1 Corinthians 16

1Enang tee ee'pina' mooni' oosieriaing teing Kumponing bakaning meekupoong paku-koo: Dootuu'nupoong Kalesia-nameensi'ka osi kante-koo nauarantu'na' nkoveriaing, ee'pina': 2Saandei kante dii' naruna' naruna' dii'ka taakore'ning taapo' kore'dariai. Tee tee oosi bakenii' otoko ning moaing. 3Miru'ereriaing nii'ning dii'kooning, ee'noko tenang ning tavo'kamira ninge karavoto~ ninka botoarampaing diikaang avuavu'nanka ninka Jerusalema'aape be'anta-koo. 4Makosina' deeko' ning nari' meriainge. 5Ning maromaramang Masedonia'nameensi' beero'ansi nanama'naang. Masedonia' beero'ansi dii'anko moainge. 6Ee'noko dii' ninka o'noo'noriaing dee'ma, ai' pa kamaari-po'naveraa'ka-koo nari' o'noriainge dii'ke pakumeriaina' nanampainairu-koo be'koo. 7Enang tamung oki'noo'koo beero'dampii'naang piamoa', teka pankapankaroong oto'koo piamomaang dii' ninka, Ovoringe taura'muko deeko'. 8Ning Epesesie o'noi o'noaing bera Pentekos-na'mung basinoo'ke. 9Ai' doona pankaing oro'paring ning mintoomaravaing-navaro-koo sinampuriaining. Ee'noko teing ni'ninka turani'nuka mmau' otorong. 10Teka Timoti poaing deeko' dii'anko, tampa' ooveriaing tee avoro'neeng-koo tenang dii' ninka otoritaa', ai' teie tee Ovoring bakaang nko-nko nkovumaung ning-pina'. 11Tee dii'koo narunge doonko noru'eauka'. Pakuerio' danto nanuaing mooavari tee ning-anko basiaravaina'. Nii'ke nii'maikorori' ninka nempampimaang tee. 12Napo' tee-koo mmaiko' Apolos: Ninge aa'na' pia-antavantu'nung dii'anko bee'naang nii'maikorori' ninka, nka tee enang be'koo piavoa', teka tee beaing doona oovura deeko'. 13Tanterariri ima'dariri donkoniriaing diikaang masika'anta ninka, naning-naunturi purinto' ninka. 14Ootukunung kapoo' nkoveriaing piaa ninka nkoveriai. 15Mmaikori' ee, dii'ke noru'eri otong Sitepanas bakanava-nupoong teing teing teva-nupoong tutuna' bere'ariru'ning Akaia'nameensi'koo ee'noko teing to'bii-antavarimaung Kumponing bakaning meekupoong paku-koo. 16Ninge botorampimang dii'ke taaraveriaing kara teing-eta nantoong tee' oro'nuka-ita, ee'noko ookara-ita nii' ninka nari' aa'na' mintoompariaining-eta. 17Ning dotumaring aa'ning poroio': Sitepanas, Potunatus ee'noko Akaikas dii' pari'antaraari. 18Tavo'kaio' ning unaamou' ee'noko dii' tee'ke, unaaroru'. Dii'ke tee tasi'periaing teing tee' oro'nuka makosinuka tampa' noru'koo. 19Teing dootuu'nupoong osi kante-koo Eesia-nameensi'koo otoromainge tampara tantaaring. Akuila daring Pirisika' nari' teing dootuu'nupoong beekanava-koo naro'arimaing ninka piaa ninka tampa' minkuraaringe Ovoring-koo. 20Nii'maikorori' ookarai aa' otoroininge tampara tantaaringe. Dii' ookara naruna' naruna' onkeonke'deeriaing meekupoong nkoarimana'. 21Enang tee, ninge Paula'ke napo' tampara minkurampimang anaare ninge koonto' daariama nkaang birenge miring taa'ni'antamari. 22Baa naning tee Ovoring domange dai'uauka'nung barakosi' tee-koo otoaing. “Maranata” – Ovoring poaing. 23Tee biraanke Ovoring Jiisuu' Karistoo' bakaang dii' ninka nari' otomatoaing. 24Ninge piaarampimaang dii' Jiisuu' Karistoo'koo kuunge. Masikung.

will be added

X\