1 Corinthians 9

1Enang tee, ninka tee' orokomarako dii'koo nii'ninge tokomeriko tee aa'pamaang: Arekee', ning ee naning pankaing deea'? Ning ee kara-okomui-nka deea'? Ninge ee Jiisuu' Karistoo' ooampa'? Dii' ee sinananka deea' nkaang nko-nko-koo tee-koo Ovoring-koo? 2Ning nii'ning-koo kara-okomui-nka deeaung deeko' ning tee dii'koo sira'mari o'nopeu'nung ning Kumponing-koo kara-okovui-nka, dii' dootuu'nupoong deentariru'nung-koo, ning taaramerira. 3Nkaang kara-dimpa' teing ning tokomaamaing-koo aung: 4Arekee'? Ning ee taura'marava' dii'ankoa taamang-koo nai-koo ntong tovang-koo? 5Ning ee taura'marava' dootuu'koonani nampansira nari' nanu'koo tee' Piita, ee'noko Ovoringe baara'mainkaang ee'noko nii'ning kara okovuri nkanuka nanaamana'? 6Arekee', nee' Baanabas naanka nanaankai kemurii'ka nko-nko nkoampematoainge mono bau'koonge manta'pario'? 7Baa naning tee piatooronuka~koong tavu'koo nanuma taamange baka bau'aramaung? Baie tee taamang keempuma sinang nkavuaung? Baie tee naning kau'karenaumo-navontu bau'urimaung baka maa'kua'? Otoa'. 8Ee'noko nantoong biikaang noru' narung tee' minkuamaang ee? A, Moosesi-nung botoi tee' nari' napo' minkuvui otomaung. 9Ee'pina' daariari otong, “Boromaka'koong muring dai'eriauka' uite'koong~ sinang kau'ke ke'dee'koo botoverima, tee-koo uite'koo maa'kuaina'.” Kumponinge ee boromaka' narung noru'uitaa' tee' minkuvuu'? 10Nii' ee tee' minkumuria'? Tee aa' nii' minkumurima tee' daari-antavuu'nung. Ai' tee naning kansi'meemeng tee sinang nkavuaina' noru'uitaa' tee' meemeng-koo makosi. Ee'noko tee naning sinang-bire' tee sinang-koo nii'nariong nkavuaina' noru'uitaa' bire'koo makosi. 11Tee tee enang ninge Tanuaang bakaang kara dii'koo keempansi dei, arekee', baru' ee aa'na' manki'dori noru'erimang ning pakumeripeu'na'koo? 12Nii'ninge dii' ee' noru'daariko, “Nii' bakei bau'maarii'naang,” ninge tee' nari' baru' deto basinoo' noru'dampipeu'. Nka tee ninge bane makotuio' tee nkomarava'. Ninge arikananka bane tokoonamurii' doonko tamung meu'pamaung Karistoo'koong doorenang tampara arika'antavami'neeng-koo. 13Dii'ke ee noru'eria' teing Kumponing bakanava-koo mintoomparimaing teing tee, tee taamang teva-ita nkavamaung? Teing boontudomai mintoomparimainge tee, taamang-koo biikanariong napo' tevaro-ita nkavaamaunge. 14Tee'koo Ovoringe botomuru' nii' bakaang kara tampara nkavampiri daankiampimaing niikanariong teka tee-koo doorenang tampara-koo nkakampiainge. 15Teka teing aing ning-koo makosining tee ninge nkavampa', ee'noko ninge aung nka-koo tampama daariampa'. Makosi, ning moompaing nkavampa'. Naninge daang-antamuauka'nung ning daangamarina'koo. 16Tee, ee': Ninge daankiama tee doorenang tampara tee, tee kapoo' ning daangamaravauka'nung tee-koo. Tee, nii'navung taung o'noa', aung tee daankinang nkoamaa'noaing. Tee doorenang tampara daankiamparui dei ning tee baru' oraka' tora'pampeu'. 17Aung amurii' nko-nko aroo'ansi nkoampaing deeko' teie tampa' maku'muaing, teka aroo'amparuko etumuio' nkoampaing deeko' tamung nkoamaa'noaing moo'dopa. 18Ai' ning aremurii' moo' kompampaing? Tee aa' nkaang moo' ee' oro': tee kapoo' ninge nka-koo makosi karakara tampara-koo tee ninge nkavamparuing. Tee kara tampara ninge daankiansing kapoo' otoaruing. Tee tee ee'nara nkaang moo'. 19Ning moo' nkavama naning-koo botovotonaa' deea', teka ning ninka ootukunung biikaang botovotonaa' deeng-antamaramaung nantoong mmau' Karistoo'koo baramparama'naang. 20Ju'nupoong-ankoi tee ning Ju'nung deemaramaung Ju'nupoong baramparama'naang. Teing Moosesi-nung boto-koo kuung otoromana' ning tee' nari' tee boto-koo kuunung-pina' deemaramaunge teing baramparama'naang, bane tee ning tee boto-koo kuung o'noa'. 21Ju'deeaing baramparama'naang Moosesi-nung Boto-koo dama'due otoromaing ning tee tee boto-koo dama'dunung-pina' deemaramaung. A'noo' tee Karistoo' bakaang boto-koo kuung deemari o'noitaa' Kumponing-nung boto-koo dama'due o'noaung. 22Aruaru'oromaing-ankoi ning tee' nari' aruaru'momaunge teing baramparama'naang. Amentemeng-koo bere'maramaung aa'pama, “Makosina' nkomarama nii'ning baramparampaina'.” 23Tee ookara kapoo'nanka ninge nkoamaung tee bereng-anta-koo tee doorenang tampara, tee-koong biraanke mmau' ninka nari' kompampii'naang to'bii-antamaramaung. 24To'bii-anta tee kapoo' masikung, ai' dii'ke ee noru'eria' teing nantoong kua'parimaing deikoo'koo tee kua'parimaung namu', teka narunge moo' nkavumaung. Tee' nari' kua'dariaing moo'koo nkakiriaina'. 25Ookara moru-nupoong tee paaravarimaung bii'ka tampa' tanatavarii'naang ootukunairu-koo. Biikaang moo' tee tamung baa'koong baakopo, da'deng mara'omaung; teka niikaang moo' tee pankaroonge oto'. 26Tee'koo to'bii-antamari ning kua'maramaung. Ning tamung auvi'au ki'bitu bai'ampaung, meu'pansi naro'. 27Nkaang mono doonko si'mari meung-antamaramaung Karistoo'ke bamuu'na' oto'koo aa'pama, “Dama'ke ninka dua'mara'neenga nii'ning daankiarankotaa'.”

will be added

X\