Taetos 1

1Men Pɔɔl maa ɛ Korowii bonɔɔ dɛ berɛ ɛ Yeesu Kristo torome la, men chwerɛ tɔn nɔ. Korowiirii lee mɛ dɛ ŋɔ mɛ́ɛ cha nɛra waa lee ba tɛ o te la, ásɛ ba yarada kaa sie ba won jemɛ o kasinteŋ la, dɛ che a ta tomɛ Korowii. 2Korowii mkpa aa wola jaga dɔe la hwɛgaa n dɔ. Korowii waa wola nyosone teŋe laanee bagɛ gɛ mkpa nɔ nyoa bil mɔɔ dɛ ta komɛlbwa. 3Tɔpere o tea aa toora la, o gelɔ mɛɛ bol a waa nɛra jemɛ. Ya Lɛɛ Korowiirii kpɔa do n nɔn ta dɛ ŋɔ mɛ́ɛ bagle nɛra. 4N bie Taetos, henee n chwerɛ tɔn nɔ dɛɛ tɛ. Waa ya bwa aa dɛ yarada la taa a che he ɛ n bie tenten. Ń Naa Korowii ne ya Lɛɛ Yeesu Kristo chae dɛ tɛɛ bosɔɔhna. 5N gele Kret ásɛ he tonɛ waa aa hiah kɛ he ɛ la bwa, dɛ cheg nomonome asɔrere aa lɔ bwɛɛre la bɛlbwa ta gɛ maa bagle la. 6He dɛ nyin he le asɔre nomoa aa, kpɔ onɔ la nomɛlbwa aa wola o wechɔge bɛlbwa dɔe dɛɛ bol, o dɔ hahbeŋkpoŋa, o bii gee yarada Yeesu, nɛra aa wola ba waa bol ŋɔ ba chɔgɔ dɛ ɛ deŋnekpeg tena, 7dɛkalkɛŋɔ, a chɛ kɛ nɛn waa dɛ tɔ asɔre tena sie la ɛ nɛndɛɛge nomɛlbwa aa wola o wechɔgee dɔ bol bwa, waa ɛ Korowii bonɔɔ nomanta. A chɛ kɛ o ɛ nɛn waa wola o te bagle, dɛ lɛ nɛn kon dɛɛ ja o kon ta, o baah naa wola di warawara, waa wola sennyɔdɛɛ ɛɛ, waa wola nagra nyin, o siwi aa wola suuga ta begre kohona. 8A chɛ kɛ o ɛ nɛn waa dɛ nyin hɔɔhra lɛɛ, dɛɛ nyin wedɛɛga, dɛ dɔ nfɛrɛ kɛrɛdɛ, o waa do kaih, wedoŋa bɛlbwa aa wola toole o nɛ, wɛɛ lawɛ o te kɛrɛdɛ. 9A chɛ kɛŋɔ wɛɛ teŋɛ Korowii kasinteŋ waa la ta gɛ ba faa baglo la, dɛ won dɛɛ bagle Korowii waa a ŋwɛnɛ ta nɛra be, asɛ dɛ won dɛɛ ja ba, dɛ bol waa dɛɛ bagle banɔ la baa dɛ tɔŋle kasinteŋ waa la ásɛ ba ge jemɛ. 10Deŋnekpeg tena lole taraken taeh, dɛ kpɔ wepuu dɛɛ negre nɛra. Juda tena baa lɔ he bini dɛɛ maŋkura penteŋ laanee dena dɛɛ ɛ gɛ kohona. 11A chɛ kɛ he kah ba ba tɔ nyoa. Ba dɛ chɔg dembir nɛra liire ba yon vɛh kasinteŋ waa la ta teŋa. Ba koh suuga waa dɛɛ chagle waa aa wola chɛɛ. 12Kret tena la bɛl baa dɛ liiru kɛŋɔ o jemɛ wobol kɛrɛdɛ fa bolɔ ŋɔ, "Ya Kret tena bwa ɛ nyosonteŋna, ya we-ɛɛla do kɛŋɔ kpɔg bini ola ken. Ya ɛ bɔhwaahra dɛɛ di kwaa kohona." 13Kpelaa o bol, anomanta di ba kasinteŋkpeg ba jemɛ, asɛ dɛ gel gɛ da la, dɛ baa teŋɛ Korowii waa aa ɛ kasinteŋ la ta. 14Ŋɔ ba bɛ deŋne cheg dɛɛ no Juda tena waa aa ɛ nyosone la, ne waa nɛra baa vɛh kasinteŋ waa la aa ŋɔa báa ɛ la. 15He tea too waa, komɛlbwa wer tɛɛ, haa an kondoŋa lii. Kɛ nɛra wechɔga aa lɔ ba nɛɛ baa wola yarada la, komɛlbwa ɛ kondoŋ tɛɛ ba. Ba liire ne ba bambile bwa doŋo. 16Ba ŋɔ ba jemɛ Korowii, kɛ ba we-ɛɛla dɛ bagle kɛŋɔ baa Korowii jemɛ. Ba we-ɛɛla doŋo Korowii be kohona, ba deŋne ge kpegri. Baa won ɛ wedɛɛge bɛlbwa bwa.

will be added

X\