1 Timothy 3

1Enang Kumponing bakanamuiaang oto'na' naurama aung kara masikung naurama'naang: Tee naning dootuu'nupoong tanata-koo piavora tee, tampara nko-nko nkovuu'naang tee piavoi otong. 2Naning tee' nko-koo piavoko deeko' tutung aung tanatanung aarumo paaraverira taura'periaing aa'nomaung deeko': 3Tuumpiaa-peu'na' otoa', nani ba'ung-pina' otomaung, naikuma deeko' naikuma basiaramanoo'ka bakearamaung, onou siraka'pari otomaung, ovontung-pina' ka'duuro', naning navunavuro', siraka'pui nau-anta-nko, purinto'naru'ke kanu'aravaung, da'deng iira deeaung teka banainge oto', ee'noko tata'arava' oko'oko deeaung. 4Baurukaa' bautaranuka tampa' toosi-antavuri otomaung, toire' tampa' tarevuriko tampa' meumpaamaung, tampa' noru'ai ookara kapoo'koo. 5Ai' naning tee baurukaa' tampa' tarevuriarura dei Kumponing bakaning dootuu' nupoong arekee' tarevuripeu'? 6Ee'noko tee naning a'mung bere'arieenung makosi deea' dootuu'nupoong tare-koo. Baka daangamparara dua'ara'neenga, Sietani' kiimata-numpo' deempari dua'aru'na' baka daangamparakotaa'. 7Ee'noko napo' tee, tee naning ookarai tampa' noru'aamaung makosi, Ju'deeainge. Tampa' noru'aavaruko maia'oi Sietani'nung baanka'koo taavi'arara dua'ara'neeng. 8Enang napo' tee Kumponing bakanamuiaang pakupaku-nupoong tee' nari'ke, paaraverima taura'periaing temurii' nko-nko nko-koo, aa'nomaing deeko': 9Biikaang nko-nko masika'antavaamaing, meneng paakanuka deea', purinto'naru'koo baru' kei'oroaing, oko'okonuka deeaing, ee'noko tee masikung kara Kumponinge sira'memuru'nung masika'antavaamaing domang kiiroraa'oroi. 10Tutung baakeeneverereria' taura'perereriauka'. Tuumpi otoroaing-pina' oovererima deeko', pakupaku-nupoong deemparii'naang makosi-antaverereriaing. 11Maniku', bii'ankaampi deeko' ai' pakupaku nkonuka deeko', napo' tee'ke, biikaang nko-nko masika'antavai otoroaing, miring orari-antananka deea', naiaama deekoro-antavariaing, kake'ii-nupoong ookara kapoo'koo. 12Pakupaku nkonuka kemaimpariauka'. Biurukaa' tampa' tareaarimaatoai ee'noko biikaning bautarananka naro'ka. 13Ai' pakupaku-nupoong biikaang nko-nko tampa' dupeaavaining teing nantoonge masika'antavaariaining, ee'noko maia'oroa' nantoong nauaaripeu'ning tee kara Jiisuu' Karistoo'koong masika'antavaamana'. 14Due'ka dii'anko moo'naang noru'amaang, nka aing botonanka daariamang da'deng moaruko deeko' tee aung noru'eriaina' arekee' otoripeu'na' makosina' Kumponing-namuiaang-kooning deentariri. 15Kumponing bakanamuiaang dootuu'nupoong teing ee'ning Kumponing Domantoo' bakanavitu. Ee'noko ee'navitue tee kara masikung Kumponing-etaing deto kompai otomaung natukue bakatutai pava kompui otopeu'na'. 16Ee', masika' tee minkunaa Kumponinge dooremuru'nung bakanamuiaang o'noriaina' naumurima, pankaing doorenang masikung, naninge daang-antavuarupeu'. Okora'noo' tee Karistoo', Ee'nara nii'koong naning deempari mono ninka tavo'arama sira'paru'; Nantoonge tuumpiaako Tanuaang Meekunge tee naning koonto' masikee-antavuko'; Koosinunankai ooaako'; Bakaninge daankiaako' ookara nantoong-koo; Nantoonge kansi'koo otoroi masika'antavaako'nunge; Ee'noko Kumponinge meenasi-koo deto nkavuu'.

will be added

X\