1 Peter 4

1Enang tee, Karistoo'ke bakaang monoi baike tora'puu'nung-koo dii' tee' nari' uro'kanoo'ka purintariri aroo'dariaing temurii' baike kune'koo, ai' baa tee naning baike kune'uma tee tee enang oraka' nko-ita bakearing. 2Tee tee enang bakaang mono ninka domampari otoi emu'keta deto mono bakaang pia siompuauka', teka Kumponing bakaang pia siompuaing. 3Tee tee dii'ke teing-pina' nari' mutaanang-nupoong piavoromana' aing aa'ning nkoveriauka' temu' nkoveriko'na': maimaia'na' oto', mono bakaang pia siong, purinto' naru'ke kanu'anta, taamang tovang nainai nai-koo deikoo', ee'noko daang-koong dootuu', tee maarekusi'. Batei temurii' nko-koo tero tankinuing botu te'. 4Teing teing enang ta'nimparirining dii' teing ninka nari' tapo'dariaruio' tamung iri' o'anta-koo, ee'noko oraka' minkuraarikoo'. 5Teka teinge tee teka dama' toosiaavaing Kumponing ninka ookara nantoong simpe'koo maamuari otoing ninka: boo'nuka ee'noko domantoo'nuka nari'. 6Ai' teie Kumponinge teing temu' boorou'ning tee' nari' tampara doorenang taara-antavuru' teing teing biikaang tanuaang domampariri otoroo'naang Kumponing domampari otomana' nari'. Ookara nantoong ninka nari' biikaang mono boo'koo barakosi'nii'nuka deempariko teie tee daankinang taara-antavuru'nung. 7Ookara kapoo'nanka aung kansi'koonanka o'doma due'umaang. Tee'koo mataurariri tarerariri otoriaing tampa' kunsirariaina'. 8Ookara-koo daua naruna' naruna' diikaang domang-eta tampa' piaareeri otorimaatoai, ai' nii'ke nantoong piaavarampima deeko' biikaang oraka' nkonanka mmau' daka'pampipeu'. 9Diikaning pavananka-koo tampa' onkeonke'deerimaatoaing baru' pore'pina' noru'erima munkumunkureeria'. 10Kumponinge avuavu' naruna' naruna' aruru'na' makosina' komperi pakureerimaatoai. Tee'koo dii' teing kapoo' amutemurii' Kumponinge aruru'ning tampeng tare-nupoong deentariaing. 11Kara sira'perima deeko' tee' Kumponinge naururiaina' masika' sira'periai. Nantoong pakuererima deeko' Kumponinge iri' arurimana' siomperi pakuereriai, ookara-koo kapoo' nanka-koo Kumponing pankaimparavaina' Jiisuu' Karistoo'koo kuunge. Miring ee'noko meenasi pankaing okovui otomatoaing ookutunung batei-koo o'domaropa-koo. Ee', masikung. 12Ee maikori', ta'niniriauka' dii' tee-koo nta'pina' mantong-koo parapaara-koo dii'koo poing-koo paararurima. Tee kapoo' ta'nimpaarii'pina' noru'eriauka'. 13Teka baru'noo' doturariaing dii'ke Karistoo' siomperima arikung kune'uu'na' nari', ee' noru'erima tee' nkomarimaung-koo dotumariaing tenang tee bakaang meenasi oro'paravainang. 14Karistoo'nung miring komperimaung-koo oraka' minkuraariko tee doturariaing, ai' tee' minkuraarima sira'paamaung tee Tanuaang Meekung Kumponing bakaang meenasi-po'nung dii'koo otomaung. 15Teka dii' orara aarumo siomperi sisikeerang-antarariko taara-koo bakei piamoa' aing ee' oro' nkoverima: dupisi'anta, bakiaa'nko, oraka'nko, nii'noo' kakarua'dorima. 16Teka Karistoo'koo kuung otoritaa' baike kune'erima maia'doria' Kumponing pankaing-antaveriaing Karistoo' bakaang miring komperimaung-koo. 17Ai' batei tee poi otong teie bakanava'kooning paara-anta-koong. Ee'noko nii'keta tutumparavaing deeko' teing Kumponing bakaang doorenang tampara siompaava' otomaing are'ke botu deempariaing? 18Tee' Daari Meekunge aa'pumana', “Teing koonto'nuka kakaue domampariaing deeko', teing nantoong oreng Kumponing piavoroaing are'ke oro'pariaing?” 19Tee'koo teing nantoong Kumponing bakaang pia-koo otoroi baike kune'aavaining, makosi tampa' nari' nkoaamatoaing bii'ka avariri tee-koo teing nkovuru'nung bakaang tare-koo, biikaang tarenara mutekaro' masika'antavai.

will be added

X\