2 Timothy 4

1Kumponinge oomuresio' ee'noko Jiisuu' Karistoo'ke, teie ookara nantoong simpe'uriainge, domantoo'nuka ee'noko boorou'ning, ninge ee' botoramaang da', noru'ampiritaa' Karistoo' tee napo' ovorimpari oro'paravaing: 2Iri'antavei sira'peaing tee kara ootukunung batei-koo, oranang ee'noko tampanang. Aroo'antaveriai, tautaueriai ee'noko tampa' mantomperitaa' nau-antaveriai. 3Tee' nari' bointui uaaroauka' ee' noru'ei: Bateinang tee due'umaang nantoong kontekontevoroainoo' kara masikung taara-koo. Nii'namurii' kara taara-koo tarii'oroma mmau' kara-naunuka bokuaarii'naang teing ninka nari' karaa'eemaing. 4Tee'koo kara masikung-eta akovetei bere'arii'naang ee'noko pooarii'naang kumponaananka-koo bi'ariri. 5Nka tee da' pinka'dari otoaing, baike noru'eauka', kara nkavei nanu'koo purintaravai, tampa' dupeveai dakaang nko-nko pakupaku-koong, ninge nkaang dupeansina'. 6Ai' ninge dupeamira tee makosi tamaavaing due'ka, nka tee Ovoring-koo pareka-pina' noru'mari otong. Tee doong ning tenkenampaina'mung due'umaang. 7Ning piikonung deeko' orara aarumo ninka tameerema puru'muaru'. Deikoo'koo kua'maru'nung-pina' iri'moi tampa' botu basimaring, kara masikung masika'antavampimaung pinka'ansi. 8Enang-eta deto nkaang moo' nerang-koong tee maamuari otomatoaing, ee'noko tee taa'ni'anta Kumponinge koonto'nuka tammurimaing-koong. Tee ee'nara tee teie Ovoringe koonto'ke bire'urimaunge kong-antamuainung te'mung ee'na'mung makosina'mung, ee'noko ning narung deea', teka napo' tee avuriaing teing ookara karaa'ai ooaava'naang nempaamaing. 9Paaraveaing ning-anko po'koo da'deng. 10Aming-koo, nna' Deemasie tee aung kapoo'nanka kansi'koong aa'na' karaa'ura si'muieeng; si'murai'nang Tesalonaika' beieenung. Napo' Keresen Kalesia-nameensi'aape beiee; Taitas napo' Damesia-nameensi'aape beiee; 11Tikikas Epeses-aape botoansinung; Luuke' narung ni'ninka o'noreng; 12Tee'koo Maaka' bokuera da'ninka poreai; tee ee'nara nkaang pakupaku tampara. 13Mononopa' nkavei poai nkaang, Kaapas-anko sipantu' Toroasi-navuntu'ka, ee'noko buukunanka, nka baru'noo' teing ivekeng boromaka'koong dopa'kooning. 14Aleksanda'ke, teie koopa' ta'nampumaunge, orari-antamuu'. Ovoringe maku'evuaing tee bakaang nko-nko orara-koong. 15Nka tee-koo da' tareraravaing, ai' teie aa'na' too'devumang niikaang minkunaa kara simpe'nupoong~ anko. 16Tero tuumpimaako tutuna'nang kara dimpa'anko naninge pakumua' ning. Ookarai si'mau'. Oraka' nkomau'na'koo Kumponinge piaavuri tonta'evuriaing ninge tonta'evoronsina'. 17Nka bane si'maio' Ovoring tee ning-koo due' otou', ee'noko puring-antamuu' tampa' sira'pama'naang tee kara ookara, ootukununge avotevora'nupoonge taaravaava'naang. Tee'koo domamuu' tee-pina' laioni-koo karang-eta pasi'mupeu'nung-pina'. 18Ovoringe tee ning moo'muaing teieta ootukunung orarananka-ita, ning tampa' domang-antamuaina' paning-koo o'noo'naang teie tarevumanoo'. Bakaang meenasi tee' nari' otoaing ootukunung doong-koo. Ee, tee' nari'. 19Tampa' tamperiaing Pirisika'daring-koo ee'noko Akuila ba'ung, ee'noko Onesiporas bakanava-kooning. 20Irasitas Koorin-navuntu' otoko sipantu'. Ee'noko Toropimas siipavoko Mailitas-navuntu'ka sipantu'. 21Paaraveaing ning-anko po'koo da'deng narung, doving orara bakaang batei tavo'kuma avo'du'neeng. Iubiulas dovange Piudenis, Lainas ee'noko Kolodia ee'noko ookara niira'mainkaange tampara tampaing da'koo. 22Tee Ovoring Jiisuu' Karistoo' dakaang tanuaang ninka otoremaatoaing. Tee biraanke tee da'koo otomatoaing. Masikung.

will be added

X\