Acts 1

1Aung ee, Teopilasi', Tutuna'nane'koo daarireroma tee ookara kapoo'nanka-koo minku-antarantu'nung Jiisuu'ke nkovuko'ning ee'noko nau-antavuriko'ning tutuntoma-ita bera deto paning-aape intamparu'noo'ke basi. 2Mme' intamparava' teie bakaning kara okovuri nka-koo miru'uru'ning boto avuru' Tanuaang Meekung-koo kuunge. 3Teing-koo mmau'namu'pie oro'paru' domamparu'na'koo taa'ni'antavari, mmau' kapoo'nanka tasi'anta ninka, noru' keekoo'ariaroo'naang. Ee'noko boo'paru'noo'keta karenaumo kivora doong tee' otoi Kumponing bakaang muu' nau-antavuru'. 4Ee'noko tenang teing ninka taamanaama otoroi teie orokovuru' Jerusalema'keta tenkenaavaroo'naang, teka nempaava'naang tampuu' tee avuavu' teing-koo Baumai maraka-antavuru'nung, ee' oro', “Aung tee tero naurampiru'nung aa'pama: 5Jooni Minkinarai tee ntong-koo minkirurima meeka'antaruriko', teka mmau' doong tankinuaruko dii' teing Tanuaang Meekung ninka meeka'antarariaining.” 6Bera teinge tee naro' porora ee' nia'au', “Ovoring, dake ee enang donkompee'naang tee Isireeli tero donkompuu'na'?” 7Ee'noko teie aa'puru' teing, “Tee kapoo' dii'ke noru'koong deea'; tee bateinananka Mma'ke baka bakaang, bakaange iri'ke pinka'uru'nanka. 8Teka dii'ke tee iri' nkaveriaing tenang Tanuaang Meekung dii'koo dau poko, ee'noko dii' teing nkaning ning sira'meriaining anke Jerusalema'ke, ee'noko ookutunairu Judia' nameensi'koo ee'noko Sameria' ee'noko bera kansi' oparavainoo'ke basi.” 9Ee'noko tee' minkuvura ooai otoko intamparu' tee Jiisuu', bera kamo'navu'ke nopa'ura paa'antavuu' teing-koo duta-ita. 10Ee'noko tenang paning-aape ankampariri otoroko, tee beko, ta'nina' kenaanka donkaanira mononopa' kakaarai nopa'nii'ka donkonuretu' te' teing-anko. 11Ee'noko aa'puretu', “Dii' donkaang Kaaleli'nupoong, aming-koo tee' donkoniri paning-aape ooveri otomang? Tee tee Jiisuu' deto intamparing paning-aape dii'ankoita tee, tee' nari' otoi poaing ooverio' paning-aape beina'.” 12Teketa Olive'po'namii-eta toroariru' teing Jerusalema'aape. Due' te' Jerusalema' teketa. 13Ee'noko osi duparira deto daukava-koo koinau' te' otoroko'noo' aa'ning: Piita, Jooni, Jeemisi, Aanduru', Pilipi', Toomasi, Baatolomiu', Maatiu', Jeemisi tee Alopeasi bauring, Saimoni' Sieloti', ee'noko Judasi Jeemisi bauring. 14Aing teing nari' otoroi kunsi-koo bii'ka avariko'ning, napo' nari' teing manii', Meeri' Jiisuu' bauko ninka nari', ee'noko teing Jiisuu' baara'mainkaang. 15Teketa nii'ning doong tankinuko teing Jiisuu' bakaning barevare-nupoong oosiarira Piita meu' donkonuu' teing-koo, deerunoo' narung daaku'keta kenai'ka-pina' otoroi. 16Ee'noko aa'puu', “Mmaikori' ee, tee Daari Meekunge minkuvuu'nung kara tee bakei dupenumpo' tee Tanuaang Meekunge urikamu' sira'puu'nung Deevita' karantavuma~ mme' nkoaravaruko, aa'naare Judasi minkuari otong tee ee'nara Jiisuu' dai'au'ning barampuri pou'nung. 17Tee tee nii' ninka deerunii', Ovoringe nii' ninka nari' mintoomarii'naang miru'muru'nung.” 18Tee aa' tee Judasie kansi'nameensi' moo'uu'nung teinge mooni'ninge bakaang oraka' nko-koo moo'au'ninge, ee'noko teke bore'ke uroi dua'arara tompoo'kura mintung taapo' bakoaru'. 19Ookara Jerusalema'nupoonge tee noru'au'nung tee, ee'noko tevora' kansi'navora' Akeldama tampau', miru'noo' Tookanavora'. 20Ee'noko Piitai napo' karoma aa'puu', “Tee aung naning tee Daari Meekung-koong Kena-koo ee' minkuari otong, ‘Bakanavaro tee doonavaravaing ee'noko naning te' otoauka'.’ Ee'noko ‘Nii'nunge bakanoo' tareroma pari'antavuaing.’ 21Tee'koo, Daari Meekunge tee' minkuvuio' naning Judasi paari-antanung miring tampampiaing tee Ovoring Jiisuu' boo'keta daa'aru'na'koong kara sira'puaing nii' ninka nari'. Nii' Jiisuu' ninka nari' o'norimaing-pina' masika' oro' miru'ampiaing. 22Tee Jiisuu' ookara batei-koo nanuu'na' siompuko'nung Joonie minkivura meeka'antavuu'noo'keta bera nii'ankoita deto koinuu'noo'ke basi.” 23Ee'noko teinge kenaanka makosira tampaaretu' aa'noko Josepa', nii'noo' Basabas Jaastas ee'noko Mataias. 24- 25Ee'noko kunsiarima aa'pau', “Ovoring ee, dake nantoong-koong domang noru'ei otomaunge naumeriaing arera narung anaanka-koo kenaankara-koo dake miru'ei otoing amurii' nko-nko nko-koo Judasi pari'antavuaing, oovuna' bere'arara bakanamenge oramenge boo'pari beu'nung.” 26Ee'noko tee' minkuaara siikiitaakii' nkoaako Mataias miring tavo'kuu'. Ee'noko teketa tee tee teing ninka nanai'keta narung kara okovuri nkanuka ninka nari' deeruau'.

will be added

X\