2 Peter 2

1Teka nii'ning nakaro-nupoong daang Kumponing-etaining tamparima daa'ariko' Ju'nupoong-koo meu'ke, ee'noko napo' tee' nari' daang-koonanka nau-antanuka daa'ariainge dii'koo meu'ke. Tee' nkoarima nantoong makenge orari-antavaariaing biikaning noru'keta daang nau-antavaarima, biikaang Ovoring teing moo'uru'nung sipai. Tee'koo bii'ka namu'ke orari-anta kune'aavaing. 2A'noo' tee mmau'ke siompaariaing biikaang aarumo amutemurii' maimaia'nanka-po'nung. Teketa' teing tee' nkoariko tevung Karistoo'nung kara masikung sionavung nii'ninge oraka' minkuaavaing. 3Ee'noko tee' nkoarima mooni' barang-koo okovuriai kara menaankavarima. Nka tee teie Simpe'nkoi~ tuutunang~ miru'evuru'nung nempari otong. Teing orari-antavuriainge keeroorovuri otong. 4Nii'ke noru'ampiri otong tee' nkoaravainoo' aa'nung-koo: Nii'ning koosinunanka oraka' nkoariko tamung oovuriaruu', teka kansi'koo tumang dua'uru' isipo' masipo' mutaananoo' doonko teke dai'ariri otoroo'naang bera simpe'uriaina'mung-koo basi. 5Napo' urikavarang orara aarumo ninka nari' kansi' maanto'aako'ning tamung oovuriaruu', teka doua-koo minki-antavurira opuru', Nooa' narung deeko' aarumo koonto' daankivuko'nung domampuu', nii'ning nantoong ~kenaanka-taa ninka nari'. 6Napo' osi pankeng kevuntu'ka Sodom ee'noko Komora' sipung deeng-antavuretu' otorearoo'naang tampureta dama'navarange Kumponing siompaavauka'ninge nkovuriaina' ooaava'naang. 7Ee'noko teka napo' naning koonto', Loote', domang-antavuu', tee ee'nara oraka' dee'oko'nung teing oreng Sodom-nupoong maimaia'na' nkoariko. 8Tee ee'nara naning koonto' deempari domang manki'oko'nung teing tee ninka otoroko'ning boto-koo kuung otoroa'pina' noru'ai nkoariko'ning ninka doong kante oovurima ee'noko teing-koo taaravuma. 9Tee' nkovuru'na'koo tee sira'pari otong tee Ovoring noru'kui otong nantoong tee siompaamaing parapaara arikung-eta domang-antana'koo ee'noko napo' teing siompaavauka'ning kiimatavurii'naang pinka'uri oto'na'koo bera te'mung simpe'uriaina'mung-koo basi. 10Deepo' masipo' bakei kiimatavuriaing teing nau-antanuka daang Kumponing-etaining tamparimaing. Mono bakaang pia orara dera' siompaamaing Ovoring tompimpai. 11Aing amurii' nantoong derareranuka, bore' kapanuka, anutua avoreaava' avutevu'ari dauraronanka oraka' minkuaarimaing, teka teing ookara noru'po'nupoong, bane koosinunanka deeko', tee' nkoariaung. Bane teing koosinunanka nantoong-koo dau basina' iri' ee'noko iirakutapo'nupoonge oraka' minkuaarima tuumpiaariaung biikaning kare-nupoong Ovoring-koo uro'kanoo'ke. 12Teka aing tosi nkonuka kau' karenaumonanka-pina' oro'nuka, noru' papaaravari oto'nuka, matauropanuka, tamung doonko tavu'koo makosinanka-pina' oro'nuka. Noru'aava' poore' nkoaamaing. Biikaang dera'ke boo'antavuriko kera'pariaining. 13Tee tee ee'nara biikaang moo' orara oraka' nkoariko'nung-koo, aa'noma: doong ookutuna'mung maia'oroa' tamung sirakura' mono bakaang pia orara siong-koo kei'orokoo'. Teing teing dii' ninka nari' otori diikaang miring orari-antaraarimaung ee'noko diikaang navunavu daang deeng-antavaakoo'. Dii' ninka nari' Ovoring bakaang taamang naierima aavaraarikoo' moru-pina' noru'ai. 14Biikaang duta tee karakaraa'ke maanto'nuka maniku'koo, orara aarumo besi'ui oto'nuka, aruaru'nuka da'deng dua'antavaarimaing, ee'noko biikaang domang aarumo oko'oko-koo bareari oto'nukai. Kumponinge barakosi'nii'nuka teing. 15Koonto'navung sipaara pooariru'ning. Tee nakaronara Baalamu, Beeoo bauring, bakanavung siompaamaing, mooni' nka-koo piavora oraka' nkoaru'nung. 16Teka tee bakaang doonkii'ke amakoi naning-pina' karoma orokovuu'nung danto nari' oraka' nkoara'neeng-koo, tee nakaronara bakaang aarumo kanukanu' potevui. 17Teing daang-koong nau-antanuka tee tee-pina' ntong dakau-pina' oro'nuka, ee'noko napo' tee kamo' dovinge avitoitoi nkavui nanumaung-pina' oro'nukai, Kumponinge mutaananoo' tumang masipo' miru'evuru'ning teke oto'koo. 18Ai' teing daang pankaing-antavarima buia'arimaing maimaia'na' nkoarima, ee'noko baanka' nempaama mono bakaang piai beana-antavaakoo' nii'ning nantoong teing-eta oraru'kiai otoromanavitu-eta koo'ariko bi'anta-koo. 19Opampaarima tuumpi-eta unaavoroi otoroaining tampaarimaung, teka teing bii'ka dera'antanameng-koo dai'ariri otoroi, ai' aming kapoo' tee naning kuung deempui otoing-koo, tee tee, tee-koo ee'nung-koo dai'ari otong. 20Ee'noko enang teing aa'na' dai'ariri otorong, io' teieta kansi' bakaang aarumo orara-ita mmariaara, tee niikaang Ovoring ee'noko Domang-anta Jiisuu' Karistoo' siompaakotaa', teketa napo' enang kuung dua'arira dai'aririnamu' oramu'. Tutuna'namu' divu'ui otong. 21Baru' tampa'na' deea' tee teing koonto'navung-koo noru'kaavarupeu'nung-koo, ee'noko bakei oraka' tutung noru'aara napo' bere'ariring-koo teieta doorenang aa'na' tampara, Karistoo'ketaing boto meekung tutung taaravau'nung-eta. 22Tee tee' teing-koo nkoaramaung tee niikaang mirumiru' tampui otoina', aa'pumana', “Mosi'ke tee napo' bakaang kurina'koo toroarama maa'umaung,” nii'na' ee', “Pooro' duu'paako napo' meto'koo novuuaramaung.”

will be added

X\