Acts 14

1Teke Aikoniami'navuntu'koo tenaanka pava dootuu'nava-koo napo' tumparetu' Ju'nupoong biikanava-koo, ee'noko teke tee' nari' aa'na' daankiaresio' nantoong karingai masika'antavau' ookavitura-kooninge aa'ning Ju'nupoong teing Ju'deeaing nari' dootuu'ariko'ning. 2Teka teke nii'ning Ju'nupoong-kooning Karistoo' masika'antavaavaruko'ninge siingoravaarima akoing noru' orari-antavaaru' teing baito-nupoong munte'koo. 3Teka tee'koo tenaanka pankaroong otoretu' teke dera-antavuresi tee minkunaa Ovoring bakaang piaa-koong, ee'noko Ovoringe tee minkunaa masikee-anta-koo taa'ni'antananka ee'noko ta'nimpaarii'nanka nkovuree'naang avuretu'. 4Ee'noko nantoong temono osi pankamono-kooning meu' tankaampariru', aa'nou' nii'ning Ju'nupoong ninka deempariru' ee'noko nii'ning kara-okovuresi-nkara ninka deempariru'. 5- 6Teketa tenang aa'nou' Ju'nupoong ee'noko teing Ju'deeaing nari', biikaning ovontung ninka, tenaanka oraka' nkoaarema kapange too'paarema dupisi'koo mau'aareko taaravareta koo'aretu' nii'ning osinairu-koo aa'ning-koo Liisira' ee'noko Deebi, Laikonia'nameensi'kooning osi pankeng-koo. 7Ee'noko tenairu-koo daankivuretu' tee doorenang tampara. 8Teke Liisira'ke naning narung ba'nanui otoko'nung kau' doota, ponto'aru'noo'keta nanuaruko'nung. 9Teie Paula' karoko taaravuu', ee'noko Paula'ke naapu narung oovuma tasi'pura masika'antavui taarevoaing-pina' noru'arako aa'na' karoma aa'puu', “Deto koontari donkoniai.” 10Ee'noko deto dinkitoo'arara donkonura nanuu'. 11Ee'noko tenang nantoong karingai ooaara tee kapoo' Paula'ke nkovuu'nung teing deto bokiaama biikana' Laikonia'na' kareaama aa'pau', “Tenaanka niikanaanka kumponinka tee e'mung siaresing naning-pina' oro'paresi.” 12Ee'noko teinge Banabasi Sius tampau', ee'noko Paula', kara bauko deemparako Eemis tampau'. 13Ee'noko teie Sius-koong piristi'ke, bakaang boontunava te' osi pankamono-koo be'doma otoko' aa'nunge iioo' tuumpura boromaka'nanka-koo pampurira karanaang bi'uru' osi pankamono-koo tuntoma, ee'noko nantoong ninka boontunamparii'naang piavoroko'. 14Ee'noko tenang kara-okovuresi-nkarai Banabasi naankai Paula' oovureta tenaankai beekaning mononopa'nanka kurumparetu'ning dere'uretu' orokoarema. Ee'noko teing nantoong karinga-aape kua'paretu' bokurema aa'purema, 15“Ee aing, aung aming-koo ee' nkoverimang? Nee' tenaanka naninka dii'pina' nari' oro'ka, dii'koo doorenang tampara po'antavampesinaanka dii' bere'darii'naang teing-eta aing-eta kapoo' tamunsi'ning-eta Kumponing domantoo'aape, tee ee'nara paning ee'noko kansi' nkovuu' ee'noko pirung ookara kapoo' kuung otoromaing ninka nari'. 16Tero urikavarang-koo teie tee taura'puru'nung ookutuning amutemurii' nantoong avitoitoi piavoroaina' siompaava'naang. 17Teka tee bane tee' nkorurira teie koonto' si'duria' taa'ni'antavari, ai' teie tee tampa' nkorurimaung apo' dovang arurima paning-eta, bateinananka ookara kapoo'nanka tampa' sinampumaing arurikoo' diikaang domang unaa-antarurima taamang tovange ee'noko doturotu.” 18Tee' nauaareta teie aunge karai kakau bere'antavaaretu' teing nantoong tenaanka-koo boontu-koo piavoroko'ning. 19Teka teing Ju'nupoong turampaareko'ninge Antioko'keta ee'noko Aikoniami'keta porora nantoong noru' bere'antavaario' teinge Paula' kapange too'pau' ee'noko osi-koo dama'du barampaara dua'au' boo'paru'nung-pina' noru'aama. 20Teka tenang Karistoo' sionuka tee koroai tee-anko poroio' tee deto donkonura osi pankamono-koo napo' tumparu', ee'noko dauna'mung Banabasi ninka nari' Deebi-aape beretu'. 21Teketa tenang tenaankai doorenang tampara daankivurema teke Deebi-navuntu'koo nantoong karinga Karistoo' sionuka deeng-antavaaretu'nung. 22Teketa tenaanka Liisira' ee'noko Aikoniami' ee'noko Antioko'aape toroareta puring-antavaaretu' teing Karistoo' sionuka biikaang masika'anta-koo, tautauaarema tee' nari' masika'antavariri otoroo'naang ee'noko aa'paarema, “Bakei teing kapoo' manki' mmau'nanka kune'ampima Kumponing bakaang muu'koo tung-koo makotumpii'naang.” 23Ee'noko tenaankai dootuu'nupoong-kooning urantanuka miru'aaretu' osi kante-koo, ee'noko kunsiarima unkumoariri Ovoring-koo sipaareko' masika'antavaako'nung-koo. 24Teketa tenaanka Pisidia-nameensi'ke tankinureta Pampilia'nameensi'koo basiaretu'. 25Ee'noko tenang Peeka-namono-koo kara sira'pureta, Atalia-navuntu'aape danto beretu'. 26Ee'noko teketa beekaang nko-nko opureta Antioko'namono-aape aarerie toroaretu', te' ee'noo' tutung Karistoo' bakanavitue Kumponing-koo sipaaretu'noo' pakuvuree'naang tee nko-nko nkovureko. 27Ee'noko tenang te' basiareta tenaankai ookara dootuu'nupoong naro' oosiaaretu' ee'noko siraka'antavuretu' ookara kapoo' Kumponinge nkovuu'ning tenaanka ninka, ee'noko napo' tee' Kumponinge taung nkovuu'na' teinge Ju'deeainge nari' masika'antavaava'naang. 28Ee'noko tenaanka teke pankaroong otoretu' Jiisuu' sionuka ninka.

will be added

X\