1 Ninge doorenang orara taaravansing dii'koo narung-koo maritoroaramaung. Tee temurii' maritoro teie nkovumaung maremaarenamurii' nantoonge taura'koo makosi deea', bane mutaanang-koo-nupoonge. Tee temurii' bauma ba'aang ninka oto'. 2 Bakei, arekee' daangantarimaunge pankaing noru'koo ee'noko aung orara tasi'peria' maia'doriaung Orarunsiraripeu'nung-koo tampa'. Tee' nkorarima tee naning temurii' aarumo nkovumaung bata'eripeu' dii'ankoita. 3 Ning tee mono taapo' o'nong, teka nkaang tanuaang dii' ninka otong, ee'noko teke o'noitaa' tee simpe'ansing tee naning tee' maremaare nkovumaung. 4 Ninge naurampimang tee-koo niikaang Ovoring Jiisuu' bakaang miring-koo: Nari' minkunaarariai ning-koong ninka tanuaang ninka ee'noko tee purinto' niikaang Ovoring Jiisuu' bakaang ninka. 5 Tee' oosirarima bata'eri tavo'eriai tee aung naning sietani'anko bakaang mono-koo naunaua tora'purai'nange bere'arara bakaang tanuaang domamparavaina' te'mung Ovoring bakana'mung. 6 Tee' ee'na' daangantarimaatomana' tampa' deea'. Noru'eria' dii'ke ee narung naning oraka' nkoarama teie tee ootukunung naro'ka baaro'antavuring 7 Dii' Karistoo' boora moo'duru'ning tantarimaung deemparako, makosina' tanatarariaing Taamang Baari'koong~ tanatana', tee paroro Karistoo'nung boo'koong uro'kanoo'nung taa'ni'anta Ju'nupoong-koo. Dii'ke noru'eri otong Baari'koong Taamang-koo berete' iisi-po'nung uro'ke dua'aako' taamang iisi-ninka baaro'arava' narung otoko, meeka'mung-koo makosining. 8 Tee' nari' meeka'mariri o'noriaing urikung aarumo sipampiri ookara oraka' nkonanka, too'de dovang ninka, ee'noko domang kiiroraa'mori kara masikung-narung-po'nupoong deemariri o'noriaing. 9 Nkaang karavoto daariantu'nung dii'anko aa'pama, "Navurariauka' kaukauroarima otoromaing ninka. " 10 Nka ninge tee' minkuama ookara kaukauro nkonuka aung kansi'kooning minkuarampa', kapoo'koo tata'arimaing, bakisipunanka, ee'noko kumponing tositosinanka siompaarimaing tovang ninka. Teka tee a'noo' teing-eta si'dariarupeu' kansi'keta tonta'dariarura deeko'. 11 Tee aa' ee'pina' miru'ansi daarirerompiru'nung: Tamung navurariauka' tee ninka naning ninka nii'maikorori'koong tamparamaung ninka aing aa'ning ee' oro' nkoarama: Kaukauroarama, tata'arama, kumponing tositosinanka siompuma, nantoong miring orari-antavurima, purinto'naru'ke kanu'-arama ee'noko bakiaa' nkovuma. Aing nantoong tee' oro'nuka ninka nari' taamaniria' otoai. 12 Aming-koo papaararariringe nkaang karavoto deeruerima Ninge ee simpe'aramaung teing nantoong dama'du-nupoong Otoa'. 13 Kumponing narunge simpe'uriaing. Ee'noko dii' dii'ka tee'ke, teing nari' otorimaing naing simpe'ererimaing, ape' aing Bata'eriai tee naning orara dii'ankoita.
