Taetos 3

1Lii ba ŋɔ báa pwɛr ba te dɛɛ tɛ nomonome baa dɛ di kpegri te bɛlbwa, dɛɛ no ba deŋna wa, dɛ kpɔ ba te kɛ baa dɛɛ ɛ waa aa wera bwaa. 2Ŋɔ ba be ba bɛ nɛra bwara wechɔge dɛɛ bol, ba bɛ dɛɛ nagre, báa pwɛr ba te, dɛɛ tɛ nomɛlbwa duure. 3Maa dɛ ŋɔ naa, ya gbabir fa gɛnɔ. Ya fa ɛ deŋnekpeg tena. Ba fa negre yaa, pɛlchɔga ne bodia kpɔ yaa berɛ yoma. Meesɔɔh ne bɔweela bwa nee ya faa so. Nɛra fa hah yaa, ya ge hah dɔŋa. 4Kɛ ya Lɛɛ Korowii aa le chae waa cha yaa la ne o nyina waa dɛ nyin nɛn ne asɛ ya jemɛ a waa la, 5o lɛ yaa ta. Ya wedɛɛga waa laa o lɛ yaa ta. Sunaa o sune ya nɛɛ dɛ lɛ yaa ta, dɛ sɔ yaa nee ya won do kɛ baa bera kwaa lolɛ yaa. O Domadɛɛge waa kpɔa tɛ yaa o kwaa yaa la nɛɛ ya che dɛ dɔ mkpafale. 6O Domadɛɛge waa kpɔa tɛ yaa la, ya Lɛɛ Yeesu Kristo waa o koh tɛ yaa kohona. 7Korowii aa sune ya nɛɛ dɛ cha yaa dɛ gel ya ɛ nɛndɛɛga ya waa su o siwi la, ya dɔ hwɛga kɛ o mkpa aa wola jaga dɔe bwa la ɛɛ ɛ ya konee. 8Waa nɔ bwa ɛ kpela. Anomanta dɛɛ berɛ a bagla ɔma ásɛ nɛra baa no Korowii waa dɛ yarada la swɛɛ siwi dɛɛ ɛ wedɛɛga. Gɛɛ wera dɛ dɔ tɔnɔ tɛ nomɛlbwa. 9Kɛ laa he te kpɔ gɛne wetɔŋla ne gɛ he naanar aa teŋɛ dɔŋa nɛɛ waa bini bagla ta, ne nagrenyin, ne Mmara ŋwɛnɛre waa tɔŋla ta. A ta tɔnɔ bɛlbwa dɔe. A ɛ wepuu. 10Nɛn waa dɛ ba nɛra baah pegra ne la, bol waa baglo ó gel. Dɛ o ta teŋɔ dɛɛ ɛ aa, bol waa baglo ja. Dɛ o ta he nɛɛtena waa la noɛ yaa, he ne o bɛ wobɛlbwa ta pɛ. 11Jemɛ kɛŋɔ nɛn waa do gɛ la vɛh kasinteŋ waa la. O gbabir jemɔ kɛŋɔ o dɛ ɛ wechɔga gba, kɛ dɛ ge taa ɛ. 12Dɛ n tomɛ Aatemes kɛɛ Tichikos he be naa, takapɔ dɛ ba n be Nikopolis warane. N ɛ n liire kɛ ń ka so bela alalawo saŋ. 13Takapɔ dɛ cha Sɛnos waa ɛ mmara jereme la ne Apolos bá won la ba ŋwɛnɛ la. Bɛ gel komɛlbwa baa kpɔ la ŋwɛnɛ la waa hiah ba. 14Gel yabala bwa hweli wedɛɛga ɛɛ, dɛɛ cha nɛra aa hiah ba, dɛ bɛ nɛra baa wola tɔnɔ dɔe ɛ. 15Nɛra n ne baa lɔ bonɔ la bwa dɛ nae. N dɛ na nɛra baa dɛ nyin yaa ya ne baa yarada Yeesu la. Kórowii cha he bwa.

will be added

X\