Acts 12

1Tenang tee batei-koo tee daurarong~ Eeroti' botoario' nii'ning dootuu'nupoong-kooning dai'aaru' oraka' nkoaarii'naang. 2Bera aa'nou' Jeemisi tee Jooni bataata, Eeroti' botoario' bainatue dupisi'au'. Ee'noko teing ovontung Ju'nupoong Jiisuu' turampaako'ninge tampa' noru'au'; 3Teketa Eeroti'ke teing dotuariko oovura napo' Piita dai'koo botoaru'. Aung tee tenang Baari'koong~ Paroro, taamang berete' iisiropa-koong nkoaako'nang. 4Ee'noko tenang teie moo'ura tee kiimatanava-koo sipuu' piatooronuka-koo kareviturie karenaumona' paarieema tanatavaava'naang kiimatanava-koo. Teketa Baari'koong Paroro bakearako nantoong-anko be'antavuu'naang noru'uko'. 5Tee'koo Piita tee kiimatanava-koo teka tareaako', teka teinge dootuu'nupoonge kunsi ivekung nkoevau' Kumponing-koo. 6Teketa te'mung ee'na'mung muunga teie Eeroti'ke nantoong-anko tavo'uu'naang tampuko'na'mung Piita tee aatui otoko piatoorora-koo~ kenaankara-koo meu'ke kevintai sieenai dai'ari. Ee'noko nii'ning tareariko'ning kiimatanava-koo karanaange donkonai tanatavariko. 7Bera tee ta'nina' Ovoring bakaang koosinung teke oro'paru' ee'noko arakai arakavuu' tevaro. Ee'noko Piita teka mato'nang-koo tanko'puma tantevura aa'puu', “Iri'narung daa'daravai.” Ee'noko teing sieenaning doonko dua'aretu' bireng-eta. 8Ee'noko koosinunge napo' aa'puu' tee, “Baarong tokorarara boonamante~ si'daravai.” Ee'noko tee' nkoario' koosinunge Piita aa'puu', “Mononopa' kuruntarara siomeai ning.” 9Ee'noko danto siaru' siompui tee. Teie tee masika'antavua' tee kapoo' koosinunge nkovuu'nung, tang nii'naung-koo bere'ari noone-koo nanuu'nung-pina' noru'uma. 10Teketa tee tenaanka tutuna'nung ee'noko kenaanka-nung tanata nkora divu'aareta aini-koong ku'nung otoinoo' basiaretu' osi pankamono-aape be'doma. Ee'noko tee tee ku'nung baka daate'ario' tenaanka siaretu' danto dama'du. Bera navunge danto bereta koosinunge teka namu'ke sipuu' tee. 11Ee'noko Piita-koo tenang onou poko aa'puu', “Emu' koonto' tasi'pansing aung tee Ovoringe bakaang koosinung botovuing ning domamuu'naang Eeroti' bakaang bireng-eta ee'noko bakaning oraka' nkonanka ning-koo basi-antavuko Ju'nupoonge ooaava'naang nempariko'ning.” 12Tenang tee tasi'parara Piita Meeri' bakanava-koo beu', teni tee Jooni Maaka' bauko, te' ee'noo' nantoong karinga oosiarira kunsiariko'noo'. 13Ee'noko tenang teie karanaang-koong ku'nung kopikopi'uko nani nerai'na' bautara miring Rooda'ke taaravura oo-koo pou'. 14Bera Piita-koong aurong tasi'pura dotuarama karanaang daate'ua' kuung-aape kua'pari bera nauvurima aa'puu', “Piita karanaang-koo dama'due donkonui otong.” 15Nka teinge aa'pau' teni, “Da' aa' pa kanu'daring.” Teka teni deravarako teinge aa'pau', “Tee aa' bakaang tanuaang pa.” 16Teka Piitai tee' nari' kopikopi'uko'. Ee'noko tenang teinge daate'aama Piita ooaara tee ta'ninau'nung. 17Bera dooroomparii'naang birenge orokovurira teie siraka'antavuu' Ovoringe kiimatanava'keta po'antavuu'na'. Ee'noko aa'puu' Piitai, “Aung Jeemisi bakanamiring naueriai ee'noko teing nii'ning nii'maikorori'.” Teketa tenang tenkenura oovunamono-koo beu'. 18Tenang tane'puio' tee teing piatooronuka oki'noo' biru'aria' Piita paa'aru'nung-koo. 19Ee'noko tenang Eeroti'ke besi'uma oovuarura teing tare-nupoong tuutunampurirai'nange tavaarima dupisi'aarii'naang botoaru'. Teketa Eeroti' Judia'keta Sisaria'aape doonko bera teke otou'. 20Tenang Eeroti' teke Sisaria'ke otoko Taia'nupoong ee'noko Saidoni'nupoong naro' naro'arira nii'ning nantoong Eeroti' pinau-antavaava'naang botoaaru', ai' teie Eeroti'ke tee teing aing kemonora osi pankeng aa'na' munte'uri otoko'nung. Ee'noko teing mooa-antanuka porora tutung narung tee Eeroti' bakanava tanatavuko'nung miring Blastus tampa' karavaama mooa-koo eentavariru', ai' teing teing biikaang taamang tee daurarong bakanoo'keta nkavaako'ning. 21Bera tee teketa te'mung doong miru'uu'na'mung makotuu'nang Eeroti' nepu'ari daurarong bakanoo' ba'nani'doma ba'nanura boo'antana' daankiaru' teing-koo nantoong-koo. 22Ee'noko teinge bokiaama aa'paako', “Narung ee'nara kumponing bakaang-pina' auromparamaang, naning-pina' deea'.” 23Teketa namu'ke Kumponing bakaang koosinunge~ teka tavuu' tee, bakaang daangang Kumponing-aape pare'uaruio'. Ee'noko domang ninka otoko kiki'ke puampaako boo'paru'. 24Ee'noko teketa tee Kumponing bakaang kara nepu'na' deto aa'na' dupura beremparu'. 25Ee'noko tenang tee batei-koo Banabas naanka Soolo Jerusalema'keta toroaretu' mooni' tavo'uretu'noo'keta, tee Jooni Maaka' bokuvuresi.

will be added

X\