1 Corinthians 11

1Barerariaing ning-koo ning Karistoo'koo baremaramana'. 2Dii' teing tampenanka tantampimaang ning norunoru'merimaung-koo ee'noko tee naurampiru'nung aarumo tampa' ima'eri otomaung-koo. 3Teka ninge dii' pia-antarampimang tee Karistoo' noru'erii'naang tee tee Bore' ookara donkaang kante-koo, ee'noko donkaani tee manikuma-koo bore', ee'noko Kumponing Karistoo'koo bore'. 4Baa donkaani kunsiaravaing nii'na' tarampeearavaing~ bore' daka'paritaa' tee tee Karistoo' dore'ua' otong, bakaang Bore'. 5Nii'nani manikuma oosirarimanoo'ke kunsiarapeu' nii'na' tarampeearapeu' bakaang bore'koo baarong maniku'koo makosina' kurumparava' tenie tee ba'ung dore'ua' otong, tee bakaang bore'. Teni tee teni-pina' nari' dapo kaariarinani-pina' maia'po'nani. 6Nii'nani manikuma bore'koo baarong kurumparavarupeu'nani makosi, dapo opui napu'arapeu', teka kaariari oto'koo maia'opeu'nung deeko' makosi maniku'koo makosina' baarong kurumparavaing napo', bore' daka'pui. 7Donkaani tee bore'koo baarong kurung-koo makosi deea' dootuu'koo oosirarimanoo'ke, ai' teie tee tavo'antavumaung Kumponing bakaang oro'oro'na' ee'noko tee meenasi bakaang; teka manikumai donkaani bakaang meenasi tavo'antavumaung. 8Tutuntoma tee donkaani manikuma-ita Kumponinge nkovua', teka manikuma donkaani-eta nkovuu'. 9Donkaani tee Kumponinge manikuma nkoevua', teka manikuma Kumponinge donkaani nkoevuu'. 10Tee'koo manii'koo bore'koo baarong kurumparimatoaing taa'ni'anta-koo donkaani deto deeng-antavui, ee'noko koosinunankai ooaama dotuarimatoai. 11A'noo' tee ee'koo: Manikuma donkaani-eta tonta'arava', napo' donkaani manikuma-ita tonta'arava' Kumponing bakaang aarumo-koo. 12Tee' nari' manikuma donkaani-eta nkovuu'na'koo napo' tee' nari' donkaani manikuma-ita ponto'aramaung, nka aing ookara teing Kumponing-etaning. 13Dii'ka-koo arekee', oosirarimanoo'ke bore'koo baarong kurumparava' manikuma ee kunsiarapeu' Kumponing-koo, makosie? 14- 15Enanaroong-koo nii'ke nantoong-koo nkoaramana' ooampima dei tasi'pampipeu' makosina' ee': Narung donkaani dapo isikung otoi tampa' deea', ee'noko nani manikuma dapo isikung oto'evuitaa' tee tampa', ai' tee tee bakaang meenasi. Aming-koo, nna' Kumponinge tee dapo avuu' bore' daka'koo. 16Baa nii'nung naning minkuminku-koo piavoko ee' naurama'naang, “Nii'namurii' aarumo oto'memuria', ee'noko Kumponing bakaning dootuu'nupoong osi kante-koo oto'evoroa'.” 17Naurampima aing botovotonanka napo' narung tuumpi oto'memung ninge minku-koo ee': Dii' naro'darima oraka' nkoverimatoininge tamparananka daka'purimatoi. 18Tutung tee taaravansieeng dii'koo tankatankaang otong tenang dii' dootuu'koo naro'darima, ee'noko ninge masimasika'antavamang. 19Aming-koo, nna' aarumo tankatankaang tee masika' tavo'kuaing dii'koo tasi'pampiaina' baata areing masika'pariri otong. 20Tee tee taamang dii' nai-koo naro'darimaung Ovoring-nung tamperima Ovoring-nung taamang deea', 21ai' tee tee nariona' dii'ka naierimaung ee'noko tee'koo nii'ning peeravorokoo' ee'noko nii'ninge naiaamatoma kanu'antavarikoo'. 22Arekee', osie diikanoo'ke taamang ee'noko ntong tovang ee naieriarupeu'? Kumponing bakaning dootuu'nupoong ee oki'na'anta-koo piarorimaunge, ee'noko ata'oi'nuka maia'anta-koo? Are'dampii'naang ninge; daangantampii'naang? Bakei, katua' tee'koo. 23Tee pare'naanta ninge naurampiru'nung Ovoringe baka po'antavuu'nung. Te'mung muunga Judasie tooka kompura kare-nupoong-koo sivuu'na'mung Ovoring Jiisuu'ke berete' nkavura, Kumponing-koo tampa', tampura tenang pisi'uu' ee'noko aa'puu', 24“Aung tee nkaang mono makosi dii' nee'dampima boo'koo taura'maring. Ee' naierima ning noru'merimatoaing.” 25Taamang bakearako tee tee' nari' napo' tereng uaini-po'nareng nkavura aa'puu', “Enang-eta deto areng-koo naikirima ee' noru'merimatoaing, ninge Kumponing ninka nerakung kara naroong-anta nkaang erenge pinka'antavantu'nung dii' domantarii'naang.” 26Tenang naierima aung berete' ee'noko tuaantarima areng-eta' dii'ke sira'perimatoaing tee Ovoring dii'koo boo'paru'nung poainoo'ke basi. 27Tee tee enang naning tee berete' naivuaing tuaamparama tereng-eta Ovoring bakanareng-eta makotua'na' nkovuma tee tee tuumpivuaing mono-koo ee'noko ereng-koo Ovoring bakaang-koo oraka'nko nkovuing-koo. 28Naning tee tutung baakeenearavaing baka mme' naivua' bakanavio' berete'koo ee'noko teru' tereng-eta. 29Ai' tee naning Ovoring bakaang mono tampa' tasi'pua' naivuaing tee tee baka orari-antavaravaing tee-koo naivuing-koo. 30Tee'koo ee'na'koo mmau' dii'koo-nupoong aruaru'oromaung ee'noko siipavorokoo' ee'noko mmau' boo'parikoo'. 31Tutung dii'ka tampa' simpesimpe'daripeu'ning deeko' teie orameng-koo simpe'duriarupeu'. 32Teka Ovoringe orameng-koo simpe'durima tee, teie koong-antarurimaung baurukaa'pina' asi'noo'ke dii' kiimata-nupoong tanturi'neeng-koo kansi'nupoong ninka nari'. 33Tee'koo mmaikori', taamang-koo naro'darima tampa' navurariri tata'deeria' naierimatoai. 34Nii'nung peeravoko osie taamang-antaverimatoai diikaang naronaro' kiimata-po'nung deempara'neenga. Dama'ke mora napo' nii'ning naurampiaing.

will be added

X\