1 Corinthians 13

1Piaa tee kapoo' masikung ee' oro': Bane ning karompeu'nung dei teie karakarai amutemurii'nankai ookenge nantoong biikaange ee'noko koosinunanka biikaange, teka piaa o'noarui dei ning-koo, ning tamunsi'nung kareng kenkorinumaung-pina', tankeri' aako keeiinumaung-pina'. 2Ning oto'memupeu' avuavu' tarampee~ koong ee'noko ookara kapoo' makensi'ning noru'ampeu'nung-koong ee'noko ookara kapoo' opansi noru'koong, ee'noko tee masika'anta iu'nanka tonta'koong makosi oto'memupeu', teka piaa oto'memuarui dei tee ning kapoo' deea'. 3Nii'noo' ata'oi'nuka bau'arama kapoo'nanka o'marapeu', nii'noo' nkaang mono amarapeu' arikung kune'koo daangang nka-koo, teka piaa oto'memuarui dei, kapoo' nkavampeu'nung otoa' tee-koo. 4Piaa tee oraka' nkoaako da'deng maku' deeaung; 5Piaa tee nantoong tampa'nko, mamairo deea'; 6Piaa tee baka daangang deea', nantoong baa'pina' noru' deea', makotua'na'nko deea', baka nii'ning puru'na' besi' deea', iirankesi' deea', orananka-koong deeru tarevua' otoo'naang, mero' noru'uaung, dotuaravaung orara-koo, teka doturotuarakoo' kara masikung siompaamaing ninka. 7Nii'nung naning piaavema deeko', bane aming kapoo' tavo'kuko, dake doong kante sipeauka'nung tee, tee masika'anta-koo piaromaatoaing, tampa' nkoaravaing-pina' noru'emaatoaing, ee'noko purintari tee paku-koo otomatoaing. 8Piaa tee doong kante makotui otomaung, teka tarampee-koong karananka deeko' teing bakearavaing. Oovunara menenge karananka deeko' teke oparavaing. Kara noru'po'nung deeko' teke botu deemparavainge. 9Tee avuavu' noru'koong nkavampimana' dupearavaung, ee'noko tarampeemarimana' dupearavaunge. 10Teka ookara kapoo' masikananka dupeariri oro'pariko, teing kapoo' dupeariaing piamoriauka'nung. 11Tee ee'pina': Tenang ning tooto'mari ning tooto'pina' karonko', tooto'naunge noru'anko', ee'noko tooto'pina' taarakanko'. Enang tee panka'marara tooto'pina' napo' nkomarava'. 12Nii'noo' ee': Enang nii' tee' ookampimaung uu'aa' paparo-koo ookampipeu'na', teka dama' oing bari'meeri oomeeriaing. Enang tee nkaang noru' dupearava', teka dama' tee ninge dupeansi tampa' tasi'pampaing tee-pina' Kumponinge ning o'mui noru'mui otoina'. Tee'koo aa'pamaang: Piaa tee kapoo' masikung, ai' doong kante makotui otomaung. 13Ee', aing beenaumo kapoo' pankaroong otomatoaing aa'ning: masika'anta, Ovoringe moo'muriaing-koo noru', ee'noko piaa. Teka pankaing masikung teing-koo napo' tee piaa.

will be added

X\