2 Timothy 1

1Ninge Paula'ke aung karavoto~ daariamang, Jiisuu' Karistoo'koong kara-okomui-nkai Kumponinge maromuu'na' nantoong nauarama'naang maraka-antamuru'na' bakaang domaang amurii'naang Jiisuu' Karistoo'koo kuung o'noriko. 2Da'anko, Timoti-anko daariamang, da' nnuring-pina' piaaramaung-anko. Biraanke ee'noko mooa da'koo otoaing Kumponing Neuma-itaing ee'noko teieta Ovoring Jiisuu' Karistoo'. 3Ninge kunsimarama amutemu'koo noru'dama Kumponing-koo tampara tampamaung, tee ee'nara tampa' domange noru'marama ninge mintoompevomaung, tee' mmataraange nkoau'na'. 4Bakei napo' aa'na' da' oo-koo piamomaung, ooramira dei tampa' dee'mopeu', ai' ninge tee norunoru'amaung dakaang ta'du tuuruu'nung tenang si'meeretu'nang. 5Napo' noru'dankoo' da' koonto' baitorarako'na', tee ee'namurii' baito teni daite Lois oto'evuko' ee'noko teni dauko Iunes. Enang tasi'pansi o'nong da'koo ee'nung-koo otong tee temurii' baito. 6Tee'koo enang ninge noru'antaramaang maia' sipei dakaang nko-nko aa'na' nkoveaing tee avuavu' Kumponinge aruu'nung kompei, ee'narai aruu'nung te'mung ninge tanka' pante'dantu'na'mung. 7Ai' Kumponinge tee tanuaang avorompe'koong amuria', teka tee tanuaang purinto'koong amuru'nung, piaa-koong ee'noko toomoosiari oto'koong. 8Tee tee maia'doauka'nung niikaang Ovoring sira'koo; ning-koo tee', bane ning bakaang dai'nisi o'noko. Makosi Kumponinge tee' nari' puring-antamureko da' tee' nari' ni'ninka sisikeera kompampeainge tee tampara doorenang-koo. 9Teie ee'narai domamuru' ee'noko bokumuru' meeka'mariri oto'koo, kapoo' tampara nkoampiru'nung-koo deea', teka tamung biraankemurii'naang baka marovuu'nung-koo. Tero aung kansi' mme' nkoaravaruko-ita Kumponinge biraankemurii'naang bamuru' tee-koo Jiisuu' Karistoo'koo. 10Ee'noko enang tee biraankemuriaina' sira'puing Jiisuu' Karistoo' niikaang domang-anta oro'antavura. Teie ee'narai boo' bakaang iri' opurai'nange boo' puru'navung ee'noko domaang nkanavung taung siraka'antamemuring tee doorenang tampara dooremurima. 11Ee'noko teie napo' ning aung ee'nara doorenang tampara berempama'naang bamuu', ning kara-daanki, kara-okomui-nka ee'noko kara-nau deeng-antamui. 12Tee'koo bamuu'na' tampa' nkomaramaung-koo ninge sisikeera kune'amaang. Nka tee maia'moaung, ai' bakei tampa' noru'ansi o'nong tee naning ninge masika'antavamaung, ee'noko napo' tampa' noru'ansi otong tee tee makosi ookaanka tare-koo bera doong asirana'mung, aa'ning: teing manki'nanka avontu'ning ee'noko napo' tee manki' ee'narai ning bamui amuu', tampara kara nau-anta-koo. 13Enang dake tee tee kara nau-antavaramana' paaravei nari' nau-antaveriai, ee'noko Jiisuu' Karistoo'koo kuung otomatoai ee'nara masika'antavema ee'noko nantoong piaaverima. 14Tareveaing tee kara masikung tee Tanuaang Meekunge nii'koo otomatomaunge masika'antaruma aruu'nung. 15Dake noru'ei otong teing teing ookara Eesia-nameensi'nupoong ning-eta mmariau'ning. Teing-koo nii'nung Pisilas ee'noko nii'nung Emosenis. 16Kumponinge piaavuriaing Onesiporas bakanava-kooning, teie amutemu'pie boira-antamuko' ning. 17Tee tee maia'oa' ning io'mai dai'mario', teka tenang Rooma' porai'nange teie bakei aa'na' ning oo-koo piavora besi'mura pe'numuu'. 18Ovoringe kong-antavuaing tee piaa bakaang te'mung doong asi'na'mung. Dake tampa' noru'ei otong avutevu'ari tampa' pakumuu'na' Epeses-namono-koo.

will be added

X\