1 Thessalonians 4

1Enang aa' dii' nii'maikorori' nii'ke dii' pia-antararampimaang unampampiri tee-koo Ovoring Jiisuu' napo' dii' nii'koo barerariaing tee' dii' tampa' otoriaina' Kumponing dotu-antaveri tee' ee'na' enang nkoverimang, nka baru' aa'na' nkoveriaing. 2A'noo' tee noru'eri otong tee botonanka naurarampiru'nung tee-koong Ovoring Jiisuu'koo kuunge. 3Tee tee ee'nara pia Ovoring bakaang, dii' poterariri meeka'antararii'naang tee-koo aarumo kaukauro nko-koong. 4Tee'koo dii'ke tampa' noru'eriaing koonto' narunge baka ba'aang masikani nampuaina' meeka'antarariri toosirariri otoriaina'. 5Tamung karaa'deerima siong-antareeriauka' Kumponing noru'aavaing-pina'. 6Nii'nung naninge ba'maiko' pari'uauka'nunge aung kapoo'koo. Ovoringe tee temurii' kapoo' ootukunung maku'antavumaung, tee' tero koono-antararampiri naurarampiru'na'. 7Ai' Kumponinge dii' ku'mi'koo miru'duria', teka kiiroraa'dariri oto'koo miru'duru'nung. 8Tee'koo tee naning aung kara masikung dimpa'uaing deeko', naning dimpa'ua', Kumponing ee'nara dimpa'uing, tee Tanuaang Meekung arurimaung. 9Tee-koo piaa, namaia' piaareerimaung-koo, Kumponinge tero bareruru'nung piaareerii'naang kapoo' daari-koo makosi otoa'. 10Ee'na' ootukuning dii'maikori' Masedonia'nameensi'nupoong piaaverererimaung, masika'. Nka enang nii'ke iri'mori unantarampimaang ee': Diikaang aarumo piaa-koong panka'antaveriaing. 11Ee'noko to'bii-antarariri ka'duuro'nuka otorii'naang nii'ning biikaang nko-nkonanka-koo papuraanka'antaverereriauka', teka dii'ka diikaang, kake'iirariri mintoontariai dii'ka diikaning birenge, botorarampiru'na'. 12Tee' nari' akoviturie tee-koo masika'antaraariaing. Nii'nung-koo aroo'dari ata' naniauka'. 13Enang tee dii' nii'maikorori' teing Karistoo' bakaning boorou'ning-koo tampa' naurarampii'naang piamorimang dii' orarun-sirariauka'na', tee' nii'ning nkoarimana' Karistoo'koo nemparia' otoromaing. 14Nii'ke masika'antavampiri otong Jiisuu' tee boo'parara napo' daa'aru'. Tee'koo tee' noru'ampiri otong Kumponinge Jiisuu' bakaning boorou'ning napo' tee ninka nari' tavo'antavuriaing. 15Ovoringe tutung naumuriko dii' nari' naurarampimaang: Nii' teing booroma si'maaru'ning Ovoring poaina'mung-koo dama'due bi'mariaing boorou'ning-koo. 16Ai' Ovoring ee'nara paning-eta siarama aa'na' bokumuriaing koosinung pankaing-pina' bokuma, Kumponing-etaing tuuviri karoi otoko. Ee'noko Karistoo' bakaning boorou'ning ee'namu' daa'ariaing tutung. 17Teka tenang nii' booroma si'maaru'ning deto baramuriaing teing ninka kamo'koo kune'koo tee Ovoring auvi'aua. Tee' nari' tapo'meerira Ovoring ninka o'noriaing. 18Enang tee dunsirunsi~antareeriaing aunge karai.

will be added

X\