1 Timothy 6

1Teing ookara botovotonaa'nuka dai'nisinankai biikaning teing okovoroi otomaing tampa' nari' noru'aariai. Tee' naueriaing nii'ninge Kumponing oraka' minkuaa'neeng bakaang kara nau-antavarampimaung ninka. 2Teinge botovotonaa'nukai okovoromaing Karistoo' masika'antavaamaing deeko' ee' noru'aavauka': “Nii'ke kara dimpa'evorompimatoai, ai' nii' tamung naro'ka namaia'.” Tee' noru'aavauka', teka teing mintoompevurimaing Karistoo' masika'antavaamaing, Kumponinge piaavurimaing deempariko bakei tampa' masika' biikaang kara siompaavaing. Aing ee' oro' nau-antaveriaing iri'narumperi. 3Nii'nung naninge nii'namuau kara nauvuriaing deeko', ee'noko naroomparavaung tee ninka kara masikung niikaang Ovoring Jiisuu' Karistoo'ketaing deeko' ee'noko naroomparavaung Kumponing siona' aarumo-koong nau-anta ninka deeko' tee baka daangange poo-antavaramaung, kapoo' noru'uaung, tamung tata' tutung-koo oraka' piavomaung ee'noko minkuminku tamung karananka-koo; 4Temurii' aarumoi mamairo tavo'umaung, pokaka, daang-koong tuumpi, oraka' noru' ee'noko oko'oko nantoong-koo. 5Teing taaravarimaing tee' nkoarimaung. Aming-koo, nna' tunsi muunanka deempariri nii'ninge kara masikung nau-antavaariaruko. Daang ee' noru'aamaung, “Dootuu'mariaing kapoo'nanka mooni' dovang narung nkavampiaina'.” 6Nka masika' a'noo' naning kapoo' avutevu' piavoaruko dei Kumponing-nung koonto' aarumo kompui tampara otooto' oovupeu'. 7Nka ee' noru'ampiai: “Nii' aa' ponto'marima kapoo' kansi'koo nkavampiri moria', ee'noko moompima kapoo' nii'nung nkavampiring meriauka' kansi'keta. 8Tee'koo enang taamang oto'memuri ee'noko baaronanka, teing ninka dotumariri o'noriaing.” 9Teka teing nantoong kavo mmau' oto'evoroo'naang piavoromaing paara-anta meu'paako baanka'ke taavi'urimaung. Kanu'arima amutemurii' baike-antananka piavoromaung nantoong orari-anta-koo ee'noko kera'anta-koo basi-antavaarimaing. 10Ai' orara aarumo amutemurii'koong okora' tee mooni' karaa'. Mooni' karaa'aama nii'ning nantoong tee kara masika'antavampimaung-eta kentaamparira domang-koo baike aa'na' tora'paamaung. 11Nka da' tee Kumponing bakaang naning avo'daravaing tevete-ita; koong-antararavaing koonto'aape, Kumponing-nung masikung aarumo-aape, masika'anta-aape, piaa-aape, e'maniang-aape, dooroonto'aape. 12Da' bakei iveka'doai Kumponing-aape masika'anta ninka deikoo'koo kua'daramatomaung-pina' tee domaang oparavauka'nung nkaveaina', ee'nara domaang kompee'naang miru'duu'nung Kumponinge, ee'na' tampa' sira'daru'na' nantoonge taararaio'. 13Ninge ee' botoramaang Kumponinge oomuresio', teie ee'narai Domaang Okovenunge, ee'noko Jiisuu' Karistoo'ke napo' oomuresio' aa'nunge Poontiasi Pailati'ankoi avoroa' tampa' sira'paru' bakaang miru': 14Nkoveaing ookara kapoo' Kumponinge nauruu'ning dake nko-koo botoramaang, domang ku'mi'doa'. Naninge da' tuumpiruarupeu'na' otoaing Ovoring Jiisuu' Karistoo' tavo'aravainoo'ke basi. 15Tee ee'nara sira'paravaing bakaang batei masikung-koo, Kumponinge tampuainoo'ka. Tee biraankenung, ookara-koo iirakuta, ankaankanuka biikaang ankaankang, ovontunanka-koo Ovoring. 16Tee narung boo'paa' otooto' okovosi', aa'na' araka sisisiisi'po'nung ninka nari' otomaung, teroita naning otoa' oovuu'nung ai' oovupeu'nung. Ee'nara ookarai domange tampa' noru'aamatoai ee'noko bakaang tare oparavauka'nung otomatoai. Ee', tee' nari'. 17Enang tee kansi'koo kavokavoro-po'nupoong tee ee' botoveriaing: Bii'ka daangampariauka'. Masika'antavariauka'nung biikaang kapoo'nanka oraru'kuaining-koo, teka Kumponing-koo masika'antavariri otoroaing ookara kapoo' mmau'antavui makosina' amurimaung-koo dotumarimana'. 18Naueriaing tampara nko-nko nkoaavaing, tampara nko-nko-koo maneeoroaing, avusiro'ariai, biikaang kapoo'nanka tankee'eeaing nii'ning ninka. 19Tee' nari' nkoarima tee oosisiiaamaung dama'ke opo' kompaavaining koonto' noru'aapeu'. Naueriaing tee' nkoariaing domaang ima'ai kompaavaina' temurii' domaang masikung. 20Timoti ee, tareveai tee kapoo' Kumponinge masika'antarui aruu'nung tare-koo. Donta'dari otoai naampa Kumponing-nung deeaung-eta, avutevu'ui minku-eta, daang noru' pankaing tampaamaung-eta. 21Ai' tee' minkuaama nii'ninge bekoi'aamaung tee minkunaa masikung siompampimaung. Tee biraanke tee da'koo otomatoaing. Masikung.

will be added

X\