Acts 10

1Teke Sisaria'namono-koo tee narung naning otoko' miring Koniliasi, narung daaku' piatooro~ tanatavuriko'nung, Itali-nameensi'nupoong tampaariko'ning. 2Koniliasi tee naning dootuu'koo tampara, Kumponing-koo amaiaa'oi mee'du'piari otoko' bakanava-kooning ninka nari'. Ee'noko Ju'nupoong ata'oi'nuka mmau' mooni' avurima pakuvuriko'. Tee ee'nung kunsi bauko Kumponing-koo. 3Nii'na'mung kamunoo'aapevuko Kumponinge nii'naung~koo bere'antavuio' koosinung sira'pari poio' oovuu' Kumponing bakaang. Pora aa'puu' tee, “Koniliasi ee.” 4Ee'noko teie tee oovui avoro'ke korivuma aa'puu', “Arekee', Ovoring?” Ee'noko teie aa'puu', “Dakaang kunsi ee'noko dakaang avuavu' Kumponing-anko tavo'kuio' tasi'deruing. 5Enang nantoong Joopa'aape botoveriai ee'noko narung Saimoni' nii'noo' miring Piita bokuaavai teka. 6Nii'nung Saimoni' ninka nari' otoreng, dopa' kau'karenaumo-koong takera'umaung ninka. Bakaang pava pirung due'ke otong.” 7Tenang tee koosinung tee kara nauvuu'nung tenkenuko teie kenaanka bakanaanka bautarara bokuvuretu' ee'noko narung piatooronuka-koong Kumponing-koo mee'du'piari otoko'nung teke nempariri otoroko'ning-koong. 8Ee'noko ookara kapoo'nanka nauvurira Joopa'aape botovuru' teing. 9Teketa dauna'mung duaaki'nang teing nanaama te' due' basiariko osi pankamono-koo Piita daunavaro-koo pava-koo koinuu' teke kunsiaraa'naang. 10- 11Ee'noko teke aa'na' peeravora kapoo' nai-koo piavoko'. Teke nii'ning iapavariko tee nii'naung-koo bere'arara paning daate'ario' oovuu', bera kapoo' baarong pankaing-pina' sivere'ari depeto kansi'koo siaru' karenaumo kunku'doi'koo bi'ari. 12Tenaa'koo kuunge amutemurii' kau' karenaumonanka, boru'nanka ee'noko barennanka auvi'au-kooning otoroko. 13Teketa aurong ee' taaravuu', “Piita, deto donkonira tavera maa'eai.” 14Teka Piitai aa'puu', “A, Ovoring, ninge temu'keta koonto' aing kapoo' ee' oro' maa'ampaung, ai' aing teing ku'mi'po'ning orokoari otong nii'koo Ju'nupoong-koo.” 15Ee'noko aurong napo' karou' kemu'kana' aa'puma, “Aming kapoo' Kumponinge kiiroraa'antavuing dake kapoo' ku'mi'po'nung tampema poore'eauka'.” 16Asi'na'moo beemu'pina' nkoario' tee baarong napo' da'deng paning-aape deto nkavuu'. 17Enang tee Piitai nii'naung-koo bere'arara kapoo' oovuu'nung-koong miru'noo' besi'uma norunoru'uko teing nantoong Koniliasie botovurio' porou'ning teke nia'kaakotaa' Saimoni' bakanava'koo karanaang-koo due' donkonai otoroko'. 18Ee'noko bokiaama aa'pau', “Tee ee Saimoni', nii'noo' miring Piita, anke otomang?” 19Piitai tee mme' tee nii'naung-koo bere'ararara oovuu'nung-koong miru' nooruupivuko Tanuaang Meekunge aa'puu', “Ee aung, nantoong beenaumoi da' besi'daamang. 20Donkonira doonko sirarara teing ninka nari' beriai tokoona' noru'ea', ai' teing teing ninge botoaransining.” 21Ee'noko Piita doonko siaru' teing-anko ee'noko aa'puu', “Ning ee'nara aung dii'ke besi'merimatomaung. Aming kapoo'koo porininge?” 22Ee'noko teinge aa'pau', “Koniliasi, tee daaku' piatooro tanatavurimaung, tee naning koonto' ee'noko Kumponing-koo aa'na' amaiaa'oi otomaung ee'noko tee ookarai Ju'nupoonge tampara tampaamaung, narunge meekunge koosinunge botovuio' da'anko botoaring da' bakanava-koo bee'naang ee'noko taaravuu'naang kapoo' dake minkuveaining.” 23Tee' taaravura tee teie kuung bokuvurira na'mung muung teke aasiau'. Teketa dauna'mung tee daa'arara teing ninka nari' berou', ee'noko nii'ning baito-nupoong Joopa'keta nari' siompau'. 24Ee'noko keina'mung Sisaria' basiariru', Koniliasie nempuri otoko ookara ba'marang ee'noko ba'maikori' naro' naro'urira. 25Tenang Piita tumparako Koniliasie kune'ura kau'kanoo'ke miinge keemparara pankaing-antavuu' tee. 26Teka Piitai deto i'ampuma aa'puu', “Donkoniai, ning tee naning, da'pina' oro'.” 27Ee'noko nari' karorema kuung basiarema nantoong karika' oovuru' teke naro'ariri otoroko. 28Ee'noko aa'puru' teie teing, “Dii'ke tee noru'eri otong Ju'nupoong niikaang botoi taura'muria' nii' oovunavitu ninka nari' navu-koo nii'noo' beero'koo, teka Kumponinge tero naumuieeng ninge baa naning tamunsi'nung nii'noo' ku'mi'po'nung tampamparoo'naang. 29Tee'koo ning-koo botoraririo' ning tee aung moing kupi'moa'. Enang nia'damaang ninge da': Aming-koo ning-koo botorarieenge?” 30Ee'noko Koniliasie aa'puu', “Karenang doong tankinuieening-koo duaa' enang-pina' basiarako batei kamunoo'nang-koong kunsi siompansi kunsimarako anke nkanava-koo ta'nina' naning narung ning-koo uro'kanoo' donkonuu' mononopa' sisisiisi kurumpari. 31Teie aa'muu'nung, ‘Koniliasi, Kumponinge dakaang kunsi taarareruing ee'noko dakaang avuavu'nanka ata'oinku-koo nkovemaung noru'deruieenge. 32Tee'koo aa'damaang: Joopa'aape Saimoni'anko, nii'noo' miring Piita tampaakoo', botoraravai. Nii'nung Saimoni' bakanava-koo otomatoing pirung-koo due', tee dopa'nanka kau'karenaumo-koong takera'umaung.’ 33Tee'koo da'anko iri'narung botomaru', ee'noko tampa' tampamang da' aa' poing-koo. Tee'koo nii' ookara anke naro'mariring Kumponing-koo uro'kanoo' teing kapoo' Ovoringe botoruining naumeriko taaravampii'naang.” 34- 35Ee'noko Piitai daankinang tutumpuma aa'puu', “Masika' enang tampa' tasi'pansi otong Kumponinge tee nantoong tankaampuriaung, teka nantoong paninga boonameng-koo-nupoong Kumponing mee'du'piai koonto' otoromainge tee Kumponing dotu-antavaamaung. 36Aung tee kara Kumponinge Isireeli ba'dompenku-anko botovuu', tee doorenang tampara ee' minkuvui otoing: Jiisuu' tee naning Kumponinge tero Pako'pari'uu'nung nii' ookara domamuri taremuriainoo'koo, ee'noko tee'koo Jiisuu' ookara-koo naro'ka Ovoring deempari otong, ee'noko tee-koo kuunge mooa-koo o'noriaing. 37Dii'ke tee noru'eri otong tee minkunaa beremparu'nung ootukunairu-koo Judia'ke Kaaleli'keta tutumparara tenang Jooni Minkinarai daankivuko'noo'keta dama'ke. 38Tenaare anaare: Kumponinge Jiisuu' Nasareti'nung Tanuaang Meekung ninka iri'antavuma pako'pari'uu'. Teketa nantoong tampa' nkovurima avitoitoi nanuko' teing Sietani'ke korivuriko'ning unaa-antavurima, ai' tee tee Kumponing ninka nari' otoreko'nung. 39Nka nii' teing, ookara kapoo'nanka sira'nuka teie nkovuko'ning teke Ju'nupoong biikanoo'ke, nka baru'noo' Jerusalema'ke, ee'noko teinge teka dupisi'au'na' koi'koo bi'aara. 40Teka Kumponinge beenang doong tankinuio' tee bou'noo'keta daa'ura sira'puu'. 41Ookara nantoong-koo tee oro'parava', teka Kumponinge nii' bakaning sira' nkonuka miru'muritaa' nii'ankoi oro'antavuu' ee'noko nari' taamang tovang ntong naiampiko' boo'keta daa'arara. 42Ee'noko teie nii'ke ooampiru'na' nau-antavarampii'naang botomuru' ookara nantoong daankiarampima tee Jiisuu' tee Kumponinge pako'pari'uu'nung boo'nuka ee'noko domantoo'nuka simpe'koo. 43Ookara urikupoong nakaro-nupoong Kumponing-etainge ee' nari' sira'pau'nung: ‘Ookara nantoong tee masika'antavaavaining tonta'anta kompaavaing tee bakaang miring-koo kuunge.’” 44Tenang Piita tee' minkuari otoko Tanuaang Meekung tee teing-koo ookara-koo tee kara taaravau'ning-koo pou'. 45Ee'noko teing Ju'nupoong Karistoo' masika'antavaako'ning nari' Piita ninka porou'ning bakei ta'ninau'nung, aming-koo, nna' Tanuaang Meekung teing-koo piampario' bane Ju'deeainge. 46Ai' teinge tee oovuning karai kareaama Kumponing daangampaako taaravaaru'. Teketa Piitai siraka'antavuma aa'puu', 47“Baie orokovuripeu' aing ntong-koo minkie meeka'anta-koo? Ai' aing teing Tanuaang Meekung nkavaining nii'pina' nari'.” 48Ee'noko teie botovuru'nung ntong-koo minkiarira meeka'antavarii'naang Jiisuu' Karistoo' bakaang miring-koo. Teketa teinge Piita dateau' nii'ning doong nari' otoroo'naang tampaama.

will be added

X\