1 Timothy 1

1Ning aung karavoto~ daariamaung tee Paula', Jiisuu' Karistoo'koo kara-okomui-nka. Ning kara-okomui-nka deemaru' Kumponinge domamuru'nunge botomuio' ee'noko Jiisuu' Karistoo'ke botomuio' pankaruntoonge noru'ampimaunge ookara kapoo' nempampimaung basi-antamemuriainunge. 2Da' Timoti daarireromaang; da' nnuring masikung-pina' noru'damaung Karistoo' masika'antavemaung-koo. Biraanke, piaa, ee'noko mooa da'koo otoaing Kumponing Neuma-itaing ee'noko teieta Ovoring Jiisuu' Karistoo'. 3Enang ninge ee' botoramaang tero pia-antarantu'na' Masedonia'nameensi'aape mema: Da' teke Epeses-namonoi otomatoaing, ee'noko teke otoi teing nantoong miring naurantu'ning siisieri ee' naueriaing: Nii'namurii' kara koonto' deeaung nauaariauka'. 4Ee'noko noru'aavauka' kumponaang-koong minkunaa ee'noko boorou'ning biikaang mirinanka depeto parapara boturopa noru'ui oto'koo. Ai' temurii' kara tamunung minkuminku basi-antavumaung, ee'noko tee' minkuaama Kumponing bakanamuiaang tampa' tanatavaariarupeu' ee'narai nauvuru'na'. 5Teka nee' kake'iinaanka deemarema tee, tee' nauransina' botoveriaing nantoong piaavaariaina'. Ai' piaa masikung basi-antana' ee': Tampara narung nko-koo piavoroaing; domang kiiroraa'ariri otoaina' nari' nkoariaing; ee'noko tunsi naroompariri tee kara koonto' Kumponing-aapenung masika'antavaavaing. 6Teing nantoong teing amurii' aarumo baari'au'ning. Tee'koo teing tamung pooarimaung daang-koong minkuminku-koo. 7Bane Moosesi-nung boto nau-antanuka deemparii'naang piavoromaunge, nka tee minkuaamaing-koo kara-koo miru'noo' noru'aava' ee'noko teing botonanka nau-antavarimaing-koong miru' noru'aava'. 8Enang tee nii'ke noru'ampiri otong tee Moosesi-nung boto tee tampara, naninge tampa' miru'ari otoina' kompui dei. 9Naninge tampa' kompuaing deeko' ee' noru'uaing: Boto tee Kumponinge koonto'nanka-koo miru'ua', teka aing aa'ning-koo miru'uu': teing kara toto'paamaing kupi'oroma, Kumponing sipai orara aarumo nkonuka, dootuu' sipai Kumponing dotu-anta-koo makosi deeaing, biumaraang, biukorovoori ee'noko nantoong dupisi'aarimaing, nantoong maniku' ninka bakiaa'eemaing ee'noko nii'ning ninka nantoong ninka, nantoong tamung bakiaa'aarima baaveaarimaing, tosi baukonuka, ee'noko maraka toto'nuka; 10Ee'noko Moosesi-nung botoi napo' teing nii'ning kapoo'nanka tee' nari' oro'ning Kumponing-etaing kara koonto' ninka naroompariaing ookara avo'uri otong. 11Ee'noko tee kara koonto' Kumponing-etaing tee ee'nung tee doorenang tampara Kumponinge biraanke o'meevai araka-po'nunge sira'puma ning aroo'mui botomuu' bereng-antavama'naang. 12Ninge tampara tampamang tee-koo Jiisuu' Karistoo' niikaang Ovoring ning kake'iinung noru'mura bakaang mintoong-koo bare-antamuu'nung-koo. Tee ee'nara ning puring-antamumaung tee-koo bakaang nko-nko nko-koo. 13Bane ning tutung tee bakanamuiaang oraka' nkoaranko', barakosi'ama, poore'ama, nka tee Jiisuu' Karistoo'ke piaamuu'. Aming-koo? Nna' noru'ampa' nkoanko'nung tee, masika'antavamparuitaa'; 14Tee tee, niikaang Ovoring bakaang piaae nkaning oraka'nko daka'memura biraanke-antamuio', tee ee'nara bakei masika'antavansi domange dai'amaung ninge. 15Aung kara masikung, masika'anta-koo makosi, aa'noko, “Jiisuu' Karistoo' kansi'koo pou' nantoong orarananka domampurii'naang.” Ninge masikee-antavampeu', ai' ning tee baru' aa'na' orara teing-koo nantoong-koo boonga. 16Teka Kumponinge ning piaamuu' paara-anta deeng-antamuu'naang bakaang aarumo boinare-koong ninka, dama'nupoonge tampa' ooaava'naang, masika'antavaavaiaininge domaang isikung nka-koo. 17Tee Kumponing tee' nari' otomaung Ovoring, boo'paa', naninge oovuarupeu' ee'noko tee narung masikung. Deto basi-antavampiaing, nepu'ampiaing tee' nari' botu otoa'. Ee', tee' nari'. 18Timoti, da' nnuring-pina' noru'dansi manki' aronsing kara nauransina' botoverii'naang. Tero Tanuaang Meekunge karantavurimainge~ minkurau'na' nkovema bakaang tavutavu' tampara orara aarumo-aape nkoveai. 19Ee'noko tee nkovema kara koonto' masikung narung kompei Kumponing masika'antaveai, nko-nko tampara narung nkovema tunsie tasi'antarumana'. Nii'ninge nantoonge tee biikaang tunsi karomana' dimpa'aarai'nange tee enang kara tositosi masika'antavaamaung. Biikaang masika'anta turari-antavaako'. 20Teing-koo nii'naanka Aimeneas naanka ee'noko Aleksanda' ninge be'antavampetu'naanka Sietani' bakaang bireng-koo naunauavareta siparee'naang napo' orara kara minku-koo Kumponing-aape.

will be added

X\