2 John 1

1Aung ane' karavoto~ ninge dootuu'koo urantai daariamang da' ee'nani ovorinaang Kumponinge miru'duu'nani-anko ee'noko teing daurukaa'. 2Dii'dovo tevo ninge aa'na' masika' piaarampimanavo ee'noko ning narunge deea', teka teing nari' tee kara masikung noru'aining, ai' tee kara masikung nii' ookara-koo dupui otomaung ee'noko tee' nari' nii' ninka otomatoai ookara doong-koo. 3Teie Kumponing Niumai tee ninka Bauring Jiisuu' Karistoo' ninka aa'ning oko-antamaariaing: biraanke moo'dopa, piaa unaa-anta, ee'noko mooa, tee ninka kara masikung ee'noko tee aarumo piaa. 4Ning tee bakei dotumaramang ninge ooaramira nii'ning teing-koo daurukaa'koo tampa' siompaako tee kara masikung, tee' ee'na' nari' Niumai botomuru'na'. 5Ee'noko enang tee aa'damaang da' ee'nani, nii' ookara naruna' naruna' piaameerimatoai. Aung tee nerakung boto deea' da' daarireromaatomaung, teka tee aung tee boto tutuntoma-ita oto'memurimaung: Naruna' naruna' piaameeriaing. 6Kumponing-koo piaa ee' sira'koo makosi: Nii'ke tee' nkoampiaing tee kapoo' naumurimaung. Ee'noko teie tee nii' tutuntoma-ita naruna' naruna' piaameerimatoo'naang naumuru'. 7Bakei, mmau' nantoong tosi nkonuka aunge kansi'ke avitoitoi nanaamaung, teing tana'eriko penkemparima aa'paamaing, “A, tee Jiisuu' Karistoo' naning-naumpui poaruu'nung.” Teing teing ee'ning tosi nkonuka ee'noko Karistoo'koo too'de-nupoonge teing. 8Tarerariri otoriai tee kapoo' pore'dorimaung nkaveriaru'neenga, aa'na' teka ootukuario' tee moo' nkaveriai. 9Baa tee naning Karistoo' bakaang naunau divu'ui nii'nung siompumaung tee Kumponing bakaning-koo narung deea', teka baa tee naning tee kara pinka'ui otoing tee, tee tekang ookakang beekaning-koo narung deempari otong aa'noko Bauma ee'noko tee Bauring. 10Nii'nung naning oovunamurii' naunau ninka dii'anko poko deeko' diikanoo' pava-koo bokueriauka', ee'noko onkeonke'eriauka'. 11Baa tee naning tee onkeonke'uaing tee, tee bakaang oraka' nko-koo kanto'paramaung. 12Ning tee kapoo'nanka mmau' dii' daarirerompipeu'ning oto'memung, teka ninge teing ookara ane'koo daari-koo piamoa'. Teka ee' noru'amaang dii'anko pa due'ka mora oing oomeeri karompiaing doturotue maanto'muriaina'. 13Teinge toire'ke teni da'maiko' Kumponinge miru'uu'nani baurukaa'ke tampa' tang da'anko botoaamang. Otoko, ee.

will be added

X\