1 Thessalonians 5

1Nii'maikorori' ee, baru' bateinang poaina'mung naurarampii'naang nia'meriauka'nung dii'ke. 2Ai' dii'ke tee tampa' noru'eri otong Ovoring poaina'mung makensi'na'mung, bakisipunuka biikaang bateinang-pina' tenang muunga. 3Tenang nantoonge aa'pai otoko, “Nii' tampa' o'norimaang mooa-koo,” ee'namu' ta'ning-antana' biikaang otooto' mooa-po'nung turariaravaing. Tee' tee-pina' maniku' pareaava'naang ta'ning-antana' sisikeeravoromana'; baari'aavauka'nung. 4Nka dii' nii'maikorori' mutaanang-kooning deea'. Te'mung doong basiarama ta'ning-antaruriauka'nung bakisipung-pina'. 5Dii' ookara tee araka baurukaa' ee'noko doong baurukaa'ke. Nii' tee mutaanang ee'noko muung-kooning deea'. 6Tee'koo enang aatumpiri otoauka' teing nii'ning-pina', teka tantemariri o'noriai taremariri. 7Muung tee aasi' bakanang, tenang nantoong naikaama kanu'arimanang. 8Teka nii' nantoong doong-kooning deemariritaa' tee taremariri o'noriaing. Ookara piaavarampiri, Kumponing-etaing kara masika'antavampiri, ee'noko moo'muriaina' aa'na' noru'ampiri, orara-ita nee'mariri o'noriaing naning tavutavu' nko-pina' bakaang mono nee'arapeu'na' mononopa' baakopo dovang ivekeng kurumparama. 9- 10Ai' Kumponinge tee nii' miru'muria' teie kiimatamurii'naang iiravoma, teka domamurii'naang niikaang Ovoringe, Jiisuu' Karistoo'ke, teie ee'narai nii'koo boo'paru'nunge nii' naro'murii'naang tee ninka toroaravaina'mung-koo, moompiaining ee'noko domamariaining. 11Tasi'peri? Makosi, tampara aarumo nko-koo domang kuaa'antareerima otoriaing, ee'noko puring-antareerima tee'pina' nkorarimatomana'. 12Nii'maikorori' ee, nii'ke enang ee' minkurarampimaang: Masika'antavereriaing teing nantoong Ovoring-koo kuunge dii' pakuraarimaing taung nau-antaraarima koong-antaraari. 13Piaaverereriai, pankaing-antaverereri tee-koo ee'nung-koo mintoong-koo nkoaamatomaung-koo. Mooa-koo otoriaing. 14Nii'maikorori', ee' nkoverii'naang botorarampimaang: Koono-antaverereriaing teing kontevoroma ata' nanu'nuka, ee'noko teing avoro'keta orarunsiarimaing dunsirunsi-antavereriaing. Pakuereriaing teing iri' oparimaing. Bointuri otoriaing ookara ninka. 15Taura'periauka' orara orarai maku'koo, teka paku baukonuka deentariri otoriaing dii' dii'ka ee'noko ookara-koo. 16Doturoturariri otorimaatoai. 17Kunsi-koo uaaroriauka'. 18Bane arekee' nkoarako tampara tamperiaing Kumponing-koo. Tee' ee'na' nkorarii'naang Kumponinge maroruri otong dii' Jiisuu' Karistoo'koo otoriko. 19Tanuaang Meekung siri'eriauka'. 20Daang tamperiauka' tee kara Tanuaang Meekunge karanta~, 21nka paaraveriaing ookara kapoo'nanka tasi'periainoo'ke basi, ee'noko tenang komperiaing kapoo'nanka masikeng. 22Pote-antarariri otoriaing teing-eta kapoo' orarananka-ita. 23Teie ee'narai Kumponinge mooa okovosi'ke meeka'antaruriaing, tampa' konturiaing dii' ootukunairue – tanuaang, tunsi, mono – bera Jiisuu' Karistoo' poaina'mung-koo, koonto' tuumpi otoriaing deentariaina'. 24Kumponinge bokururu'nunge koonto' si'duriauka'nung. Tee' minkuansina' nari' nkoruriaing. 25Nii'maikorori' ee, kunsi-koo pakumereriai. 26Dii'ke teing nii'ning nii'maikorori' niikaang doturotu nauereriaing bireng batu'deeri Ovoring-koo kuunge. 27Ninge aa'na' botorampimang, Ovoring bakaang miring-koo kuunge: Deerueriaing aung karavoto~ ootukunung nii'maikorori'ankoi. 28Tee biraanke niikaang Ovoring Jiisuu' Karistoo' bakaang dii' ninka nari' otomatoaing. Ee', tee' nari'.

will be added

X\