1 Dii'ke tee nii' tamung Karistoo' bakaning kara nkanuka-pina' noru'mereriaing Kumponinge makosi-antamurining-pina' bakaning kapoo' makensi'ning nau-koo. 2 Kapoo' pankaing masikung botovotonaa'ke nkovuaing ee' oro': Kake'iiari nkovuaing tee kapoo'nanka bakaang pankainge bampuining nko-koo teie. 3 Ning arekee' Kake'iinunge Tee aa' ning baru' tee-koo noru' manki'-moaroo'naang dii'ke tokoona' noru'meriko deeko', napo' kapoo' nii'nunge minkuvuaing-koo. Ninka baakeenemarama masika'-antamaravarupeu'. 4 Tee, ning kapoo' o'noa'pina' noru'maramang, nka ninka baakeenemaravarupeu'. Teie Ovoring narunge deeko' baka baakeenemui otong. 5 Tee'koo naurampimang, enang batei makotuaruko simpe'deeria' otomatoai bera te'mung Ovoring toroaravaina'mung basinoo'. Teie kapoo'nanka baku'nisining araka-koo sipuaing mutaanang-eta, ee'noko teie ee'narai oro'anta-vuaing niikaang domang arekee' to'bii-antamariri otoina'. Tenang ee'nang nii' bakaning botovotonaa'nuka kante makosina' daangang kompampiaing Kumponing-eta, nii'ning-eta deea'. 6 Mmaikori' ee, aung tee tamung paara-antavansi minkuansing nee'koo Apolos naanka-koo ning, dii' pakururii'naang Daari Meekunge minkuvui otoina' divu'eri'neeng nantoong daangamperererima bire'ereri, dii'ka mataunuka tantarima pokapoka'dariri. 7 Baie dii'koonarung pankaing-antaruinge Aming kapoo' da' okorui otoing Ovoringe arua' Otoa'. Ee'noko teie aruio' nkavera aming-koo da' daangantaramaang nkaveaung-pina' oro'darama 8 Teing ootukuning dii' piarorimaing nkavering ee, dii'ke Dii' teing tero makosiru'ning noru'darimang Ee'noko ovontung deentariru'ninge tero dii'ka, nii' ninka deea' Bakei, tero ovontung masikeng deentaripeu'ning, nii' tee', ovontung deemaripeu'ning dii' ninka. 9 Ninge ee' ooamaang: Kumponinge nii' kara okomuri nkanuka ee'pina' oro'antamurining kansi'nupoong-koo: bore'koo simuru'ning-pina', taura'murira boo'koo ookarai paninaanka-kooninge kansi' oomaario', nantoonge ee'noko koosinunankai. 10 Nii' teing Karistoo' Ju'deeaing-koo daankiampiko kanu'nanka-pina' noru'maarimaing; dii' teing nantoong tamung norukasi'nuka tantarimaing Karistoo'koo. Napo' nii' aruaru'nuka; dii' purinto'nuka. Dii' deto noru'daarimaing; nii' doonko o'norimaing. 11 Aung teroita depeto bera enanung batei-koo nii' peeramorimaung ee'noko nukaa'morikoo'. Ata'teempima oraka' duaanamarimaung. Dimpa'nisinanka nii'. Osi oto'memuriainge nii'. 12 Birenge mintoomarima takaa'morimaung bau'marii'naang. Tenang deu'maariko kara tamparai maku'arampimaung. Oraka' nkomaariko tamung dooroomarikoo'. 13 Tenang oraka' minkumaariko nii'ke tampa' karavarampimaung. Nii' teing ookara kansi'nupoong-koo oreng deemariru'ning. Teroita nii' siikopaa'nanka deemariri o'norimaung ookara-koo. 14 Aung ninge dii' maia'anta-koo daariampa' teka dii' nari-anta-koo dii' nnurukaa' piaaru'nuka. 15 Bane nantoong dakuraaku'ke dii' Karistoo'koo tanataraarimainge, nka mmau' diumatakaampi oto'deruria', teka dii' ninge pararampiru'ning-pina' deentariru'ning Jiisuu' Karistoo'koo tee tampara doorenang naurampirio'. 16 Tee tee enang nia'dampimang ning paarameri siomerii'naang. 17 Tee'koo ee'na'koo ninge tee Timoti dii'anko botoansing. Tee tee ee'nara piaaru' nnuring kake'iinung Ovoring-koo. Teie napo' noru'antaruriaing nkaang aarumonanka Jiisuu' Karistoo'koo tee-pina' ninge dootuu'nupoong nauaramana' ootukunairu-koo oosiarimanairu-koo. 18 Nii'ninge ee' noru'erimang ning pa moaroo'naang dii'anko. Tee' noru'erima bore' pankaintarimaung. 19 Teka ning moo'naang da'deng dii'anko, Ovoringe doona amuko deeko'. Ee'noko tenang nenke'ama'naang teing bii'ka daangananka biikaang kara, iri' masikung-po'nung deeko'. 20 Kumponing bakaang muu' tamunsi'nung karai ima'arava', teka iri' ninka ima'ari otong. 21 Arekee' dii' piarorimang Ning dii'anko moo'naang bana' ninka ai' piaa ninka dooroomari
