3 John 1

1Aung ane' karavoto~ ninge dootuu'koo urantai daarireromaang da' mmaiko' Kaiasi, ninge aa'na' masika' piaaramaung. 2Ee mmaiko', kunsimaramaung ning teing ookara kapoo'nanka dake nkovemaing tampa' nkovemaatoo'naang ee'noko da' tampa' domantari otoai, da' tee' Tanuaang-aapei tampa' otomana'. 3Ning bakei aa'na' dotumaru'nung tenang nii'ning nii'maikorori' poroma naumaama minkuraako tee dake kara masikung tampa' siompemaung temu'keta siompemana' nari'. 4Tenang ninge taaravama, nkaning toire'ke tee kara masikung tampa' siompaamaung-koo ning tee bakei aa'na' dotumaramaung dau basinoo'. 5Ee mmaiko', dake bakei tampa' nari' nkovemaung tenang dake teing nii'ning Karistoo'koonavitu pakuerima, baru'noo' teing damisimainku tampara doorenang osi kanteai berempaamaing dake pakuerimaung-koo. 6Teinge tee dakaang piaa teing piaaverimaung tee sira'pau' ookara Karistoo' bakanavitu-koo anke o'norimaing-koo. Teka tenang temurii' nantoong dii'ankoita tenkenaako nii'noo'ke daankiarii'naang, tenang napo' dake pakueriai nanu'koo Kumponing dotuaravaina'. 7Ai' teing teing osi sipau'nung Karistoo'koong miring berempaava'naang mutaanang-nupoong-eta paku piavoroa'. 8Ee'noko nii'ke teing ee'ning tee' oro'nuka nantoong pakuarampiaing teing ninka nari' pakumeeriaina' tee kara masikung nau-anta-koo. 9Ninge tee karavotonane' temu' daariantu'nung nii'ning kara minkuama dii' Karistoo' bakanavitu teke otorimaing-koo. Teka tee naning Dioterepisi tevitu-koo baka pankaing-koo piavomaunge teing-koo, tee nkaang kara minkuantu'nung taaramuaruu'. 10Tee'koo ning dii'anko meaing deeko' mera tee sira'pampaing tee temurii' aarumo teie nkovumaung nii' oraka' minkumurima daang-koong tuumpimurima. Ee'noko tee narung deea', nii'nung tee teie teing nii'maikorori' daankiaama nanaamaing diikanoo' basiariko bakanava-koo bokuvuriaung, ee'noko dii' dootuu'nupoong-koo nii'ning orokovurikoo' teing damisimainku pava-koo kuung boku-koo piavoroko, ee'noko orokovurima kato bata'urikoo' Karistoo'navitu-eta. 11Ee mmaiko', Kaiasi, naning oraka' nkoarako tee bakaang aarumo siong-koo paaraveauka', tampa' nkoarako deeko' siong-koo paaraveai. Baa tee naning kapoo' tampara nkovumaung tee tee naning Kumponing-etaing ee'noko baa tee naning orara aarumo nkovumaung tee Kumponing tasi'pua'. 12Ookarai nantoonge tee Demitereasi tee tampa' minkuaamaung ee'noko Ovoring bakaang kara masikung siompuko nari' sira'paramaung. Napo' nii'ke tee' nari' minkuampimaunge ee'noko tee dake noru'ei otong tee nii' niikaang kara tee masikung. 13Ning tee kapoo'nanka mmau' oto'memung da' daarirerompeu'ning, teka ninge teing ookara ane'koo daari-koo piamoa'. 14Teka ee' noru'amaang, ning pa due'ka da'anko moo'naang, ee'noko nari' oing oomeeresi karompeaing. 15Mooa tee da'koo otoaing. Ainge da'maikori'ke tampara tampaamaang da'koo. Dake napo' tee' tampara tampema naueriai teing ookara mmaikori' miring tamperima. Basi te'.

will be added

X\