Acts 13

1Enang tee teke Antioko'ke dootuu'nupoong-koo nii'ning nakaronuka ee'noko nau-antanuka otoroko'nung, aa'noko Banabasi, Simioni' nii'noo' Mutaanu' tampaako', Lusias Sairini-nung, Maneien, tee ovo'ma' Eeroti' ninka nari' panka'paretu'nung, ee'noko Soolo. 2Tenang teinge Ovoring daangampaako ee'noko bakaang piaa besi'ai unkumoariko Tanuaang Meekunge aa'puru', “Banabasi naanka ee'noko Soolo taapo' tonta'memuriai tee nko-nko ninge botoampetu'nung nko-koo.” 3Teketa unkumoarima kunsiarikotaa' teinge tanka' pante'aareta botoaaretu' tenaanka. 4Tee'koo Tanuaang Meekunge botovuresio' tenaankai Jooni Maaka' bokuvuretu' teie pakuvuree'naang. Teketa Selusia-navuntu'koo pirung-aape danto berora Saiparasi-namui'aape aarerie~ berou'; 5Tenang Salamisi, Saiparasi-koonavuntu'koo basiarira tenaankai Kumponing bakaang kara daankivuretu' pava dootuu'nanka Ju'nupoong biikaning-koo. 6Tenang teinge temui' ookutunamui' opai daankiaarima nanaara Paaposi-navuntu'koo basiarira teka teinge naning narung nankai'nung kune'au', Ju'nupoong-koong daang Kumponing-etaing nakaronara tamparako'nung miring Baajiisuu'. 7Temui'koong ovo'ma' ninka nari' otoreko'nung miring Sesias Paulus, tee naning onou-po'nung. Tee ee'nara botoaru'nung Banabasi naanka-koo Soolo Kumponing bakaang kara taara-koo piavoma. 8Teka teie nankai'narai, miring Baajiisuu'ke, nii'noo' Elimasi Kiriki'na'koo, teie turampuretu' Banabasi naanka Soolo, teie ovo'ma'ke Jiisuu' masika'antavu'neeng-koo. 9Teka teie, Sooloi, nii'noo' Paula' tampaako', Tanuaang Meekunge maanto'ui aa'na' naapu narung oovuma aa'puu', 10“Da' aung Sietani' bauring, da' tee karenung ookara kapoo' koonto'nanka-koo, tosinankai ee'noko oraka' nkonankai maanto'. 11Ee aung, Ovoring bakaang kara mare'koo bakeraravaruko da' tee Ovoringe enang taruko kaputu'darara ookiaroo'naang nii'ning batei-koo; duaa'koo ookiauka'nunge.” Teketa tenang namu'ke kamo'ke dako'ura mutaanampuu'. Ee'noko nantoong tee bireng-koo kompai siong-antavai nanaavaining besi'urima nanuu'. 12Tenang teie ovo'ma'ke tee kapoo' nkoaru'nung oovura ta'nimparara masika'antavuu'. Asikovuu' Ovoring bakaang nau-anta-koo. 13Teketa tee Paula' dovang aarerie tenkenau'nung Paaposi-eta teketa Peeka-navuntu'koo basiariru' Pampilia'nameensi'koonoo'. Ee'noko Jooni Maaka'ke teka sipureta Jerusalema'aape toroaru'. 14Teka tenaanka daanto tankinureta Antioko'navuntu'koo basiaretu', Pisiria-nameensi'koonoo' te'. Ee'noko Doong Uaana'mung tenaanka Ju' biikaang pava dootuu'nava-koo bereta ba'namparetu'. 15Teketa teinge dootuu'nava-koo pankenge Daari Meekung-koo bere'aara Moosesi-nung boto-koo ee'noko urikupoong Kumponing-etaing nakaronuka biikaang dariraari-koo deeruaara tenaanka-koo botoarema aa'pau', “Dee' nii'marang-koonaanka, dee'ke tautau nantoong domang kuaa'anta-koong oto'deruresing deeko' minkuereai.” 16Teketa Paula' deto donkonura bireng toonuma aa'puu', “Dii' nantoong Isireeli-nupoong ee'noko dii' Ju'deeaing Kumponing nari' aroo'erimaing taarameriai. 17Tee ee'nara Kumponing aing nantoong Isireeli-nupoong biikaange niikakatauro bakaning miru'urira biurukaa' naro'ka pankaing-antavuru' tenang teke Iisipi'ke damisimainku otoroko'nang, ee'noko bakaang iri' oro'antavui teketa' tonta'uru'. 18Ee'noko mare' karenaumo kivora-koo tarevuri nanuko' teke mee'bora' sirakamaa'koo. 19Ee'noko tenang ~kenaanka-taa muu' tavurima opurira Keenani-nameensi'koo teie teing barevuri oko-antavuru' tee temeensi' tankaampurira. 20Aung tee karenaumo daaku'keta naruaape mare'koo kuunge nkoaru'nung. Ee'noko teketa simpe' nkonanka~ donkong-antaevuriko' bera Samuela'koo basinoo', tee ee'nara Kumponing-etaing nakaronara. 21“Teketa teing daurarong-koo eentavariko Kumponinge Soolo daurarong deeng-antaevuru' karenaumo kivora mare'koo, tee Kiisi bauring, Bensimani bakanamuiaang-koong. 22Ee'noko teketa tee tonta'ura Deevita' napo' biikaang daurarong deeng-antavuu'. Tee-koo ee'nara-koo Kumponinge kara sira'puma Daari Meekung-koo otoina' aa'puu', ‘Aung ee'nara Deevita', Jeese' bauring, enang ooansing tee naning nkaang domang ninka nari' onouaramaung. Tee ee'nara ookara nkaang pia siompui nkovuaing.’ 23“Aung ee'nara Deevita' baurukaa'keta Kumponinge po'antavuu' Isireeli-nupoong-koo tee Domang-anta, Jiisuu', maraka-antavuu'na'. 24Jiisuu' mme' poaruko Joonie bere'arira ntong-koo minkiarira meeka'antavarii'naang daankivuriko' ookara nantoong Isireeli-nupoong. 25Ee'noko tenang Joonie bakaang nko-nko bakevuma aa'puu', ‘Dii'ke ning baa-pina' noru'merimang? Ning aa' tee Domang-anta nemperimaung deea', teka ning-koo dama'ke pomaang tee, ning aa'na' apoo'mui doonge-taara~ deempari. Tee ee'nara poko bakei tampa' taaraveriai.’” 26Tee' nari' Paula'ke daankiarama aa'puru', “Mmarang ee, Eebaraami' baurukaa'kooning, ee'noko dii' Ju'deeaing Kumponing nari' aroo'erimaing aa'dampimang: Nii'koo ee'ning-koo doorenang tee-koong domamuriaing-koong botoario' pou'nung. 27Teing nantoonge Jerusalema'nupoonge ee'noko biikaning pankenankai tasi'paavaruu' tee Jiisuu', teka tee boo'koong kiimata tampau'noo'koo teinge tee dupe-antavau'nung tee kara urikupoong Kumponing-etaing nakaronukai daariau'nung ee'nara deeruampimaung ookara nko-nko-ita uaana'munanka-koo. 28Teka tee bane okora' boo'anta-koo makosina' ooaavarura teinge Pailati' nia'au'nung tee botoarako dupisi'aava'naang. 29Ee'noko tenang dupe-antavaara tee ookara Daari Meekunge tee-koo minkuvui otoining teinge depeto siau'nung teieta koi'keta ee'noko kuvi dako'doma dako'au'. 30Teka teie Kumponinge boo'keta daa'uu'. 31Ee'noko mmau' doong-koo oro'paru' teing-koo tee ninka porou'ning-koo Kaaleli'keta te' Jerusalema'. Teing ee'ning enang batei-koo bakaning sira' nkonuka deempariri otorong nantoong-koo. 32“Ee'noko nii'ke tee doorenang tampara po'antarerorompimaang aung anaare: Tee ee'nara Kumponinge maraka-antavuu'nung teing-koo urikupoong niumaraang-koo enang tee Kumponinge dupe-antamemuring nii'koo biurukaa'koo Jiisuu' domang-antavura. 33Tee' nari' Daari Meekung-koo daariari otoina' teke kevuranavu-koo Kena-koo Tee Pako'pari'nii' tero miru'uma aa'pumanavu-koo: ‘Da' tee Nnuring. E'mung tee ninge daa'dansing.’ 34Ee'noko boo'keta domang-antavuu'noo'koo tee' ee'na' napo' dera' aapearavauka'na'koo ee' daariari otong, ‘Teing biraankenanka meekeng Deevita' maraka-antavantu'ning masika' dii' arompiaing.’ 35Napo' nii'navu-koo minkuvuma aa'puu': ‘Dake taura'peauka'nung tee dakaang naning meekung dera'koo.’ 36“Nii'ke tasi'pampiri otong Deevita' baka tee' minkuarava', ai' Deevita' tee Kumponinge miru'uu'na' bakanavarang-koo nkoarara tee boo'pario' tee baumaraang ninka nari' dako'au' ee'noko teke dera'ou'. 37Teka tee Jiisuu' Kumponinge daa'antavuu'nung tee dera'oa'. 38“Tee'koo dii'ke mmarange noru'eriaing tee aung ee'nara narung-koo dii'ke orara aarumo-ita tonta'anta nkaveria'naang daankirampimaang. 39Ee'noko teie narunge ookara kante masika'antavaavaining tonta'antavuri otorong ookara kapoo'nanka-ita dii' Moosesi-nung botoi tonta'antaruriarupeu'ning-eta. 40Tarerariai kapoo' Kumponinge teing urikupoong nakaro-nupoong karantavuriko minkuau'ning dii'koo po'neenga, aa'pau'ning, 41“Ooveriko dii' benkemerimaing, ta'niniri karakararerarima dooriaining, ai' ninge tee diikaning doong-koo kapoo' masikung nkoampaing, tee kapoo' dii'ke tee koonto' masika'antaveriauka'nung bane naninge pukevui naururiko deeko'.’” 42Teketa Paula'ke daankinang bakevuko ookara dootuu'nava-ita siarima nii'ninge aa'na' nia'au' teing aing kapoo'nanka napo' nii'na'mung Doong Uaana'mung dankivurii'naang. 43Teketa tee dootuu'nava-koo minkunaavariru'noo'keta siarira mmau' nantoong Ju'nupoonge ee'noko teing Ju'deeaing nari' dootuu'ariko'ninge siompaaretu'nung Paula' naanka Banabasi. Ee'noko tenaankai Kumponing bakaang piaa-koo pinka'ariri otoroo'naang tautauaarema nauaaretu'nung. 44Teketa daunung-koo Doong Uaana'mung dapi' ookara temono osi pankamono-kooning naro'ariru'nung taara-koo tee kara Ovoring bakaang. 45Teka teinge Ju'nupoong-koo pankenge nantoong karinga ooaarira mamairoi maanto'urira papuraanka'au' tee kara Paula'ke minkuvuu'nung poore'aama. 46Ee'noko Paula' naankai Banabasi aa'na' nari' minkuvurema aa'puretu', “Kara Kumponing bakaang makosi dii' tutung nau-koo, teka dii'ke dimpa'ering-koo ee'noko domaang oparavauka'nung-koo makosina' deea'na' simpe'dariring-koo, nee' makosi teing-anko Ju'deeaing-anko toromarema mereaing. 47Ai' Ovoringe tee Daari Meekung-koo kuunge Karistoo' minkuvuma aa'memuru'nung, ‘Da' tee ninge donkong-antaransing araka deentari otoo'naang Ju'deeaing-koo dake domang-anta tavo'ee'naang tokooning-koo isipo'ning-koo aung-koo kansi'koo.’” 48Ee'noko tenang teinge Ju'deeainge tee aung kara taaravaara teing dotuarira pankaing-antavau' tee Kumponing bakaang kara, ee'noko teing makosining Kumponinge tero miru'uru'ning domaang o'paa' nka-koo teinge masika'antavau'. 49Ee'noko Ovoring bakaang kara teketa beremparu' ookutunairu-koo temeensi'kooning-koo. 50Teketa teinge Ju'nupoong-koo pankenge tee osi pankamono-koo ovontung donkaang ee'noko maniku' Kumponing-koo mee'du'piariri otoroko'ning onou orari-antavaaru' maroita Paula' naanka Banabasi oraka' nkoaaree'naang, ee'noko tee' nkoaarema bata'aaretu' biikanairu-eta. 51Ee'noko tenaanka da'mong tankavaretu' kau'keta teing nau-anta-koo biikaang oraka'nko teing-koo toroaraa'naang. Teketa Aikoniami'navuntu'aape beretu'. 52Ee'noko Jiisuu' sionuka doturotu ninka Tanuaang Meekunge maanto'uru'.

will be added

X\