nari'.” 12Piitai tee' minkuvuio' ookara naro'ariru'ning kapuuariru', teketa Banabasi naanka Paula' barorompaaretu' minkuvureko taa'ni'antananka ee'noko ta'nimpaarii'nanka Kumponinge Ju'deeaing-koo meu'ke tenaanka ninka nkovuu'ning-koo. 13Ee'noko tenaanka kara bakeareko Jeemisie karoma aa'puu', “Ee aing, taarameriaing ning. 14Saimoni'ke tee naururu'nung dii' tee' Kumponinge teing Ju'deeaing beero'uru'na' teing-koo nii'ning tonta'urira bakaning deempurii'naang. 15Ee'noko teke urikupoong nakaro-nupoong Kumponing-etaing biikaang kara nari' makotuu', ee' daariari otoina': 16‘Ovoringe aa'pumaang, dama'ke tee toromarara ninge napo' kaniampaing teva bare-nava Deevita' dootuu'arako'nava pesi'aru'nava. 17Pesi'aru'noo'keta napo' kaniamirai'nange deto donkompampaing teinge nii'ninge nantoonge Ovoring tasi'maara poroaina' Ju'deeaing ookarai nkaning tamparansi otoininge. 18Ovoringe tee'puu', teie kansi' pupu'aru'noo'keta ookara kapoo'nanka nkovuriaina' noru'ui otomaunge.’” 19“Tee'koo ninge ee' simpe'amaang, tee aa' nii'ke pore'antavarampiauka'nung teing Ju'deeaing Kumponing-aape bere'ariaining. 20Teka daariampima nauarampiaing aing aa'ning nkoaavaroo'naang, taamang naiaavauka' kumponing tositosinanka-koo darimpaama ku'mi'antavaamaung, kaukauro nkoaavauka', bio' tutung tavaama ereng dakoaavaung maa'aavauka', ee'noko ereng naiaavauka', Ju'nupoong dii'koo maarevoro'neeng. 21Ai' urikavarang-eta nantoong otoromaung Moosesi-nung boto deeruaama aing kapoo'nanka daankiaamaing osi kante pava dootuu'nanka-koo Doong Uaana'mung kante.” 22Ee'noko tenang teinge kara okovuri nkanukai, dootuu'koo urantanukai, ee'noko teing ookara dootuu'nupoonge tamparavaara, aing aa'ning teing-kooning miru'aaru' Paula' naanka ninka Banabasi Antioko'aape nari' nanu'koo: Judasi, nii'noo' Basabas tampaako', ee'noko Sailas, tenaanka teing-koo dootuu'nupoong-koo miring-po'naanka. 23Karavoto~ ee' daarinii' nkavai be'koo botoaaru': “Dii' teing Ju'deeaing Karistoo'koo baito-nupoong aa'ning-kooning-Antioko', Siiria ee'noko Silisia-nupoong-dii'koo tampara tampampimaang nii'ke dii'maikorori'ke aa'ninge: kara okovuri nkanukai ee'noko Karistoo'koonavitu-koo urantanukai. 24Nii'ankoita nii'ning berora kararaarima pore'antaraariko taaravampiring onou-koo oto' dataveria' otomana' nkoraarima, aa'daarima dii' dopa' toto'darira ee'noko Moosesi-nung boto siomperima Ju'pina' otoriaing. Teka nii'ke nauarampiaruko tee' minkuraarimaung. 25Tee'koo nii' naro'marira nari' noru'mariru'nung nii'naanka miru'arampira botoarampii'naang dii'anko anaanka ninka nii'ke piaavarampimanaanka ninka aa'noko Banabasi ee'noko Paula'; 26Aa'naanka niikaang Ovoring Jiisuu' tee Pako'pari'nii' tasi'puresi avororea' siompuremanaankai, nantoonge mau'aareko. 27Nii'ke anaanka Judasi naanka Sailas botoarampiring bee'ka napo' karai nauraarii'naang kapoo' aunge karavotoi naurarampiring. 28Tenang Tanuaang Meekung ninka nari' o'nori ee' tampa'na' noru'mariring: Nii'ke kara manki' dii'koo dau pante'ampiauka'nung, teka aing naing aarumo naurarampii'naang dii'ke siong-koo makosi: 29Taamang kumponing tositosinanka-koo darinii' ee'noko ereng naieriauka', bio' tutung tavaama ereng dakoaavaung maa'eriauka', kaukauro nkoveriauka'. Aing-eta tonta'dariri otoriaing deeko' tee' tee tampa'. Makosi otoriko.” 30Teketa tee botoaario' teing Antioko'navuntu'aape doonko berou', ee'noko te' basiarira tee Karistoo'navitu naro' oosiaarira teka tee karavoto avaaru'. 31Ee'noko tenang teinge deeruaara dotuariru' teing tee-koong karai domang kuaa'antavurio'. 32Ee'noko Judasi naankai Sailas nakaronaankai mmau' kara nauaarema daankiaretu' puring-antavaarema teing baito-nupoong. 33Teketa nii'ning batei teke otorora teinge baito-nupoong mooa ninka botoaaretu'ning-anko nanuree'naang tampaarema si'noora'aaretu'. 34Teka Sailas teke napo' oto'koo piavoko Judasi baka toroaru'. 35Ee'noko Paula' naanka Banabasi nari' teke otorou' Antioko'navuntu'koo. Tenaanka nii'ning mmau' ninka nari' Ovoring bakaang kara nau-antavarima daankiaariko'. 36Ee'noko nii'ning doong tankinuko Paula'ke Banabasi aa'puu', “Poai, toromareta neekaning baito-nupoong beero'arampeai ookara osinanka-koo Ovoring bakaang kara daankiampetu'ning-koo ooarampema otoroina'.” 37Ee'noko Banabasie Jooni Maaka' tenaanka ninka nari' bokuvuresi nanu'koo piavou'. 38Teka Paula'ke ee' noru'uu', “Aung bokuampearui dei tampa', ai' temu' Pampilia'ka nee' si'mureta pakumurearuu' pore'moreko.” 39Teketa tata'eereta siivenke'eeretu'; Banabasie Maaka' bokuvura Saiparasi-namui'koo aarerie beretu', 40ee'noko Paula'ke Sailas bokuvura tenkenuretu' teinge baito-nupoonge Ovoring-koo sipaaresio' teie pakuvuree'naang. 41Ee'noko tenaanka nanu' tutumparema Siiria-nameensi' ee'noko Silisia-nameensi'ke tankinuretu' dootuu'nupoong puring-antavaarema osi kante-koo.

will be added

X\