1 Timothy 5

1Enang teing dootuu'nupoong ninka ee' tampa' otoriai: Pankareu' ioo'eria' otoai, teka tamung banainge tampa' nauerimatoai daumaraang-pina' noru'eri. Ee'noko nemaa' daara'mainkaang-pina' nkoverimatoai. 2Napo' manii' pankareu' daukorovo-pina' nkoveriai, ee'noko nerai' da'marikaampi-pina' noru'eri pakueriai, oraka' noru'darava'. 3Naaroonku ata'oinku masikeng piaaru'nuka-pina' noru'erimatoai. 4Teing naaroonku biurukaa'po'nupoong, nii'noo' bii'dompenku, teing ninka siperiko pakuaariaing dootuu'nung aarumo bareariaina' nakantu paku-koong, biumaraang maku'aarima tampa' tareaaru'nung-koo. Kumponinge temurii' aarumo tampa' oovumaung. 5Teni naaro masikani tampampimai teni baka otomai, sipuinani bakaang noru' Kumponing-koo narung-koo ee'noko baitoari otomai kunsiarama muunga ee'noko doonga. 6Teka teni nii'nani mono baka noru'aramai teni boo', bane teie mono domantoo' otong. 7Botoverima naueriai aing kapoo'nanka nii'ninge oraka' minkuaari'neenga. 8Tee naning bakanamuiaang tarevuriaung ee'noko baru'noo' bakanava pava, tee ee'nara penkemparing bakaang masika'anta-koo, oraka' nkoaring Kumponing noru'aavaing-eta boong basinoo'ka. 9Taura'periauka' naning naaro miring si'koo naaroonku biikanavitu-koong deeru-koo mare' ~narung-taa kivora divu'uai, nii'noo' amutemu'ke nampeesiaramai. 10Ee'noko miring si'koo makosi teni tampani, tampa' nkoaramai tampaamai, teni-pina' toire' panka'antavurimai-pina', onkeonke' bauko-pina', Kumponing bakaning meekupoong kau' duu'pevuriko'nani-pina' isipo'keta poroko, unaa-antavurimai-pina', tampa'nko narung-koo matauari otomai-pina'. 11Teka taura'perereriauka' naro'ka deeru-koo teing naaroonku mare' makosiaavaing, nerai'ariri noru' nampeesi-koo oto'neeng Karistoo' sipai. 12Tee' nkoarima maraka-anta-ita toto'parima kiimata-koo-nupoong deempari'neeng. 13Temurii' naaroonku tee kakarua'nuka deemparimaing, pava kantenuka; ee'noko kakarua' narung deea', tee aa'nong: ukuusi baukonukai, papuraanka'anta nkonuka, ee'noko minku-koo makosi deeaing minkuaamaing. 14Tee'koo naaroonku mme' nerai'ariri otoroining napo' nampeesiariaing maroamaang, toire' paravaariaina', biikanava pava tareaavai, ee'noko doona avompiauka' too'denunge barakosi'muri'neenga. 15Nii'ninge Sietani' siompai tee' pooariru'nung-koo tee' naurampimang. 16Nanie manikumai Karistoo' masika'antavumaie teemuiaang-koo nani manikuma naaro otoi dei tee, tenie tare-koo makosi teni naaro. Tee' nkovuaing deeko' tee teing-koo nii'ning dootuu'nupoong-koo baru' manki'oroauka' naaroonku masikeng tareaarima. 17Teing dootuu'koo urantanuka dootuu' tampa' tareaarimaing nantoonge napo' moo'ke deto moo'aariaing makosi, baru'noo' teing pore'oromaing daankiaarima ee'noko nau-antavaarikoo'. 18Daari Meekunge tee' nari' minkuvui otong, aa'pui otong, “Boromaka'koong muring dai'eriauka' uite'koong~ sinang kau'ke ke'dee'koo botoverima, tee-koo uite'koo maa'kuaina'.” Napo' aa'pui otong, “Naning mintoomparavainge mooni' nau'ka nkavuaing.” 19Naninge nii'nung dootuu'koo urantanung tuumpivuko taaraveauka' baka, teka kenaankai deeko', nii'noo' beenaumoi koonto' ooaara makosi. 20Ee'noko tee tautaueriko tee' nari' nkoariri otoroaing deeko' sirapo'ke naueriaing napo' tee' nkoaavauka'nung ookarai ooaara avoreaavaina'. 21Kumponinge oomuresio', Jiisuu' Karistoo' naankai ee'noko koosinunanka miru'nii'nankai ninge da' koonto' nauramaang: Pankaing tuumpiaamana' minkunaa tampa' tasi'pea' deeko' da'deng maku'eauka', ee'noko oraka'nko da'marang-aapea daka'peauka'. 22Ee'noko napo' tee naning dootuu'koo uranta deeng-anta-koo ta'nina' meeka'antaveauka' tanka' pante'ema. Tutung tasi'peaing arekee' oro' aung naning, orara deeko' da'koo pare'ara'neeng. Daka tanatararavai domang kiiroraa'dari otoaina'. 23(Ee'noko daka tanata-koo minkuama aa'dama'naang: Baru' ntong narung naieauka', uaininaru' oki'naru'na' naikimaatoainge, ke'de pakuruaina' amutemu'ke siiparomaung-koo.) 24Teka aa'dansina' naning masika' tampara tasi'pera deeko' meeka'anta-koo makosi, nka tampa' baakeenevera. Nii'ning biikaang oraka'nko a'noo' aa'na' oro'paramaung teing kiimata-kooning tasi'antamurima, teka nii'ning biikaang oraka'nko dama'ke oro'paramaung-koo tee'. 25Ee'noko tampa' nkoning tee'ke, nii'ning aa'na' oro'ning ee'noko nii'ning baku'nii'ning, teka baku'ariri otorokotaa' teing napo' koonto' sira'pariaing dama'ke.

will be added

X\