1 Timothy 4

1Enang tee Tanuaang Meekunge ee' koonto' naumurimaung: Asi'na'mung due'uko nii'ning tee bere'ariaing akovetei teieta kara masikung siompampimaung-eta teing ma'nari tositosinanka taaravaari-kotaa', ee'noko teing minkunaa Sietani' bakaning-koo bi'arikotaa'. 2Aing minkunaananka tositosinanka nantoong-eta ampirinung-nupoong-eta tavo'aravaining. Teing nantoong tositosi-koo datavoroi biikaang domang-koo kuunga biikaang daang minku tasi'pariarupeu'. 3Aa'paripeu'na': “Nanteeriauka' ee'noko taamang keremperiai tanuaang ku'mi'antarari'neeng.” Nka tee'paama daang minkuaamaung, ai' Kumponinge tee taamang tampa' nkomemuru' ee'nara tampara minkuampima nkavampii'naang nii'ke, tee kara masikung noru'ampiri otoininge, ee'noko masika'antavampimainge. 4Ookara kapoo' Kumponinge nkovuru'nung tampara, kapoo' otoa' dimpa'ampiaing Kumponing tampara tampampima nkavampiaing deeko', 5ai' temurii' taamang Kumponinge makosi-pina' oovumaung bakaang kara ee'noko niikaang kunsi siompui. 6Dake aing nko-nkona' nau-antananka naueriaing-koo nii'maikorori' da' tee tampara pakupakunung Jiisuu' Karistoo' bakaang deentaravaing maanto'antararara teinge karakarananka masikeng siompampimainge ee'noko tampara minkunaa tee ee'nara dake siompemaung. 7Donta'dari otoai teing-eta kumponaang daang-koonanka Kumponing-etaning deeaing-eta. Nka daka tampa' bareraravai Kumponing bakaang naning makosina'pina' nkoraravaina'. 8Ai' amurii' mirumiru' minkuaamaung masikung: “Mono bare-anta-koo tampa'ke, nka tanuaang bare-anta-koo baru' tampa' masika', enanung ee'noko dama'nung otooto'koo paku-antana'koo.” 9Tee' masika'anta-koo makosi. 10Tee'koo bakei pore'morimaung, iri' o'marikoo', niikaang noru' Kumponing domantoo'koo sipampiri otomaung-koo, ee'nara ookara-koo Domang-anta masika'antavaamaing-koo. 11Aing kapoo'nanka aa'na' tuutuu'antaveri nau-antaveriai, ee'noko botoveriaing siompaavaina'. 12Taura'daravauka' naninge da' oki'naa-anta-koo da' pankara deeaung deentarako, teka Kumponing baito-nupoonge ooraara dakaang kara-koo bi'antavariaing deentari otoai, ee'noko nko-nko-koo, piaa-koo, baito-koo ee'noko kiiroraa' aarumo-koo. 13Moainoo'ke basi mataa'irari deeruevuriai tee Kumponing bakaang dariraari, daankierima ee'noko kara nau-antaverima. 14Dakaang avuavu' da'koo otoing Tanuaang Meekung-etaing sipeauka', ee'nara karai tarampee~koonge minkuvuko nkaveu'nung tenang teinge dootuu'koo urantanukai bireng pante'daako. 15Aing kapoo' botoransing nkoemaatoai. Avu'antararavai teing-koo, da' panka'daramatomana' tasi'paavaina'. 16Tareraravai dakaang nko-nko ee'noko nau-anta, tampa' nari' otoaina', ee'noko tee' nkovekotaa' ookara taararaamaing ninka nari' domantariaing.

will be added

X\