2 Peter 1

1Aung tee ane' karavoto~ ninge Saimoni' Piitai daariamang Jiisuu' Karistoo' bakaang botovotonaa'ke, ee'noko tee bakaang kara-okomui-nka ning. Dii' ee'ning daarirerompimang tee aung amurii' masika'anta nii'pina' nari' oto'derurining Jiisuu' Karistoo' bakaang aarumo koonto'koo kuunge oko-antamuru'nung, ee'nara niikaang Kumponing ee'noko Domang-anta. 2Tee biraanke ee'noko mooa dii'koo beremparavaing Kumponing tampa' kenkumperi otoriko ee'noko tee niikaang ovoring Jiisuu'. 3Ai' tee tee nii'ke tee tampa' kenkumpampiko teie tee teieta bakaang iri' pankaing-eta ookara kapoo'nanka makosina' amuriaing tampa' domamariri siompampiaing-koo. Ai' teie bakaang meenasi ee'noko bakaang tampara aarumo nii' ninka nari' oro'anta-koo bokumuru'. 4Ee'noko tee' nkomurima teing bakei pankeng avuavu'nanka moo'dopa amuru' tero maraka-antamuru'ning. Kansi' bakaang dera'keta mmarumpia'naang amuru', tero karaa'ampiko doomamuriko'nung-eta bera Kumponing-pina' nari' datamori o'noriai. 5Tee'koo ee'na'koo dii' aa'na' paararariaing diikaang masika'anta ninka tampa' oto'koo, ee'noko tee' tampa' otori Kumponing tampa' kenkumperi otoriaing. 6Ee'noko tee' noru'eritaa' diikaang mono bakaang pia daka'peri tanatarariai. Ee'noko teieta napo' tee' nari' nko-koo pinka'dariri otorimaatoai, ee'noko pinka'darima Kumponing-koo arariri otoriaing. 7Ee'noko Kumponing-koo arariri otori teing dii'maikorori'koo napo' navurariri otoriai, ee'noko tee' navurariri otoritaa' piaa oro'antaverimatoai. 8Ee'koo, teing aing aarumo oro'antaveri otoaing deeko' ee'noko dii'koo berempari otoai, teinge tee dii' tanataruriaing tamung sinangropanuka iri' o'dari'neeng-koo tee Ovoring Jiisuu' Karistoo' noru'eri. 9Ai' tee naning aing ee'ning oto'evuauka'nung tee kaputu', noru' apukung, ee'noko noru'ua' otong teie tee urikeng oreng aarumonanka-ita kiiroraa'antavuu'na'. 10Tee'koo, dii' mmaikori', oko'okoruriaing tee Kumponinge miru'duri bokururu'nung taa'ni'antarariri. Tee' ee'na' nkorariaining deeko' dii' teing dua'dariauka'ning. 11Ee'noko dii' teing maneena' onkeonke'duriaing teka ee'noo'ka paning-koo niikaang Ovoring Domang-antai Jiisuu' Karistoo'ke tee' nari' taremurimato-ainoo'ka. 12Tee'koo ninge maroita uatepa noru'antarampimatoaing dii' teing aing ookara kapoo'nanka naurampimaing, bane dii'ke noru'erio' ee'noko tee kara masikung oto'derurimaung-koo ima'dariri otorikoo'. 13Ee' noru'amaang, makosi ninge dii' enang ning aung mono ninka o'noitaa' tee ninge dii' tante-antarampimatoai napo' noru'antarampima. 14Ninge ee' noru'ansitaa': Batei tee nkaang mono tonta'uaina'mung due'ari otong tee' nari' niikaange Ovoring Jiisuu' Karistoo'ke naumuu'na'. 15Tee'koo ninge aa'na' tautaurampimang ning tenkenanko tee dii' makosiri otoriaina' aing kapoo'nanka napo' noru'koo batei piaroriaining-koo. 16Niikaang Ovoring Jiisuu' Karistoo' iri' ninka pou'na'koong minkunaa naurampiru'nung kumponaang-koo bi'arava', nantoonge aavamaari minkuaapeu'ning-koo, teka nii'ke tee niikaange dutai ooampiru'nung minkuampimaung tee' meenasi ninka daurarong~ otomanoo'keta neramparu'na'. 17Ai' tenang teie tee pankaing-anta ee'noko meenasi Bauma Kumponing-eta nkavuko teie auronge narunge karavuu' teketa paning-eta daurarompari bakaang meenasi oro'antavumanoo'keta ee' minkuvuma, “Aung tee nnuring ninge piaavamaung. Ee'nara-koo ning tampa' dotumaramaung.” 18Aung kara anaare nii'ke paning-eta poko taaravampiru', ai' nii' teing tee ninka nari' o'noru'ning teke meekamii-koo. 19Ee'noko nakaro-nupoong~ urikupoong biikaang kara Jiisuu'ke dupe-antavuio' aa'na' masikung oro'pario' kompampiri otong niikaang kara puring-anta-koo. Dii' tee noru' e'maniri otoriaing tee-koo biikaang kara-koo tee-pina' araka mutaananoo'ke arakavaramaung-pina' noru'eritaa' bera tane'puko tee maatara daa'aravainoo'ke basi diikaang domang-koo. 20Tutuna' tee aung tasi'perira e'maniriaing Daari Meekung-koo: Ookara kara Daari Meekung-koo nakaro-nupoonge tarampeeaako'ning~ teing nantoonge bii'ka sira'koo makosi deeaing. 21Ai' nanaare otoa' naninung pia-ita tavo'kuu'naare Daari Meekung-koo, teka Tanuaang Meekunge karantavuriko~ Kumponing-eta nantoonge minkuaama daariaako'.

will be added

X\