1 Corinthians 14

1Tee tee enang piaanavung to'bii-antarariritaa' teing avuavu' Tanuaang-etaning kong-koo paararariaing, teing-koo deto basining aa'na' piarorima, baru'noo' tee tarampee-koong. 2Baa naning tee Kumponinge kara tasi'paa' meneng-koo sipui avumaung deeko' tee, karoaing Kumponing-koo teie, teka nantoong-koo deea', ai' nantoonge tasi'paavarupeu' tee tee' oovunara menenge karoko tanuaang-eta minkuvuma teing kapoo' baku'nisining. 3Teka tee naning tarampeearamaung tee, teie kara sira'pumaung nantoong iri'antavurima, tampara aarumo siong-koo aroo'antavuri domang kuaa'antavurima. 4Tee naning oovunara menenge karomaung tee baka puring-antavaramaung, teka tee naning tarampeearamaung teie tee puring-antavurimaung teing nii'ning nari' dootuu'arimaing. 5Piamoi otong ning dii' oovunara menenge kara-koo, teka baru'noo' aa'na' piamoi otong dii' tarampeerarima kara sira'koo, ai' tee naning Kumponing bakaang kara sira'pumaung tee deto basi tee-koo naning-koo oovunara menenge karomaung-koo. A'noo' naning kara-bere' otoko deeko' makosi teie pakuvuripeu' teing nii'ning nari' dootuu'arimaing puring-anta-koo. 6Dii' mmaikori' ee, ning dii'anko mora oovunara menenge karompeu' ee'noko tokoona' kapoo' makensi'nung Kumponing-etaing oo-antamupeu'ning naurampia' deeko', kapoo' baku'nisi-koong noru' amupeu'nung sira'derompia' deeko', napo' karantamuko tarampeemarama puring-antarampiaruko deeko', ee'noko kapoo'koo nau-antarampia' deeko', arekee' dii' ninge pakurampipeu'? 7Tee-pina' kapoo' boo'nanka otoromaung, aa'ning kovi, tankovani'. Tenang nii'na' karoko arekee' kena-koong aurong tasi'pampipeu'? 8Ee'noko piatooronuka~ biikaang tuuviri nii'na' puumpupeu', arekee' teinge piatooronukai noru'aapeu' tavu'koo bokuvurimatomaung deeko'? 9Tee' nari' daka tampa' siraka'antavearuko karema dakaang menenge arekee' tasi'paapeu'? Da' aa' tamung doona-koo karemang. 10Otorong karananka amutemurii' ootukunung kansi'koo, ee'noko kareaamainge kante tasi'pai otorong noru'amaang. 11Teka ninge naninung kara tasi'pamparui dei tee naning ning karamumaatomaung damisimai ning-koo, ee'noko ning damisimaie tee-koo, ee'noko tee' pakumeerearupeu'. 12Dii' tee' nari'ke. Dii' aa'na' piarorimaung nka-koo teing avuavu'nanka Tanuaang Meekunge amurimaing. Makosi, purintariaing nka-koo temurii' dootuu'nupoong naro'ka puring-anta-koong. 13Tee'koo tee naning avuavu' oovunara menenge kara-koong oto'evuing eentavaravaing napo' tee kara bere'koong iri' nka-koo. 14Ning oovunara menenge kunsimarama nkaang tanuaang narung kunsiaramaung, teka ninge noru'ampa' tee kapoo' minkuamaung. 15Enang arekee' nkomaravaing? Tee aa' kunsimaravaing nkaang tanuaang narung ninka, napo' kunsimaravaing nkaang onou ninka. Ee'noko kenamaravaing nkaang tanuaang narung ninka, ee'noko napo' kenamaravaing nkaang onou ninka. 16Tenang dake Kumponing biraankeveko tanuaang narung ninka oovunara menenge, arekee' naning da' ninka nari' tamung otomaunge masikee-antarui “Masikung” tampupeu'? 17Bane dakaang eenta Kumponing-koo makosina' tampeinge, tee nii'nung naning paku-antavea' otong. 18Ninge tampara tampamang Kumponing-koo, oovunara menenge karomaung-koo mmau'namu'pie, dii' divu'dampiri. 19Teka dootuu'nupoong naro'arimanoo'ke namoora'noo' sirapo'ke kara-koo piamomaung, baru' oovunara menenge karoma doong o'anta-koo piamoaung. 20Mmaikori' ee, bakerariaing toire' biikana' noru'koo. A'noo', orara matau-koo toire'pina' amakorariri otoriaing, teka petaa'doriaing diikaang noru'koo. Aa'periauka', “Oovunara menenge kara tee taa'ni'anta pankaing Kumponing nii'anko otomaung-koong.” 21Ai' Kumponinge naunaua-antavurii'naang mau'urima Isireeli-nupoong-koo aa'puu', “Akoing-koo karoma karavarampaing nkaning, akoing biikaang karai. Teka bane tee' nkoanko taaramaavauka'nung.” 22Daari Meekunge tee' minkuvuio' nii'ke noru'ampiri otong tee oovunung menenge kara tee taa'ni'anta makosi, teing-koo masika'anta oto'evoroining-koo deea', teka teing-koo masika'anta-koo kontevoromaing, teing koono-anta-koong. Ee'noko teka tee tarampee tee masika'anta-po'nupoong biikaang, masika'anta-koo kontevoromaing biikaang deea'. 23Ai' dootuu'nupoong oosiarira ookara oovunara menenge kareaako tenang nantoong tamung masika'anta oto'evoroaing te' poropeu', porora aa'paapeu', “Dii' kanu'daririning!” 24Teka ookarai tarampeerariko naning damisimai, nii'na' naning masika'anta oto'evuaung pora taaravuko tee ootukunung taaravupeu'ning karai too'pupeu' tee, noru' tante-antavuma. 25Kapoo' bakaang makensi'nanka sirapo' po'antavupeu' ee'noko miinge keemparara Kumponing daangampupeu' aa'puma, “Kumponing masika' dii'anko otong!” 26Arekee', dii' mmaikori'? Tenang dootuu'koo naro'darima avutevu' nko-koo piaroriaing makosi, nii'nung kena ninka, nii'nung nau-anta ninka, nii'nung Kumponinge sira'naare ninka, nii'nung oovunung menenge kara, nii'noo' kara-bere' ninka, teka ootukunung nkoverima teing nii'ning dootuu'nupoong puring-antana' nkoveriaing. 27Oovunung menenge kara otoko deeko' makosi kenaankara deeko' nii'noo' beenaumo-koo basi oovunung menenge kareaapeu', ee'noko doompeitaa', ee'noko nii'nunge biikaang kara bere'evuriko. 28Teka dootuu'koo naro'arimaing-koo naning kara bere'umaung otoaruko deeko', makosi kareaavauka'nung teing nantoong oovunung menenge kara-koo piavoromaing. Tamung bii'ka kareaavaing Kumponing ninka. 29Teing-koo nakaro-nupoong~koo makosi, kenaanka nii'noo' beenaumo kareaavaing, ee'noko ookara baroromparirio'. 30Tenang nii'nung karoi otoko nii'nung-koo Kumponinge kara-sira' tavo'kupeu' naning ba'nampari otomaung-anko, makosi tee tutuna'nung bakearavai. 31Dii' teing ookara batei oto'deruriaing diikaang kara minku-koo Kumponing-etaning tarampeerarima naruna' naruna', ookara barerarira tampara aarumo siong-koo domang kuaa'antareeriaing. 32Teing nakaro-nupoong bii'ka bake-anta-koo makosi, nii'noo' nempariai nii'nung batei-koo. 33Ai' Kumponing tee toosi-paa'koong deea', teka mooa-koong. Ookara dootuu'nupoong osi kante-koo nkoarimana' tee' nari' nkorarii'naang naurampimang. 34Maniku' teie, dooroomparimatoai dootuu'koo naro'darima. Teing kara-koo taura'paria'. Teing tamung doonko otoroaing tee' Moosesi-nung botoi minkuvui otoina'. 35Kapoo' noru'koo piavorora deeko' biumatakaampi tana'aariaing osia, ai' maniku'koo tee maimaia' dootuu'koo meu'ke kara-koo. 36Arekee'? Dii' ee okora'nuka tee Kumponing bakaang kara? Ai' dii' nainge nkaveru'nunge tee Kumponing bakaang kara, nii'ninge deea' ee? 37Nii'nung naning ee' noru'ari dei, “Bakei nakaronara ning,” nii'noo', “Tanuaang-etaning avuavu' oto'memuing,” noru'uaing teie tee kapoo' ninge daarirerompimatomaung dii'anko tee ee'nara boto Ovoring-etaing. 38Baa naning tee tara'oa' taaravuaing tee napo' naninge taaravuauka'nunge. 39Tee'koo, mmaikori', bia'doriaing tarampeerari minku-koo, teka oovunung menenge kara poteveriauka'. 40Teka oosirarimanoo'ke ookara kapoo' makosina' nkoveriaing narung mono-koo-nupoong pakureeritaa'.

will be added

X\