1 Corinthians 7

1Enang ninge maku'derompii'naang tee diikaang kara daarimemuru'nung. Tampa' ee' makosi: Naning nampeesiarava' otoaing. 2Teka orara aarumo beremparimaung-koo tee, makosi, donkaani ba'aang oto'evuainge, ee'noko manikuma ba'ung oto'evuainge. 3Ba'unge tee kapoo' nampeesi-koo bi'ari otoining piavoko ba'aang avuaing. Tee' nari' ba'aange napo' ba'ung avuainge. 4Ba'aang baka bakaang mono tanatavarava', ba'unge deeko' makosi. Tee' nari' napo' ba'ung bakaang mono tanatavarava', teka ba'aange deeko' makosi. 5Orokoraria' otoai. A'noo' oki'nung batei-koo makosi nari' karereta kunsirarema otoree'naang deeko'. Ee'noko dama'ke mono konteereai; dii'ka tanatarariaruko Sietani'ke paararuri'neenga. 6Ninge boto siompansi minkuampa' nampeesirarii'naang, teka piarorima deeko' tee makosi. 7Ninge ee' naurampimang: Nampeesirariarui dei makosi ning-pina', nka noru'ansi o'nong nii' nari' oro'nanka deea' Kumponinge naruna' naruna' nkomuru'na'koo. 8Enang ninge ee' naurampimang dii' nampeesirariaing ee'noko naaroonku: Dii' nampeesirariarui dei tampa', ning-pina' nari' otoripeu'. 9Teka dii'ka tanatarariauka'nung deeko', makosi, nampeesirariaing, karaa'ke boo' otorimaato'neenga. 10Teka ninge ee' naurampimang dii' nampeesinii'nuka, a'noo' Ovoringe tee' ee'na' botoruru'na' ee'pina': Ba'aang ba'ung-eta tonta'aravauka', ee'noko ba'unge ba'aang sipuauka'. 11Ba'aang tonta'arara deeko' tee nampeesiarava' otoaing, nii'noo' napo' ba'ung-koo tampo'aravai. 12Nii'ning-koo Ovoringe tero boto nkoevuria', teka teing-koo ninge aa'pamaang: Nii'nung Karistoo'koo baito-nupoong-koo narung ba'aang mutaanang-koonani ee'noko teni pinka'ari otoaing deeko' tee ninka nari' otoree'naang, teie tee, teni ba'aang sipuauka'nung. 13Ee'noko nii'nanie dootuu'koonanie ba'ung mutaanang-koong deeko' ee'noko tee pinka'ari otoaing deeko' teni ninka nari' otoree'naang, tenie tee, tee ba'ung sipuauka'nung. 14Donkaani mutaanang-koong teni manikuma ninka pinka'aresi tee beekaang nampeesi meeka'pari otong. Ee'noko nani manikuma mutaanang-koonani Karistoo'koonung ninka pinka'aresi tee beekaang nampeesi napo' meeka'pari otong. Ee'koo tee': Beekaang nampeesi meeka'pari otoaruko dei beurukaa' Karistoo' bakaninge biurukaa'pina' deempariarupeu'. Nka enang-pina' tee teing Kumponing bakaninge biurukaa'. 15Ee'noko naring-koo naveu mutaanang-koonaveu poka'koo piavoaing deeko', makosi, poka'aravaing. Poka'arako Karistoo'koonaveu tee-koo baru' noru' dai'aravauka', ai' Kumponinge tee da' mooa-koo miru'duing. 16Da' ba'aang ai' da' ba'ung Karistoo' masika'antavemaung deeko', dake noru'ea' nii'nung ninka otorekotaa' tokoona' nkoarapeu'nung: Domampepeu' ai' domampearupeu'. 17Nka dii' Kumponinge bokururu'ning teing nii'namurii' otooto'koo pare'dariaina' besi'eriauka', teka tee otooto' tero naruna' naruna' Karistoo'ke tankee'duri aruru'nung komperi otoriai. Aung tee boto ninge sipamaung ookara dootuu'nupoong-koo osi kante-koo. 18Naning dopa' toto'nisi bokuvuko deeko' makosi, tee' Ju'koonung-pina' otoitaa' nanuaing. Napo' dopa' toto'paravaung bokuvuko deeko' makosi, tee' nari' Ju'deeaung-pina' otoaing. 19Dopa' toto' kapoo' deea', ee'noko toto'paravaung tee', kapoo' deea', teka Kumponing bakaang boto siong tee masikung. 20Dii' temurii' otooto'koo otorimaatoaing naruna' naruna', Kumponinge tankee'durio' otoriko'na' te'mung Karistoo'ke bakaning deentarii'naang bokuruu'na'mung. 21Da' tero naning-koo botovotonaa' deentari otoko Kumponinge bokuruu'nung deeko' tee' otoi simpiri'anta-koong taung besi'eauka'. Teka doona simpiri'anta-koong oro'parako deeko' makosi simpiri'daravaing. 22Baa naning tee bokuvuing nii'nung bakaang botovotonaa' deempari otoko tee unaa-antavuing Kumponinge, ee'noko tee' nari' tee baa bokuvuing tenang nii'nung bakaang botovotonaa' deemparava' otoko tee Karistoo' bakaang botovotonaa' deempari otong. 23Da' tee moo'duu' moo'ke. Nantoong biikaang dai'nisi deentari otoauka'. 24Mmaikori' ee, Kumponing-koo ima'mariri o'noriaing te' naro' bakaang bokubokue pe'numuring-navaro-koo naruna' naruna' teke o'noritaa'. 25Enang teing nampeesiariaing-koo ning boto o'noa' Ovoring-eta, teka nkaang noru' arompimaang, Kumponinge piaamurai'nange naning dii'ke masika'antameriaing deeng-antamuu'nung. 26Ninge tee ee' noru'amaang: Nii' enang pore' kune'ampimaung-koo o'noritaa' makosi nampeesimaria' tamung o'noripeu'nung-koo tampa'. 27Arekee'? Da' da'aang-po'nunge? Teni sipeaina' besi'eauka'. Ai' da' da'aang otoaunge? Nampeainani besi'eauka'. 28Da' nemaka nampee-siraravaing deeko' oraka' nkorarava'. Ee'noko nerai'na' tee', nampee-siaravaing deeko' oraka' nkoarava'. Teka teing nampeesiariaininge tee arikung kune'aavaing kansi'koo, ee'noko ninge tee' oro' kune'eri'neeng-koo tee' minkuamaang. 29Mmaikori', ninge tee naurampimang tee aung: Batei enang apuka'paring Ovoring bakana'mung-koong. Enang-eta' deto teing bii'ankaampi-po'nupoong bii'ankaampi oto'evoroaing-pina' otoroaing. 30Teing biromparimatomaing birompariaing-pina' otoroainge. Teing dotuarimatomaing dotuaria' otomaing-pina' otoroainge. Teing moo'moo' nkoaamatomaing tee moo' nkoaava' otoromaatomaing-pina' otoroainge. 31Teing nantoong kansi'koong nko-nko nkoaamatomaing teing kansi'koong nko-nko baru' aa'na' noru'ai nkoaava' otoromaing-pina' otoroaing, ai' kansi'koong avutevu' nko-nkonanka tankinuaing. 32Ninge pia-antarampimang dii' baru' norunoru'koo paa'dariri otoriauka'. Tee naning nampeesiaravaung tee Ovoring bakaang mintoong-koo kake'iiari otomaung Ovoring dotu-antavuaina' piavoitaa'. 33Tee naning nampeesiaru'nung bakaang noru' kansi'koo otomang, teni ba'aang dotu-antavuu'naang piavoma. 34Tee bakaang onou tee poka'ari otong. Teni nampeesiaravai ai' nerai'na' bakaang noru' Ovoring bakaang mintoong-koo otong. Teni Ovoring bakanani oto'koo piavomaang ookavetara-koo, mono ee'noko tanuaang. Teka teni nampeesiaru'nani tee kansi' bakaang mintoong-koo noru' otong, tenie ba'ung dotu-antavumaatoo'naang piavoma. 35Ninge tee aung dii' ee'ning dii'ka paku-koo naurampimang, dii' poterampii'naang deea', teka tampa' toosirariri otorii'naang, mataa'irariri Ovoring-koo, tunsi paakararia'. 36Nii'nung naninge ee' noru'ui dei: nani manikuma nampeesi-koo kariviri'ai piokang napu'nisi tamung panka'koo makosi deea' nampeesiarava', ee'noko teie nari-antavuaing nampeesi-koo pakuvuitaa' tee, tee makosi, piavoaina' nkovuaing. Teie tee oraka'nko nkovua' nampeesi-koo miru'uma teni. 37Nii'na' napo' ee': naninge ninge minkuamana' aroo'ui dei, ee'noko tee' nari' nko-koo piavoi dei, tee' tampa'ke, teni nerai'na' nampeesiaravai tarevuaing. 38Tee tee-pina': Tee naning teni baurang nampeesiaravaing-koo pakuvumaung tee, kapoo' tampara teie nkovumaung; teka napo' tee naning teni tanatavumaung nampeesiaravaruko teie, tee kapoo' baru' tampara masikung nkovumaunge. 39Teni ba'aang tee ba'ung-koo bi'ari otong tenang tee domampari otoko, teka tee ba'ung boo'pari dei teni tee makosi napo' nampeesi-koo piavoaing ninka Kumponing-koo kuunge. 40Teka teni deto basinoo' dotuari otopeu' teni nampeesiarava' otoi dei. Aung tee nkaang noru', ee'noko baru'noo' ee' noru'ansi o'nong: Ning-koo Kumponing bakaang Tanuaang otoko minkuamaa'nomaung.

will be added

X\