1 Corinthians 3

1Nka ninge tee dii' mmaikori' Tanuaang Meekung-po'ning-pina' teroita kararampiaung, teka nantoong tamunsi'nupoong-pina' kararampimaung, toirekaa'pina' Karistoo'koo. 2Ninge tee dii' noonoo'ke bau'dampimaung, taamang ivekunge deea'. Dii' mme' makosiria' ivekung nai-koo, ai' dii' tee mme' mono bakanavete-koo otoring. 3Tenang dii' mamairo-koo otoritaa' ee'noko turanturang, arekee', dii' mono bakanavete-koo ee otoria', tamunsi'nupoong nkoarimana'? 4Tenang dii'koo narunge aa'puko, “Ning Paula'navitu-koong,” ee'noko nii'nunge aa'puko, “Ning Apolos-nung,” tee' karerima tamunsi'nupoong-pina' nkorarimang. 5Aming-koo dii'ke nee' Apolos naanka daangamerererimaatoinge? Nee'naanka tamung Kumponing-koo kara-pare'ka nanaanka, tamung dii'ke nee'koo masika'anta nkaveru'nung, Ovoringe nee' kantemureta botomuretu'na' nkoampeko. 6Ninge keempantu', napo' Apolosie duu'puu', masika', nka tee Kumponinge baka du'antavuu'nung tee sinang. 7Tee'koo tee naning keempumaung ee'noko tee nii'nung duu'pumaung baru' noru'koo makosi deea', teka tee Kumponing baka du'antavumaung noru'koo makosi. 8Tenaanka tee, keempumaung ee'noko duu'pumaung nari' basira; a'noo' tee Kumponinge tee' mintoomparetu'nung-koo moo'ureaing. 9Nee' tee Kumponing ninka mintoong nkora, ee'noko dii' teing Kumponing bakaning keenkeenanka. Ee'noko nii'noo'ke dii' teing pavanava-pina' otoring, Kumponing-nava, ee'noko ning tee pava kani-koo okote'. 10Teie Kumponinge biraanke-antamuio' ninge matauna' konkoroompantu' ee'noko nii'nunge pora dau kanivuu'. Teka tee baa tee naning dau kanivuainge tee matauvui kanivuaing tampamang. 11Nii'nunge naninge nii'nave natuku keeng-koo makosi deea'. Teve nave ninge keempantu'nave otoaing. Teve ee'nave Jiisuu' Karistoo'nave. 12Nii'ninge kara-naunukai dee'ma tee-koo natuku-koo dau avutevu'ke kaniaava'naang, aa'ning-pina': baa'nankai, kaveera'ke ee'noko ankaro'ke; nii'noo' kooro dovange, siliva'ke ee'noko kapang pipi'daarie. 13Teka tee dama'ke Jiisuu' Karistoo' bakaang doong urumpari tane'puma kaniau'na' sira'puaing, ee'noko teie nta' ninka paaravuaing tee pava navarona' bono'eema kaniau'nung, arevaro tampavaro, arevaro oravaro. Ee'noko moo'uriaing kaniau'na'koo. 14Teing ee'ning kapoo' tampeng-koo kanisiiau'ning taivuriauka'nung ee'noko tampara moo' nkavaavaing. 15Teka teing kapoo' orara-koo kanisiiau'ning teing taivuriaining nta'ke, ee'noko teing nantoong kaniau'ninge moo' nkavaavauka', bii'ka deeko' domamparima moo'ariaing teing-pina' nta'ke taivuriko domamparipeu'ning-pina'. 16Ai' dii'ke ee noru'eria' dii' teing Kumponing bakanava dootuu'nava pankava ee'noko Kumponing bakaang Tanuaang Meekung dii'koo otomaung? 17Ee'noko nii'nunge narunge Kumponing bakanava orarivupeu'nung dei Kumponinge tee orari-antavupeu', ai' Kumponing bakanava dootuu'nava pankava teva meekava ee'noko dii' teing ee'nava deentariri otoring. 18Dii'koo naning baka tosiaravauka'. Nii'nunge dii'koo narunge ee' noru'uauka': “Ning norukasi' enang-navaro-koo.” Kanu' tampaavai makosi Kumponing-koo norukasi' deemparavaina'. 19Ai' aung kansi' bakaang norukasi' tee kanu'aapenung Kumponing-koo duta-koo. Daari Meekunge ee' minkuvui otoina'koo, “Kumponinge tee norukasi'nanka tamparimaing bii'ka biikaang norukasi'koo taavi'antavurimaung.” 20Nii'noo'koo napo' ee', “Ovoringe tee noru'ui otong teing norukasi'nuka biikaang noru', ee'noko noru'ui otong biikaang matau katuauka'nung.” 21Tee'koo dii'koo naninge nii'nung naning miring pankaing-antavuma daangamparavauka'. 22Ai' ookara dii' diikaninge, aa'ning: Paula', Apolos ee'noko Siipas, ee'noko ootukunung kansi', domang ee'noko boo', tee kapoo' enang otoing ee'noko tee kapoo' dama' tavo'aravaing – ookara teing diikaning. 23Teka dii' teing Karistoo' bakaning, ee'noko Karistoo' tee Kumponing-nung.

will be added

X\