1 Corinthians 6

1Tenang dii'koo narunge narung da'maiko' minkuminkuema aming-koo maia'doa' otong tee kara dootuu'koo taapo'ke minkueko simpe'aava'naang? 2Dii'ke ee noru'eria' Kumponing bakaning meekupoonge simpe'aariaing ookara kansi'nupoong biikaang aarumo. Da' ookara kansi' simpe'nko~ deeng-antaruko aming-koo noru'ea' otong da' makosi simpe'koo teing kapoo' oki'nareka'? 3Dii'ke ee noru'eria' nii'ke tee koosinunanka biikaang aarumo dama'ke simpe'arampiaing? Tee tee masikung. Tee tee pore' deea' simpe'koo teing kapoo'nanka anke kansi'koo nkoaramaing. 4Bane teing nantoong noru' boong basi-po'nupoong dootuu'nupoong-kooning, simpe' aaripeu'! Tee'koo aming-koo nanimang da' teing nantoong dootuu'koo noru' otoroaing-anko? 5Maia'doriaing. Arekee'koo dii'ke ooveria' otong naning narung noru'po'nung dii'koo baito-nupoong-koong dii' bake-antaruripeu'nung teieta' turanturang kenaanka naninka-koo meu'ka? 6Tee'koo ee naning noru'po'nung dootuu'koo ureaamaing-koong ooveria' ako' be'antaverererimaung tuutunang-koo~ nantoong mutaanang-koo-nupoong-koo dutakanoo'ke? 7Koonto' dua'daririning tee' dii'ka tuumpireerima. Tenang nantoonge dii'koo nii'ninge dii'maikorori'ke oraka' nkoraariko dii', ai' bakiaa'daariko, dii'koong kara-simpe' otoaruko makosi tampa' ee': Ampa'dori otoriaing dii'. 8Teka dii' tee' nkoraria' otong; teka baru'noo' oraka' dii' ee'ning namaia' makosinuka dii'ka oraka' nkoreerimaung bakiaa'deerima kara ave'eri tuumpireerima. 9Noru'eria' otong teing nantoong nampeesi orariaavaining teing Kumponing bakaang muu'koo tumpariauka'nung? Aavaraariko taaraverereriauka'. 10Ai' aing ee'ning teing ee' oro'nuka tumpariauka'nunge: Kaukauroarimaing, kumponing tositosinanka siompaamaing, nampeesi orariaamaing, nantoong bii'ka avarimaing ee'noko teing paaravaamaing oraka'nko aarumo bii'ka, bakiaa' nkonuka, mamaironto'nuka, purinto'naru' naiaama kanu'arimaing, kapoo'koo tata'arimaing, oko'oko baukonanka, deu' baukonuka, ee'noko tavu' ninka bakiaa' nkoaamaing. Tevitu avitu ee' oro'navitu tumpariauka'nung te' Kumponing bakaang muu'koo. 11Nii'ning tee dii'koo tee' ee'na' nkorariko'ning, teka Tanuaang Meekunge Kumponing-etainge diikaang domang kiiroraa'antaruru', ee'noko meeka'antarurira koong-antaruru' tee Ovoring Jiisuu' Karistoo' bakaang miring-koo kuunge. 12Dii'ke aa'peri otomaung, “Amutemurii' kapoo' taura'pari otong nii'ke nko-koo.” Teka nii'ning kapoo'nankai pakumuriaung. Amutemurii' kapoo' taura'pari otong ninge nko-koo, teka ning ninka boong si'maravauka'nung kapoo' nii'nung bakaang purinto'koo. 13Napo' dii'ke aa'peri otomaung, “Taamang tee pakosii'koo makosi ee'noko pakosii' tee taamang-koo makosi.” Teka ampa'doriauka' asi'noo'ka Kumponinge tee ookaanka tamunsi'naanka deeng-antavureaing. Nka niikaang mono arekee'? Kaukauro-koo makosi deea'. Niikaang mono tee Ovoring-koo makosi ee'noko Ovoring tee'ke, niikaang mono-koo makosi. 14Ee'noko asi'noo'ke teie bakaang purinto'ke deto daa'muriaing nii' niikaang mononanka tee' ee'na' Ovoring daa'antavuu'na' nari'. 15Dii'ke ee noru'eria' diikaang mononanka tee namarana' Karistoo' bakaang mono-koong? Arekee', makosie naninge taapo' tonta'ui dei namarana' Karistoo' bakaang mono-ita ee'noko baraa'upeu' nii'nani ninka bakaang mono bakiaa'koo baavearamai ninka? Bakei katua'! 16Dii'ke ee noru'eria' tee naning baka be'nu'aravaing teni ninka bakiaampa ninka beekaang mono tee narung mono deemparavaing? Tee' ee'na' Daari Meekunge minkuvumana' aa'puma, “Tenaanka tee narung mono deempareaing.” 17Teka baa tee narung baka Ovoring-koo avaravaing beekaang tanuaang tee narung tanuaang deemparavaing. 18Baari'antarariri otoriai kaukauroi oto'keta. Teing nii'ning oraka' nkonanka nkoampima tee mono-ita taapo'ke nkoampimaung, teka naning kaukauro nkovuma tee baka bakaang mono orari-antavaramaung. 19Ai' noru'ea' ee dakaang mono tee Kumponing bakaang Tanuaang bakaang pava meekava? Kumponinge te' sipuu' ee'noko te' ee'noo' otomaung. Tee ee'nara okovenung, da' deea'. 20Teie tee da' pankainge moo'ke moo'duinung napo' tororuma. Tee'koo dakaang monoi pankaing-antavei otoaing.

will be added

X\