1 Thessalonians 2

1Dii' nii'maikorori' ooveriko, tee beroveero' nii'ke beero'darampiko'nung tamunsi'nung deea', teka teie tee sinang nkavuu'nung. 2Dii'ke noru'eri otong nii' tee Pilipai-namono-koo bakei oraka' nkomaariko'; turamaaru' dii'anko mme' tavo'kampiaruko; aa'na' masika' tora'antamaaru' teka. Nka Kumponinge puring-antamurio' nanampira napo' dii' daankirarampiru' tee tampara doorenang, bane napo' aa'na' turamaariko. 3Niikaang tautau tee boturopa deea'; napo' bakiaa' nko-koo minkuampia'; ee'noko aava nkoampia' nii'ke. 4Teeo, Kumponinge tee makosinuka tammurira aroo'muri botomuru' tee doorenang tampara bereng-antavampii'naang. Tee'koo nii'ke enang sira'pampimang Kumponinge niikaang noru' paaramurimaung dotu-anta-koo, nii'nung naning dotu-anta-koo deea'. 5Dii'ke tampa' noru'mereri otong nii'. Dii'koo kara menaanka minkuampia'. Ee'noko Kumponinge noru'ui otong dii' nii'ke diikaang kapoo' okomurii'naang navurarampia' niikaang minkunaa daka'puio'. 6Ee'noko napo' nii'nung naninge daangamuriaroo'naang dii'koo, aing-koonge ee'noko nii'ning-koonge. Aunoo' masika' nii' Karistoo' bakaning kara okovuri nkanuka. Nii' pia-koo dei tee dii'ke nii' daangamerereripeu'. Nka nii'ke daangang besi'ampia'. 7Tamung ka'duumariri o'noriko' dii' ninka, nani toire' tanatavurimai-pina'. 8Tee'koo nii'ke dii' piaararampiri dii' tee doorenang tampara Kumponing-etaing arorompiru', ee'noko tee narung deea', nii' nii'ka napo' avu'koo makosi-antamariko', dii' bakei nii'maikorori' masikeng deentariru'nung-koo. 9Ee mmaikori', dii'ke masikee-antameripeu', ai' noru'eri otong nii' tee bakei aa'na' pore'moriko' iri' o'marima, birenge mintoomarima doong ee'noko muung nii'ka bau'marii'naang dii' pore'antararampiaroo'naang taamang tovang-koo, tee doorenang tampara Kumponing-nung daankiampima. 10Dii' teing nii' niikaning sirasira' nkonuka, Kumponing napo' tee'ke, niikaang tare dii'koo baito-nupoong-koo kiiroraa' ee'noko koonto', tuumpi otoa'. 11- 12Noru'eri otong dii'ke, nii'ke tee dii' nari' tarerarampiko' tee' biumai toire' tarevurimana', tautau ninka domang kuaa'antararampiri, dunsirunsi~antararampiri, ee'noko to'bii-antararampiri dii' Kumponing dotu-antana' otorii'naang, tee ee'nara dii' bokururu'nung bakaang muu'koo ee'noko meenasi-koo kuunge otorii'naang. 13Ee'noko nii'nung kapoo'koo Kumponing tampara minkuampimaung: Tenang dii'koo daankiampiko dii'ke tee kara niikaang-pina' noru'eriaruko'nung, teka tampa' taaraveriko' tee kapoo' minkuampiko Kumponing bakaang kara-pina', teie ee'nunge diikaang domang bere'antaruru' tenang dii'ke masika'antaveriko. 14Ee'noko enang dii' teing nii'maikorori' masikeng otorimaing Kumponing bakaning dootuu'nupoong Judia'nameensi'koo otoromaing-pina' nari' Jiisuu' Karistoo'koo kuunge, ai' diikanoo'nupoonge pore'antaraarimaunge Ju'nupoonge pore'antavaariko'na' biikanoo'nupoong. 15Teing ee'ning tavau'ning tee Ovoring Jiisuu' ee'noko nakaronuka~, ee'noko nii' bata'maaru'. 16Tee'koo Kumponing iira-antavau' ee'noko nantoong ookara too'dempaaru' nii' avo'avo'maarima kara nau-koo teing Ju' deeaing domamparipeu'nung. Tee' nari' nkoaakotaa' oraka'nkoi maanto'nuka deempariru'. Tee tee enang asi'namu' Kumponing bakaang iira kune'aavaing. 17Nii'maikorori' ee, nii'ke tee oki'noo' si'darampira birontarampi-kotaa' taung besi'ampiru' oomeerii'naang, aa'na' piamorira. A'noo'koo tee noru'ke si'darampia', mono narunge. 18Nii' tee dii'anko toro-koo piamori otong. Baru' ning Paula' aa'na' mmau'namu'pie dii' oo-koo paaravantu', nka Sietani'ke avo'avo'uko'. 19Dii' beero'koo piamorimang dii' dua'dari'neeng-koo noru'ampiri, ai' dama'ke tee niikaang Ovoring Jiisuu' Karistoo' toroarara aming-koo tampa' noru'muriaing? Aming-koo moo'murira dotu-antamuriaing-pina' noru'ampimaung nempampiri? Tee aa' dii'koo ee'ning-koo oorurira masika'antaveriko. 20Dii'koo ee'ning-koo dotumariri o'norimaung.

will be added

X\