1 Corinthians 8

1Enang tee kapoo'nanka kumponing tositosinanka-koo darimpaamaung: Nii'ke tasi'pampiri otong tee' dii'ke aa'perimaung-koo, “Nii'ke tee-koo noru' deto basi kompampiri otong siompampipeu'nung.” Teka teing noru' deto basi narung siompaamaing teing tamung bii'ka daangamparimaing. Piaae deeko' nii' naro'ka puring-antameeripeu'. 2Naninge baka daangamparama ee' noru'upeu'nung: “Ninge ootukunung kapoo' noru'ansi otong.” Nka tee teie noru'ua' tee' Kumponinge pia-antavui otoina' teie noru'koo. 3Teka naninge Kumponing domange dai'ui dei Kumponinge tee bakaang naning tasi'pui noru'umaung. 4Enang tee, arekee' noru'ampii'naang tee boontunang-koo Kumponing tositosinanka-koo akovitue darimpaamaung-koo? Makosie nii'ke nai-koo? Nii'ke aa' tee noru'ampiri otong kumponing tositosinankai kapoo' basi-antavaava' ookara kansi'koo, ee'noko amutemurii' kumponing otoroa', teka narung masikung Kumponing otong. 5Nantoonge tee, a'noo' aa'paamaung: Kumponinanka otorong ookaanka-koo paning ee'noko kansi'koo, mmau'nanka ookeng kumponinanka ee'noko ovontunanka. 6Teka nii'koo tee narung masikung Kumponing otong, tee Niuma. Ee'nara-ita ookara kapoo'nanka tavo'aramaung, ee'noko nii' tee-koo o'norimaunge. Ee'noko tee tee narung Ovoring otong, Jiisuu' Karistoo'. Tee ee'nara ookara kapoo'nanka teie pomaung ee'noko nii' teie domamariri o'noring. 7Nka tee ookarai nantoonge aung amurii' noru' noru'aava'. Nii'ning tee nantoong dii'koo-nupoong aruaru'nanka teroita, temeng-koo datavoroi otoromaung, taamang daring mme' masika'antavai otong. Ee'noko teinge temurii' naiaama pankaruntoonge tee noru'aripeu' oraka' nkoarimaung. 8Taamange tee, bane aremurii'ke, Kumponing-aape be'antamuriauka'nung. Nii' naiampiarui dei doonko si'mariarupeu' Kumponing-koo. Ee'noko naiampiri dei deto si'mariarupeu' Kumponing-koo. 9Tanatarariai dii' purintaririning, naierima teing dii'koo aruaru'oroi otoroining orari-antaverereri'neeng. 10Tee ee'pina': Naninge boontunang-koong taamang nai-koo oraka' noru'umaunge tee da' oorupeu' boontunang naiaamanava-koo naikiko temurii' boontunang-koong taamang daang pina' noru'ei. Ee'noko teie oorura piavora paararupeu' bane pankaruntoonge oraka'pina' noru'uitaa'. 11Tee' nkorarako dakaang noru'ke tee orari-antavupeu' tee da'maiko' aruaru', Karistoo' tee-koo bou'nung. 12Nii'ning nii'maikorori'koo tunsie noru'arimana' siong-koo pore'oromaung, ee'noko biikaang tunsie noru'arimana' daang-antavariaina' nkoverima dake tee Karistoo'koo oraka'nko nkoveing. 13Tee'koo tee teie taamange mmaiko' dua'antavupeu'nung-pina' ooama ninge maa' ampauka'nung tee bio', tee ntara'ma'nung dua'antavami'neenga.

will be added

X\