1 Corinthians 12

1Enang dii' mmaikori', ninge dii' noru'koo pia-antarampimang teing kapoo'nanka Tanuaang-etaning avuavu'. 2Dii'ke noru'eri otong tenang dii' mutaanang-koo otoriko'nang Kumponing tositosinanka siompereri poorarima noru' masikung nkaveriaruko'. 3Nka tee dii' enang sirapo'aaperaririo' naurampimang Kumponing bakaning nantoong masikeng tasi'pereriaina'. Nii'nung naninge Jiisuu' barakosi'koo tampuko noru'eriaing tee naning Kumponing bakaang Tanuaang-eta karoaung. Ee'noko naninge Jiisuu' tee Ovoring tampuko noru'eriaing tee naning Tanuaang Meekung-eta karomaung, ai' naninge tamung tee' minkuvuarupeu'. 4Teing mmau' Tanuaang Meekung-etaning avuavu' otorong, teka Tanuaang teing avurimaung tee narung masikung. 5Teing nko-nkonanka tee amutemurii' otorong, teka narung masikung Ovoring Jiisuu' Karistoo'. 6Napo' nii'ning otorong amutemurii' iri' Kumponing-etaning mintoomparimaing, teka Kumponing tee narung masikung teing kante-koo mintoomparamaung. 7Tanuaang Meekung bakaning nantoong-koo ookara-koo kante avutevu'ari taa'ni'antavaramaung, pakueea'naang. 8Nii'nung-koo Kumponinge kara matau-po'nung makosi-antavumaung Tanuaang Meekunge. Nii'nung-koo kara noru'po'nung avumaung teie narunge Tanuaange. 9Nii'nung-koo arikung kune'uko masika'anta deto basi avumaung teie narunge Tanuaange. Nii'nung-koo Tanuaang-etaing avuavu' siipa-po'nupoong taare-anta-koonung avumaung teie narunge Tanuaange. 10Nii'nung-koo nko-nko deto basi nko-koong avumaung. Nii'nung-koo tarampee-koong avumaung. Nii'nung-koo iri'nanka Kumponing-etaning ee'noko oreng simpe'koong noru' avumaung. Nii'nung-koo Kumponinge kara tasi'paa' meneng-koo sipumaung minkuvuu'naang. Nii'nung-koo napo' oovunara tasi'paa' menenge kara bere'koong noru' avumaung. 11Aing teing ookara narung Tanuaang bakaning nko-nkonanka. Teie ee'narai tankaampumaung naruna' naruna' kante piavomana'. 12Tee ee'pina': Naninung mono tee avatevaro-po'nung, nka teing avatevaronanka tee narung mono. Karistoo' bakaang mono tee' oro'ke. 13Bane nii' Ju'nupoong nii'noo' Ju'deeaing, dai'nisinuka nii'noo' dai'ariaing, nka tee narung Tanuaang-koo kuunge meeka'antamariru'nung-koo tee nii' narung mono deemariri otong ee'noko tee ookara narung Tanuaang okomuring makosina' iri' nka-koo. 14Naning-koong mono nari' oro' deea', nka tee avatevaro. 15Kau'ke deeko' aa'pui dei, “Ning aa' bireng deea', tee'koo ning mono-koo-navio' deea',” teie temurii' karai tee mono-ita bita'aravarupeu'. 16Ee'noko dome'ke deeko' aa'pui dei, “Ning aa' duta deea', tee'koo ning mono-koonavio' deea',” teie temurii' karai ee temono-ita bita'arapeu'? Otoa'. 17Ootukunung mono duta narung deempari dei, taara-nko are' otong? Napo' ootukunung mono dome' narung deempari dei nuuraa'nko arerai? 18Nka tee masika'pari otoina' ee': Kumponinge avitevio' be'nu'uring kantena' narung mono-koo tee' nari' nii' narung mono-pina' oto'koo bamuru'na'. 19Ookara mono-koo namaranoo' naro' otoi dei, arekee' mono tampampipeu'? 20Nka tee masika'pari otoina' ee': Avatevaro otong teka narung mono tee. 21Dutai aa'puarupeu' bireng, “Ning da' piamoa'.” Napo' bore'ke kau' tee'puarupeu'. Katua'. 22Nii'nairu mono-koo aruaru'nairu tampampimanairu tee tenairu-koo makosina' nkovupeu'. 23Ee', nii' dotumarimaung otoko nii'nairu mono-koo oraka' oonairu, ee'noko tee tampa' masika' nepu'mariri duaanamarimaung oo-koo makosinairu deea'nairu. 24Teka tee tampa' oonairu baru' tanatavampiaung. Tee' nari' Kumponinge mono be'nuve'nu'uu' nepu'arava'nairu nepu'ui. 25Tee'koo tankatankaang otoaroo'naang mono-koo, teka navarona' mono tampa' tanataveeai nari'. 26Nii'navaro mono-koo sisikeeravoko tee ootukunairu nari' tora'paavaing. Navaroi daangang nkavuko deeko' ootukunairu nari' dotuariaing. 27Enang tee dii' Karistoo'koong mono, naruna' naruna' avatevaro otoring. 28Ee'noko Kumponinge bakaning dootuu'nupoong-koo aing ee'ning miru'uru': tutuntoma teing kara okovuri nkanuka, kemu'kana' teing nakaroarimaing~, beemu'pina' teing kapoo' Kumponing-etaning naunuka, teketa teing iri' ninka nko-nko nkoaamaing, teketa teing Tanuaang Meekung bakaang avuavu'po'nupoong siipa-po'nupoong taare-anta-koong, teing nko-nko pakupaku-po'nung nkoaamaing, teing nko-nko tampa' tankaampaamaing nantoong-koo, ee'noko teing kara tasi'paa' oovunara menenge kareaamaing. 29Arekee', ookarai kara okovuri nkanuka naing ee? Ai' ookara ee nakaronukai? Napo' ee ookara kara-naunukai? Ai' ookarai ee iri' ninka nko-nko nkoaamaing? 30Ookara ee tee avuavu' taare-anta-koong oto'evorong? Ookara ee oovunara menenge kareaamaung? Ookarai ee kara bere'aamaung? Otoa'. 31Teka paaraveriaing tee Tanuaang Meekung bakaning avuavu'nanka pankeng masikeng nka-koo. Ee'noko ampa'doriauka' piaanavung navunge avuavu'nanka kong-koo makosi.

will be added

X\