1 Corinthians 10

1Enang tee mmaikori', ninge noru'antarampii'naang dii' piamoing teing niumaraang Isireeli-nupoong-koo nkoaru'na' tasi'perii'naang. Teing ookara kamo'ka boonge nanau'ning, ee'noko ookara pirung meu' toto'pai tankinau'. 2Ee'noko tee kamo'naanka-koo pirung kuunge nanau'nung miru'noo' tee ookara tee' meeka'antavariru' Moosesi-koo kuung-nupoong deemparima. 3Ee'noko arikanameensi'ke nanaama taamang tovang ntong otoa'nameensi'ke ookarai taamang tee narung Tanuaang-etaing naiaako'. 4Ee'noko ookarai teri nari ntonari Tanuaang-etanari naiau', teieta boia' Tanuaang-aapeita tuuvuko. Ee'noko tee enang noru'ampiri otong tee boia' tee Karistoo' ee'nara teing ninka nanaako'nung. 5Nka, bane ookara biraanke-po'nupoonge, daping ookara-koo teing-koo Kumponing tee dotuaravaruko' biikaang aarumo orara-koo, ee'noko nanaama avitoitoi booroma biikaang mono dera'oroko' mee'bora' sirakamaa'koo. 6Teing ee'ning kapoo' nkoaru'ning teing taa'ni'anta nii'koo nii' koono-anta-kooning oraka'nko piamori'neeng-koo teing-pina'. 7Tee'koo kumponing tositosinanka daangamperereria' otoaing teing-koo nii'ninge nkoaako'na'. Daari Meekunge tee naumurimaung teinge kumponing tositosinanka siong-koo bareariko'na' aa'puma, “Teing nantoong paroro pankaing nkoaama, taamang ntong tovang naiaama, donkonaarai'nange moruarima siong-antaveeko'.” 8Ee'noko kaukauro nkoveriauka'nung. Teing-koo nii'ning tee' otorokotaa' kenaanka kivora-ita beenaumo kokorei' [23,000] dua'arira boorou'. 9Ee'noko nii' Karistoo' iirang-antana' nkomariauka'. Teing-koo nii'ning tee' nkoarikotaa' booroko' boru'ke kakiaariko. 10Ee'noko ukuusirariauka' Kumponinge pakururiaung-pina' tantarima. Teing-koo nii'ning tee' nkoariko'ning Orari-antai boo'antavuru'. 11Aing teing kapoo' teing-koo nkoaru'ning nii'ke oo-koo taa'ni'antananka, Kumponinge daari-antavuu'ning koono-antamurima nii' asi'naroong-koo o'norining naumurima tutuna'nupoong nkoarima opariru'na' biikanaroong-koo. 12Tee'koo nauramaang, da' purintari donkonii otomaung-pina' noru'dari deeko' bakei tampa' masika' tanatararavaing dua'dara'neeng-koo. 13Teka tenang kapoo' arikung deeko' ai' orara aarumo-koong piai meu'duko deeko' ee' noru'eaing: da' ookara paara-anta puru'koo makosi. Mmau' da'koo uro'nupoonge nantoonge temurii' paara-anta kune'au'nung. Kumponinge bakaning sipuriaung, ee'noko teie tee paara-anta taura'puauka'nung da' puru'koo, teka tenang paara-anta poko teie tee da' puring-antaruaing mmari'navung nauruma. 14Tee tee mmaikori' ee, baari'antarariri otoriai kumponing tositosinanka siong-eta. 15Ninge daariamang dii'koo dii' onou-po'nupoong noru'dampima. Tasi'peri pinka'eriai kapoo' ninge naurampimatomaung dii'. 16Tereng biraanke-nareng biraanke-antavampima-narenge ee nii' naro'kamuriaunge tee ninka ereng Karistoo' bakaang ninka? Tevio' taamanavio' pisi'meerimanavio'ke ee naro'kamuriaunge Karistoo'koo mono ninka nari'? 17Tee aa' naro'kamurimaung, ai' tevio' tee navio' masikavio'. Bane mmau'ke nii', narung mono deeng-antamurimaung naro'ke tevio'ke pisi'meerima ookara. 18Oovereriaing teing Isireeli-nupoong Kumponing siompaamana'. Tenang taamang naiaama Kumponing-anko boonturomai darimpaamaung, arekee', Kumponing ninka ee teing naro'kavariaung? 19Enang arekee' miru'ari otong? Kumponing tositosi ee kapoo' masikung? Ai' tee kumponing tositosi-koo darimpaamaung ee kapoo'ke? 20A, tee' deea'. Tee ninge minkuamaatomaung kapoo' tee teing Ju'deeaing boontuarima, Daari Meekunge minkuvui otoina' aa'puma, “Teing ma'nari-koo boontuarimaing, Kumponing-koo deea'.” Ee'noko piamoa' ma'nari ninka pisi'deerii'naang. 21Dii' tuaantariauka' ookarenta-ita, aa'noko Ovoring bakanareng-eta ee'noko ma'nari biikanareng-eta. Tee' nari' napo' ookavaako'ka-ita nari' taamaniriauka', aa'noko Ovoring bakanavaako'keta ee'noko napo' ma'nari biikanavaako'keta. Tee' makosina' deea'. 22Arekee', Ovoringe iirai uipaarii'anta-koo piamorimaunge? Arekee', nii' tee-koo ee dau basinoo' iirakutanankai? 23Dii'ke aa'perimaung, “Amutemurii' kapoo' taura'pari otong nii'ke nko-koo.” Nka tee, ookara kapoo' pakupaku-po'nung deea' nantoong-koo. Amutemurii' kapoo' taura'pari otong nii'ke nko-koo masika', teka ookara kapoo'nankai puring-antamuriaung. 24Naning baka tanatavarama otoauka'. Ookara tee naruna' naruna' tanatameeriaing tampa' oto'koo. 25Tee ee'pina': Kara otoaruko deeko' kapoo'nanka baaveroma baaveaavaining tee makosi, naieriaing, nka nia'kiria' boontunang-koo darinii'pina' norunoru'erima. 26Ai' “Ootukunung kansi'po' tee Ovoring bakaang.” 27Ee'noko da' naninge masika'anta oto'evuaunge bokuruko nanu'koo piarora deeko' makosi, naieaing ookara kapoo' aruaining nia'kia' boontunang-koo darinii'pina' norunoru'era. 28Teka nii'nung naninge aa'duko deeko', “Aung kumponing tositosi-koo darinii',” tee, tee'puko naieauka'. Tevunge tee naning bakaang masika'anta orariearupeu' ee'noko bakaang domang mooavari otopeu'. 29Ninge da' dakaang domang minkuampa', tee bakaang domang minkuamaang. Bane nia'kia' naiemaung, nii'nunge ooruma oraka' noru'du'neeng. 30Ninge tee naiamira deeko' Kumponing-koo tampara tampampeu', teka naiampauka'nung. Piamoa' nii'nunge ning oraka' noru'muu'naang. 31Tee'koo taamang-koo naikima ntong tovang-koo, aming kapoo' nkoveaing-koo, nkoveaing ootukunung kapoo' Kumponing pankaing-anta-koo. 32Nii'nung naning dua'antaveauka', arera, Ju'nung deeko', Ju'deeaing-koong deeko' ai' Kumponing bakaning dootuu'nupoong-koong deeko', tee' nari' ookara nantoong ninge dotu-antavaramaung avuntevunge. 33Ninka paku-koo besi'marava', teka ookara nantoong paku-koo moo'arii'naang.

will be added

X\