Acts 11

1Enang tee Ju'deeainge Kumponing bakaang kara nkavaio' taaravau'nung kara okovuri nkanukai ee'noko ookara baitoariko'ninge Judia'nupoonge. 2Tee'koo Piita Jerusalema'aape toroario' teinge dopa' toto'koo purimpariko'navitue tuutunampau', aa'paama, 3“Da' aming-koo teing ninka dopa' napu'ariaing ninka pava-koo bera nari' taamanirieeng?” 4Teka Piitai ookara kapoo' okora'keta nkoaru'na' nauvurima siraka'antavuu'. 5Aa'puu', “Ning teke Joopa'navuntu'koo kunsimarama o'noi nii'naung-koo bere'marara kapoo' pankaing baarong-pina' sivere'ari paning-eta depeto siarako karenaumo kunku'doi'koo bi'ari noone-pina' ooantu'. Ee'noko tee ning-anko siaru'. 6Bera tee-koo ookama kau' karenaumonanka ooarantu', nii'ning iirankesi'nanka, ee'noko boru'nanka ee'noko barennanka auvi'au-kooning. 7Ee'noko ninge aurong taaravantu' aa'muko, ‘Piita, donkonira tavera maa'eai.’ 8Teka ninge aa'pantu', ‘A, Ovoring, temu'keta koonto' aing kapoo' ee' oro'ke ning karang komuaruu'nung, ai' aing teing ku'mi'po'ning, orokoari otong nii'koo Ju'nupoong-koo.’ 9Ee'noko teie auronge napo' kemu'kana' paning-eta karoma maku'muma aa'puu', ‘Aming kapoo' Kumponinge kiiroraa'antavuing dake ku'mi'po'nung tampema poore'eauka'.’ 10Bera tee beemu'pina' nkoario' napo' paning-aape ookutunung deto barampuu'. 11Ee'noko napo' tenang tee batei-koo beenaumo nantoong Sisaria'keta ning-anko botoaaru'ning porou' te' teva-koo nii' o'noriko'noo'. 12Ee'noko Tanuaang Meekunge ning teing ninka nari' merii'naang botomuu' tokoona' noru'marava'. Ee'noko aing nii'maikorori' ~narung-taa ni'ninka nari' nanampiru' bera te' tee naning ning bokumuu'nung bakanava-koo tumariru'. 13Ee'noko teie naumuru' tee' koosinung bakanava-koo pora tee-anko donkonuio' oovuu'na' aa'puma, ‘Joopa'aape botoraravai Saimoni', tee Piita tampaamaung boku-koo. 14Teie ee'narai siraka'antaruu'naang tee doorenang da' ee'noko dakanava-kooning nari' domantariaina'koong.’ 15“Teketa ninge kara tutumpanko tee Tanuaang Meekung tee teing-koo siaru' tee' nii'koo tutuntomai nkoaru'na' nari'. 16Ee'noko ninge norunoru'antu' tee kara Ovoring bakaang ee' minkuvuu'nung, ‘Jooni Minkinarai tee masika' tamung ntong-koo minkirurima meeka'antaruriko', teka dii' teing Tanuaang Meekung ninka meeka'antarariaining.’ 17Kumponinge tee, nii'ke Ovoring Jiisuu' niikaang domang-anta tero Pako'pari'nii' masika'antavampirio' tee bakaang Tanuaang Meekung nii' amuru'na' aing avurio' tasi'pamira ning arekee'koo ninka mosii'marapeu' Kumponing bakaang pia toto'pansitaa'?” 18Tenang teinge tee taaravaara teing dooroomparira Kumponing pankaing-antavau' aa'paama, “Ju'deeaing doma turero'puringe Kumponinge bere'arira domamparii'naang.” 19Tenang tee Sitiveni tavaara manki' avu'antavaario' Karistoo' bakanavitu-koo nii'ning avitoitoi mmariau' akovitu otoromanairue bera aa'ning-koo basiariru' Ponisia-nameensi', Saiparasi-namui' ee'noko Antioko'navuntu'. Nka Kumponing bakaang kara Ju'deeaing-koo sira'paava' bii'ka Ju'nupoong naing naueeko'. 20Teka teing-koo nii'ning Saiparasi ee'noko Sairini-nupoong-koo teketa mmariaama Antioko' berora teke sira'pau' tee kara Ovoring Jiisuu'koong oovuning-koo Kiriki'navitu-koo. 21Ovoringe teing aa'na' pakuvuriko'. Ee'noko karingai nantoonge masika'antavaarima Ovoring-aape bere'ariko'. 22Teketa teinge dootuu'nupoonge Jerusalema' otoroko'ninge taaravaara Banabasi Antioko'aape botoau'. 23Bera Banabasi te' basiarara Kumponing bakaang piaa teing-koo oovura dotuaru', ee'noko tautauvuru' teing ookara tee' nari' kake'iiariri otoromaatoo'naang, Ovoring-koo pinka'ariri, avutevu'aria'. 24Ai' tee tee naning tampara, Tanuaang Meekunge ee'noko baitoi maanto'ke. Ee'noko teketa pankavitu bere'arira tapo'ariru' Ovoring-koo. 25Tee'koo Banabasi napo' Taasus-aape beu' Soolo besi'uma. 26Ee'noko oovura Antioko'aape toroaretu'. Ee'noko namare'koo ookutunamare'koo teing mmau' dootuu'nupoong teke otoroko'ning nau-antavaarema nari' otorou'. Bera teka ee'noo'ka Antioko'navuntu'koo tutuna' teing Karistoo' siompaako'ning Kiristiani' tampaaru'. 27Enang tee tee batei-koo nii'ning nakaro-nupoong Kumponing bakaning Jerusalema'keta depeto porou' Antioko'aape. 28Ee'noko narung teing-koong miring Akabas deto donkonura peera pankaing ookutunung kansi'koo dama'ke tavo'aravaing sira'puu' Tanuaang Meekunge nauvuio'. Tee aung tee tavo'aru'nung dama'ke tenang ovo'ma' miring Kalaudias otoko'nang. 29Ee'noko teinge Karistoo' sionukai tee' taaravaara teing bii'maikorori' Judia'nupoong pakuaarii'naang ee' matauau': ookarai mooni' bii'ka makosina' naro' oosiaavai teing paku-koo. 30Bera oosiaara Banabasi ee'noko Soolo botoaaresio' Jerusalema' Karistoo'koonavitu-koo urantanuka-anko tavo'uretu'.

will be added

X\