1 He te, a chɛ kɛ hɛɛ bagle Korowii waa aa ɛ kasinteŋ a ŋwɛnɛ ta kɛrɛdɛ. 2 Ŋɔ banjeni be báa lawɛ ba te, dɛɛ ɛ waa aa dɔ duure, dɛ dɔ nfɛrɛ, dɛɛ teŋɛ Korowii waa aa ɛ kasinteŋ kɛrɛdɛ, dɛɛ nyin nɛn, dɛ dɔ bambile ge. 3 Ŋɔ hanjeni ge be báa ɔmɛ Korowii dɛ gel ba we-ɛɛla do kaih, dɛ bɛ nɛra dɛɛ ŋwalɛ, dɛ bɛ gel sen lɛ ba liire. Báa bagle waa aa wera. 4 Dɛ ba dɛ ɛ gɛ naa, anee dɛ bagle han-yala báa nyin ba jaranar ne ba bii, 5 dɛ dɔ nfɛrɛ kɛrɛdɛ, wedoŋa bɛlbwa aa wola toole ba nɛ, dɛ won ba dem tomare ɛɛ, dɛɛ ɛ nɛra wedɛɛga, dɛɛ no ba jaranar wa, asɛ nomɛlbwa bɛ Korowii waa la wechɔge dɔ bol. 6 Ŋɔ bonɔɔna ge be ŋɔ bá dɔ nfɛrɛ wobɛlbwa ta. 7 Henee chɛ kɛ he gel he we-ɛɛla do wer wobɛlbwa ta ásɛ ba nyiŋi dɛɛ hweli. Dɛɛ bagle waa kasinteŋ ne, dɛɛ swɛɛ siwi a ta. 8 Gel a togre kɛrɛdɛ, nɛra bɛ a wobɛlbwa dɔ dɛ bol, asɛ he dɔma bɛ ya wechɔge bɛlbwa dɔ dɛ bol, asɛ sihiih kpo ba. 9 Gel nɛra baa lɔ bane nɔn ta kɛŋɔ bonɔɔna kɛɛ toli la no kɛŋɔ báa no ba dɔɔranar wa. Bá gel ba wa ɛɛ lɛ ba sie wobɛlbwa ta, dɛ bɛ waa begre dɛɛ do ba nyoa, 10 dɛ bɛ ba kwaa dɛɛ ŋwɛ. Kɛ bá gel ba we-ɛɛla dɔ yarada ba dɔɔranar be. Gɛɛ dɛɛ ba gela ya Lɛɛ Korowii waa nɔ yaa dɛ bagle nɔ che ba nɛɛ dɛ dɔ sɔn wobɛlbwa ta. 11 Suna Korowii aa dɛ sune nɛra nɛɛ leɔ taraken ásɛ nɛra bwa jemɛ, ó lɛɛ ba. 12 Anomanta gɛ dɛ bagle kɛŋɔ a wer kɛ ya laa sie kpɔ wechɔga bɛlbwa ne harɛ nɔ ta pɛlchɔga la bwa ta, dɛ dɔ nfɛrɛ, dɛɛ ɛ waa aa togra, dɛɛ ɔmɛ Korowii ya bere nɔ ta, 13 dɛɛ kpa gɛ saŋ Yeesu Kristo aa ba o jirima ne ya nao la. Onee Korowiijen ne ya Lɛɛ la. O bala taa ya dɔ hwɛga ne silɛɛ kɛrɛdɛ. 14 O koh ya waa dɛ sewɛ dɛ́ won lɛ yaa le wechɔga bɛlbwa ta, dɛ laa ya doŋa bwa kpɔ ya nɛ, dɛ kpɔ yaa ɛ o gbo nɛra yaa swɛɛ siwi wedɛɛga ɛɛ ta. 15 Bag ba gɛ waa nɔ bwa, dɛ kpɔ he kpegri do ba gbemba, dɛ ja ba, dɛ bɛ gel ba bɛlbwa nyiŋi he nyubaah.
