2 Timothy 3

1Nka enang tasi'peai aung: Doong asiraning-koo tavo'kuaing batei arikananka. 2A'noo' ee' oro'nanka otoroaing: nantoong bii'ka piaavarimaing, mooni' piaavaamaing, bii'ka daangamparimaing, daang pankaing-pina' noru'nanka, kara oreng minkunuka, taarapii-kananka biumaraang-koo, kapoo'koo tampara minkuaavaing, meeka'pariaing, 3nantoong baa'pina' noru'aarimaing, pinau noru'aavaing, miring orari-antananka, tooreerenuka, irinsianuka, tampara aarumo tavaamaing, 4too'de-nupoong, tutung tampara noru' uraantavaavaing, kirokainuka-pina' noru'arimaing, bii'ka tampa' dee'anta-koo nari' piavoroma Kumponing tampa' dee'anta-koo piavoroaing, tang dootuu'arimaing nka Kumponing daang-antavaakoo'; 5Temurii' nantoong-eta tonta'dari otoaing. 6Teing-koo nii'nariong tee pavanankai tamung koinaamaung maniku' aruaru'nanka biikaang kara-koo bi'antavaarii'naang, maniku' orara aarumo ninka manki'oromaing, noru' avitoitoi eearimaing kapoo'nanka amutemurii' karaa'aama. 7Bane arera naning arekee' oro' poko tee taaravaapeu', nka tasi'paavarupeu' kapoo' masikung. 8Tero tee Janis naankai Jampiris turampureko' tee Moosesi, ee'noko tee' nari' teinge too'dempaamaung ookara kapoo' masikananka. Teing donkaang tunsi dera'nukai ee'noko baito tosiro'koong oto'evoroining. 9Ee'noko Janis naanka Jampiris namu'ke dua'aretu'na' tee' nari' napo' teing tamung apupo' basiarira dua'ariaing nantoong ookarai ooaario'. 10Enang tee dake ning noru'meing ape': kara nauaranko'na', nkomaramana', nkaang domang to'bii-antamaramana', nkaang masika'anta, kapuumari o'nomana', nkaang piaa, e'manansi o'nomana', arikananka kune'amana', sisikeera kune'amana', napo' oraka' nkomau'na' teka Antioki'ka ee'noko napo' Aikoniami'ka ee'noko Liisira'ka, aremuriau turanturang e'manansi tora'pantu'na'; 11Ee'noko noru'ei otong ookara teing-eta Ovoringe moo'muu' domamuu'naang. 12Tee' nari' masika' ookara Kumponinge marovurimana' oto'koo piavoromaing nantoonge oraka'nko kune'aavaing, teing Jiisuu' Karistoo'koo otoromaing. 13Tenang ee'nang oreng nantoong daang Kumponinge botonisinuka tamparimaing aa'na' baru'noo' oraru'kiaavaing nantoong tosiaarima ee'noko bii'ka tositosi masika'antavaama. 14Teka dake siompeaing tee kapoo' da' bareraru'nung ee'noko iveka'doi masika'antaveu'nung. Dake nii' tampa' noru'meri otong kara naurampiru'ning. 15Ee'noko da' tooto'noo'keta noru'eu' Dariraari Meekananka teing da' tampa' nau-anta-kooning noru'antarupeu'ning Jiisuu' Karistoo'ke domantuaina' baitorarako. 16Ootukunung Daari Meekung Kumponinge amuru'nung, Kumponinge uaampuriko daariau'nung, ee'noko tee makosi nau-anta-koo, orara aarumo tasi'anta-koo, domang koong-anta-koo, ee'noko tampara aarumo siong-koo kake'iiari. 17Kumponinge tee' karantavuriko' aa'noo'naang: Bakaning meekupoong makosininge maanto'antavarira amutemurii' nko-nko tamparananka tavo'antavaava'naang.

will be added

X\