1 Peter 1

1Ninge Piitai teie Jiisuu' Karistoo'koong kara-okomui-nkai daarirerompimang dii' Kumponing bakaning miru'nisinuka-anko, damisimainku deentariri otorimaing anke kansi'koo, Jerusalema'keta bata'daariko aa'nairu-koo otori: Poontusi, Kalesia, Kapadosia', Eesia ee'noko Bitinia. 2Dii' teing Kumponinge Niumai temu'keta tasi'durira miru'ruru'ning, ee'noko teie Tanuaang Meekunge meeka'antaruru', Jiisuu' Karistoo' meumperii'naang, ee'noko bakaang erenge kiiroraa' antarurii'naang. Biraanke ee'noko mooa dii'koo beremparavaing. 3Biraankeampiai tee Kumponing, Bauma teie niikaang Ovoring Jiisuu' Karistoo'. Teie aa'na' piaamurira baurukaa' deeng-antamuri ponto'antamuru' nerakung domaang-koo domang purimariri nooruupiampii'naang maneena' o'noriaina'. 4Teie tee, Jiisuu' boo'keta daa'antavuu'noo'ka tee' nkomuru', baurukaa'koong barenku kompampiaina' tasi'antamurima, tee ee'nung dera'paa', orariaravaung ee'noko paa'aravaunge. Kumponinge tee tampa' tarereruri otokoo' teka paning-koo. 5Ee'noko masika'antaveriko teie bakaang iri'ke dii' napo' tarerurimatoo'naang bera tee domaang otoi-oto' oko-antaruriainoo'ke basi. Aa'nung neriari otomaung Kumponinge sira'koo te'mung asi'na'mung sirakura' oko-antamurira. 6Tee'koo doturoturariri otoriaing tee doturotu pankaing dama'nung noru'eri bane parapaara arikananka kune'erima anke kansi'koo. 7Teing arikananka teing diikaang masika'anta paara-kooning, dii' diikaang baito taa'ni'poi otoaing deeko'. Kooro tee paa'koo makosi bane nta'ke ivai'uma paara-antavaamaunge tee taa'ni'anta-koo, teka diikaang masika'anta kooro-koo dau basinoo' tampara Kumponing-koo, ee'noko tee'koo teie parapaarai nta'pina' paararuriko diikaang baito taa'ni'poi otoaing deeko' tee aa'noaing: daangang, meenasi ee'noko miring pankaing aruriaing Jiisuu' Karistoo' toroaravaina'mung. 8Dii'ke tee, bane ooveriaruko'nunge, nka pankaruntomperimaung tee. Napo' tee'ke enang ooveria' otoring tee, teka masika'antaveri otong ee'noko karange minku-paa'na' deto doturarima doturoturarimaung. 9Ai' dii' teing tee kapoo' Jiisuu'koo baitorarima piarorimaung nkaverimaing, tee tee diikaang uraang~koong domang-anta. 10Tee domang-anta tee, teinge nakaro-nupoonge~ urikupoonge Kumponinge avusiro'ari biraankemuriaina' naumaariko'ninge tampa' tasi'koo eentavarima besi'aako'. 11Tanuaang Meekunge Karistoo'ketainge ee'nara baikearara ee'noko dama'ke meenasi nkavuaina' sira'puma karantavuriko~ bateinang ee'noko naninoo' noru'koo piavoroko'. 12Teka Kumponinge nauvuru' tavo'kuaroo'naang tenang teing otoroko, teka dama'ke, enang-pina' dii' otorimaatomanang makosinang. Ee'noko enang Kumponinge tee Tanuaang Meekung paning-eta botovuio' pakuvuriko nii'ninge tee doorenang tampara sira'paama nauraarieeng, teing nakaro-nupoong biikaang minkunaa ninka manta'pai. Aing teing, bakei, koosinunankai aa'na' tampa' oo-koo piavorokoo'. 13Tee'koo diikaang onou maamurariri otoriaing Kumponing dotu-antaveriaina' besi'eri, tarerariritaa', te'mung Jiisuu' Karistoo' sira'pari poaina'mung Kumponinge avusiro'ari biraankemuriaing tee narung nooruupieri. 14Ee'noko Kumponing baurukaa' kara sionuka deentariri tee aarumo mono bakaang pia siong tero amakorariri nkorariko'nung nkoveriauka'. 15Teka tee' ee'na' tee ee'nara dii' bokururu'nung meeka'pari otomana' nari' dii' meeka'dariri otoriaing ookara nkoveriaining-koo. 16Tee' Daari Meekung-koo Kumponinge aa'pumana'koo, “Dii' meeka'dariri otoriaing, ai' ning tee meekung.” 17Kumponing Diuma tamperima tee tanatarariaing, ai' tee tee ee'nara Kumponing Simpe'nko~ ookara-koo biikaang nko-nkonanka-koo makosina', bane aremurii' naning. Aing batei-koo ootukuning-koo damisimainoo'ke otorimaing-koo diikaang aarumo koontariri otoriaing tee-koo meerupirariri. 18Dii'ke noru'eriaing dii' teing napo' moo'duru'ning tevung-eta tampoo' be'koo kaari'dariko'navung-eta diikakatauro biikaang minkunaa sintokosintoi-koong siomperiko, ee'noko tamung moo'duria' kapoo'ke orariaramaing-pina' oro'ke, aa'noko kooro ee'noko siliva'. 19Teka teie erenge maku'paa' Jiisuu' Karistoo'koonge moo'duru' teu kampianu oroo'dopanu kiiroraa'nu ereng parekavaako'nu-pina' nari' miru'ari. 20Tee tee temu'keta miru'nii' kansi' pupu'aravaruko-ita, teka teie Kumponinge oro'antavuu' tenang tee-koo batei-koo asi'noo'ke dii' paku-koo. 21Tee-koo ee'nung-koo dii'ke Kumponing masika'antaverimaung, tee aa'nung tee Jiisuu' boo'keta daa'antavura meenasi avuu'. Tee'koo diikaang masika'anta ee'noko nenneng Kumponing-koo otoaing. 22Enang tee dii' tee kara masikung siomperira diikaang domang tee kiiroraa'dariring ee'noko dii' piaa masikung ninka piaareeri otoring. Tee'koo naruna' naruna' aa'na' piaareeriai diikaang domang-eta namaia'pina'. 23Dii' teing neraka'daririning, tee booauka'nung-eta ponto'dariru'ning, booaing-eta deea', teka teieta Kumponing bakaang kara-ita domampari oto'keta. 24Daari Meekunge aa'pumana', “Ookara nantoong biikaang domaang tee baa' pina' namu'ke boo', ee'noko biikaang meenasi tee iioo' pina' namu'ke mara'oma tankavarakoo', teka tee Kumponing bakaang kara tee tee' nari' otomatoaing.” 25Tee aung kara tee ee'nung doorenang tampara dii'koo daankiampimaung.

will be added

X\