1 Corinthians 2

1Mmaikori', ning tee'ke, daangamarava' mou' dii'anko tee-koo karakara-koo ee'noko norunoru'koo tenang sira'pama tee Kumponing-nung kara baku'nisi. 2Ning ee' noru'maru': Kapoo' nii'ning noru'ampauka'nung dii'aapeita. Kapoo' naurampiaing ee': Jiisuu' tee Karistoo', tee Kumponinge tero Pako'pari'nii' domamurira taremuriainoo'koo, ee'noko tee aa'barata'koo boora moo'muru'nung. 3Tenang dii' ninka nari' o'noko'nang tee ning ka'duumari o'noko' naning aruaru'pina' oro'mari avoro'ke dankuranku'marapeu'na'. 4Nkaang daankinang kansi'aapenung norukasi'ke barantampia' kara menaankamoma, 5teka Tanuaang Meekunge bakaang purinto'ke masikee-antamuko aroo'dariru', diikaang masika'anta e'manuaina' naning bakaang norukasi'koo deea', teka Kumponing bakaang purinto'koo. 6Nii'ke tee tee a'noo' nantoong purimparimaing-koo tee-koo Kumponing bakaang aarumo-koo teing-koo kara makosi nauarampimaung, nka tee kara kansi' bakaang noru'koo ee'noko pankainanka-koo makosi-pina' oro' deea', teing dua'ariaining deempariko. 7Nii'ke tee Kumponing bakaang noru' makensi'nung sira'pampimang ee'nara noru' pankaing teroita maronisi ootukunung kapoo'nanka tutumparavaruko nii'ke meenasi kompampiaina' tee ninka. 8Teing ovontung enang-navaro-kooning koonto' noru'aavaruu'ning. Teinge noru'ai dei tee, Tee Ovoring Meenasi Okovenung aa'barata'koo bi'aavarupeu'. 9Tee' nari' Daari Meekunge minkuvuu'na' naurampimang, aa'puu'na', “Kumponinge tero maamu-antavuu' teing-koo domange dai'aamaing-koo kapoo' tampara naninge teroita dutai oovua', ee'noko punkange taaravua', ee'noko bakaang onou-koo tumparava'.” 10Teka nii'koo tee Kumponinge tampa' nkomuru'na' oro'antavuu' tee-koo Tanuaang Meekung-koo kuunge. Tanuaang Meekung tee ootukunung kapoo' sirapo'antanung, bane Kumponing-koo tumang masipo' otomaing. 11Baie ee'narai naning bakaang onou noru'ui otong? Otoa'. Teie tee-koonge tanuaange deeko' noru'ui otong. Tee'pina' nari' Kumponing bakaang tanuaange narunge noru'ui otong Kumponing bakaang onou. 12Enang nii'ke nkavampiring tee Tanuaang, tee kansi'nung deea', teka tee Tanuaang Meekung Kumponing-etaing tee nii'ke noru'ampii'naang teing avuavu' biraankemurima Kumponinge amuru'ning. 13Aing teing kapoo'nanka nii'ke minkuampimaing naning bakaang noru'ke deea', teka Tanuaang Meekunge naumuriko. Nii'ke ee'nara bakaang kara siompampiri siraka'antavampimaung teing kapoo' teietaning teing nantoong-koo ee'nara Tanuaang Meekung-po'nupoong-koo. 14Tee naning Tanuaang Meekung otoaung, teie aroo'uaung Kumponing bakaang Tanuaang-etaning kanu'antaning-pina' oovuma. Teing teie tasi'puarupeu' baku'nisining Tanuaang Meekunge sira'puaruko. 15Teie naninge Tanuaang Meekung-po'nunge tee simpe'ui otong ookara kapoo', nka tee, naninge ee'nara tasi'puarupeu'. 16Ai' Daari Meekunge aa'pumaung, “Baie baka Ovoring bakaang onou tasi'puitaa' kapoo'nanka nauvupeu'? Otoa'.” Teka nii'ke deeko', Tanuaang Meekung ninka Karistoo' bakaang onou-po'nupoonge.

will be added

X\