1 Peter 2

1Tee'koo dii'ke taapo' tonta'eriaing teing aing aa'ning: too'deng, tositosi, kara narunge navu, mamairo ee'noko amutemurii' miring orari-anta. 2Teka dii' aa'na' peera-antarariaing tee-koo kara-koo pituaravaung-koo nerakau'nuka noonoo'koo narung-koo peeravoromana', tee dii' panka'antaruriaing diikaang nerakung domaang-koo makosina'. 3Ai' teie domang-antaruriko dii'ke tee Ovoring tampa' mantomperu'nung. 4Tee-anko pori otomatoaing tee ee'nara boia' domantoo'anko nantoonge tompimpau'nung-anko, teka Kumponing-koo dutakanoo'ka tee miru'nisi ee'noko domange dai'. 5Ee'noko dii' tee'ke tee-pina' kapang domantoo'nuka otoriaininge tanuaang-aapenava pava-koo tee ninka nari' kanirariri meeka'nisinuka piristi'navitu deentariri tee' tanuaang-aapena' boontunantarima Kumponing dotu-antaveriaina' Jiisuu' Karistoo'koo kuunge. 6Ai' Daari Meekunge ee' minkuvui otong, “Ee aing, Saioni-namono-koo tee boia' domantoo' e'maniang tumanung bempansing, tere' ee'nare' kunku'doi'koo miru'nisi-nare' ee'noko maku'paa'nare'ke, ee'noko baa tee naning tee masika'antavuaing tee maia'anta-koong deea'.” 7Dii'koo ee'ning-koo tee, Jiisuu' Karistoo', masika'antaverimaing-koo tee ee'nara domange dai' ee'noko maku'paa', teka teing-koo tee masika'antavaavaing-koo tee tee maia'anta, tee' Daari Meekunge aa'pumana', “Tere' ee'nare' kapanare' pava kaninukai poore'aama dua'au'nare' ookutunava-koo e'manianare' tumanare' deempario' tasi'pau' dama'ke.” 8Ee'noko “Tere' tere' ee'nare' nantoong tupang-antavurira dua'antavuriainare' teing.” Teing tupampariainoo' tee teinge kara meumpaavaung-koo tee', teing tee' oro'nuka dua'koo miru'uru'na'. 9Teka dii' teing ee'ning Dauraronge~ miru'nii'nuka piristi'koo, meekavitu, Kumponing baka bakanupoong, dii'ke kapoo' bakaang nko-nkonanka tampeng sira'antaevurimatoaining, tee ee'nara dii' mutaanang-eta bokururira bakaang araka ta'nimpaarii'aape si'duru'. 10Tero tee dii' nantoong deeaing, teka enang tee dii' teing Kumponing bakaning nantoong deentaririning. Tenang ee'nang tee Kumponing bakaang piaa komperiaruko'ning, teka enang komperi otong tee piaa. 11Ee mmaikori', dii' teing tavora-nupoong ee'noko damisimainku-pina' anke kansi'koo otoriko ninge eturampiri aa'dampimang: Donta'dariri otoriai mono-aapening piananka-ita teing dii' domang turanturi otorimaing-eta. 12Mutaanang-nupoong-ankoi tampa' mataurariri otorimaatoai ee'noko oraka' nkonuka tantaariaing deeko' tenang Kumponinge kansi' beero'uainang diikaang nko-nko tampara tasi'paara Kumponing daangampaavaing teinge. 13Ookara-koo teing-koo nantoong-koo pankenanka-koo boong otorimaatoai Kumponing dotu-antaverii'naang, aa'noko tee daurarong, ee'noko teing ovo'ma'nuka, 14ai' teing teing Kumponinge botovuru'ning oreng mero'aarima ee'noko tampeng daangampaarii'naang. 15Ai' Kumponing bakaang pia tee ee' otong': Dii'ke tampa'nkoi dooroong-antavereriaing teing mutaanang-nupoong kara tamunsi'nung minkuaamaing. 16Masika' dii' Moosesi bakaang botoi dai'daria' otong, teka ninge aa'dampimang dii'ke kapoo' orara nkoveriauka' dakaraka'peri aa'perima, “Karistoo'ke Moosesi bakaang boto-ita unaa-antamuio' ning taura'mari o'nong.” A, tee' deea'. Karistoo'ke unaa-antamuru'nung nii'ke kapoo' tampeng naing nkoampii'naang. Kumponing bakaning botovotonaa'nuka makosina' otorimaatoaing. 17Nantoong ookara makosina' deto basi-antavererimaatoai. Teing Karistoo'koo dii'marang piaaverererimaatoai. Kumponing-koo aa'na' amaiaa'dori otoriai, ee'noko kansi'koong daurarong deto basi-antaverimatoai. 18Dii' bautaranuka diikaning pankeng tanataraarimaing-ankoi boong-koo otorimaatoai teing pankaing-antaverereri, tampa' nkoraarimaing naing-koo deea', teka teing oraka' nkoraarimaing-koo nari'. 19Naning tamung sisikeera-antavaako taura'paravaing deeko' Kumponing dotu-anta-koo noru'ui, Kumponinge tee biraankevuaing tee. 20Moo' aming nkaveriaing kapoo' orara nkoveriko mura'daariko taura'dariaing deeko'? Teka kapoo' tampara nkoverima baike kune'erii'naang dooroontariri otoriaing deeko' Kumponinge biraankeruriaing tee-koo. 21Ai' dii' teing tee'koo Kumponinge bokururu'ning. Karistoo' tee dii'koo baike kune'uu'nung dii' tee' nari' tee siomperi nkorarii'naang nau-antarurima. 22Teie tee oraka'nko nkovua', bakaang be'duu'koo tosi minkuvuko taaravaava'. 23Tenang teinge tee poore'aako teie tee teing poore'uria' maku'koo. Sisikeera napo' tora'pura mau'uria' teing, teka tee Kumponing-koo baka aroo'aru' koonto'na' simpe'nko~ noru'ui. 24Teie tee baka bakaang monoi ookara oraka' nkonanka nkavuu' teka aa'barata'koo, nii' tee-koo oraka' nko-koo moompira tee-koo aarumo koonto' narung-koo domamariri o'norii'naang. Dii' teing teie dato'nankai tee-koonge unaa-antarurining. 25Ai' dii' teing poorariru'ning sipisipi'pina', teka enang tororaririning tee-anko diikaang tanuaang sipisipi'pina' tanatarurimaung-anko.

will be added

X\