Room 9

1Kasinteŋii mɛɛ ba bola la. Maa ɛ Yeesu Kristo nɛn la nomanta, maa nyosone teŋe. Korowii Domadɛɛge la gelɔ n jemɛ n bambile bini kɛŋɔ maa nyosone teŋe. 2N tea bini chɔgɔ, n bambile ge aa n wee gel bwa. 3N gbagba bwɛɛ tena baa ɛ n nɛraa gela n bambile bwa wee mɛ gɛ nɔ. Dɛ Korowii taah mɛ asɛ n ne Yeesu Kristo baah pere kwaraa ásɛ o lɛɛ ba aa, n dɛ nyin gɛ. 4Israel tena maa dɛ bol ba waa nɔ, Korowii ɛ ya o bii dɛ bagle yaa o jirima. O ne ya fɔwɛ fɔo, asɛ o tɛ yaa o mmara, dɛ bagle yaa gɛ aa chɛ kɛ yaa tomɔ, dɛ bagɛ yaa nyoa bele aŋwɛnɛ bwa. 5Ya nabaala la nɛra bwa aa jemɛ ba waa la naanaree yan. Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa la, o nɛwɛnyini ɛɛ be pera la, ya dwee on. Korowiirii dɛɛ nyiŋi nɛwɛnyini bwa nɛɛ saŋ bɛlbwa. Onee chɛ jam. Aamen. 6N ta ŋɔe ŋɔ Korowii vɛh o nyobaga la ta teŋa, kɛ Israel tena bwa laa Korowii le kɛ o nɛra. 7Abraham naanar bwa ge laa Korowii bii. Korowii aa ŋɔ Abraham be ŋɔ, "Aesek luge taa hɛɛ ba he naanar maa bagɛ nyoa dɔe" la, 8a baglɔ kɛŋɔ Abraham dwee la te bwa waa lol ba gɛ nɛra bwa aa dɛ lolɛ la, Korowii nɛra laa ban. Abraham bie la Korowii aa bagɔ nyoa la, o dweee Korowii jemɛ kɛŋɔ Abraham naanaree ban, 9dɛkalkɛŋɔ Korowii aa bagɛ Abraham nyoa la, waa waa bola laanee kɛŋɔ, "Benanyoa saŋ nɔ mɛɛ berɔɔ ba. N ne bala dɛ Saara lolɛ bibaa." 10Anɔ gbo laa. Rebɛɛka aa kpoŋe o kpara la tea la, ba bwa mɛɛ ɛ beŋkpoŋ. Ya nabaa Aesekee ba mɛɛ. 11Baa wola ban lolɛ mɔɔ, a ɛ kɛŋɔ ba ɛ wechɔga kɛɛ wedɛɛga la, dɛ Korowii dɔɔ ŋɔ ba nya be ŋɔ, "Bii nɔ, bechala la ɛɛ lɛ nomonome o dɔɔ bee asɛ o dɔɔ la berɛ dɛɛ tomɔ." A gɛ waa nɔ baglɔ kɛŋɔ lee Korowii aa le Jekɔb la, o tetooraa o leo. Jekɔb we-ɛɛla laa o nyiŋi dɛ leo. 13Anee Korowii Tɔn la bagle ŋɔ, "N nyin Jekɔb dɛ hah Esɔ" la. 14Amɔ yaa wonoo ŋɔ Korowii waa ta togrɛ kɛɛ? O waa togrɔ. 15O ŋɔ Mosis be ŋɔ, "Naate n tea aa toora kɛŋɔ ń sune o nɛɛ la, mɛɛ sune o nɛɛ. Naate n tea aa toora kɛŋɔ ń tea domɛ o nɛɛ la, n tea ɛɛ domɛ o nɛɛ." 16Waa nɛwɛnyini aa dɛ nyin ne anɔ la yaa dɛ ɛ la, Korowii te aa an nyiŋi. O te suna waa sune nɛwɛnyini nɛɛ la, anee wɛɛ nyiŋi. 17Ba chwerɛ Korowii Tɔn bini gɛ Korowii faa ŋɔ Ijipt kooro be la. Anee kɛŋɔ, "N gelɔ he ɛ kooro ásɛ nɛwɛnyini bwa che he nɛɛ dɛ na gɛ maa dɔ kpegri, asɛ dɛ yerɛ n sɔn harɛ ta bobɛlbwa." 18Naate Korowii tea aa toora kɛŋɔ ó sune o nɛɛ la, o nɛɛ wɛɛ sune. Naate ge o tea aa toora kɛŋɔ ó gel o deŋne do kpegri la, onee o gel o deŋne ɛɛ do kpegri. 19Nomɛl ɛɛ ŋɔɔ, "Dɛ kenii a do aa, Korowii ɛɛ wonoo ŋɔ nomɛl deŋne kpegri nomanta o ɛ wechɔga aa? Dɛkalkɛŋɔ Korowii dawɛ waa ŋɔ á ɛ gɛ naa, a chɛ kɛ a ɛ gɛ." 20Dɛ henee ume kɛŋɔ Korowii bol waa he chaŋe bɛl ɔ? Vii gee wonoo bɔɔ mamaa wee la aa bala o mao gɛ waa mao waa? 21Naate waa dɛ ma la, o ta ŋwɛnɛ dɔe kɛ o kpɔ choh waa dɛ ma a ne la ma kwaa aa too o tea aa? A too o tea aa, wɛɛ kpɔ a gɛ choh laanee ma viine anɛ, dɛ kpɔ bɛl dɛɛ ɛ kwaa tɔpejena gbo, dɛ kpɔ bɛl ge dɛɛ ɛ kwaa tɔpere bɛlbwa. 22Gɛɛ a do Korowii be. Nɛwɛnyini ɛ o viine waa maa. Bane chɛ chɔga. O ma bane ge ásɛ ba ba na som o be. Dɛ o fe dɛ nyin o bagle o bandia nɛra baa chɛ chɔga la nɛɛ dɛ́ gel nɛra na o kpegri, kɛ o lawɛ bambile, 23ásɛ nɛra waa sune ba nɛɛ dɛ cheg ba kɛŋɔ bá ba na som la won jemɛ gɛ o som la aa doa dɛ dɔ jirima kohona. 24Yanee o sune ya nɛɛ la. Yanee o le ŋɔ ya ɛ o nɛra la. Israel tena gbo bini laa o le nɛra ŋɔ ba ɛ o nɛra nɔ. O le bane nɛra baa wola Israel tena ɛɛ ge bini. 25Kenii o ŋɔ o keame Hosia tɔn bini: "Nɛra ba faa wola n nɛra ɛɛ n faa wola ban nyin la, mɛɛ yer baa n nɛra ne n nɛnnyina." 26Ba chwerɛ tɔn la bobɛl ge ŋɔ, "Nɛra Korowii faa ŋɔ ba be ŋɔ, 'N nɛra laa heyaa' la, banee ba berɛ dɛɛ ba Korowiijen bii yera." 27Aesaya bol Israel tena waa ŋɔ: "Dɛ Israel tena warɔ kɛŋɔ mpo nyoa hɛŋle kwaraa naa, ba bini tamaa kenii Korowii ɛɛ ba lɛɛ. 28Wɛɛ bol nɛwɛnyini bwa waa wɔrɔbe nɛɛ dɛ pa bole." 29Anee Aesaya fa bol la, "Dɛ Nemenɛ Korowii fe ta o nɛra dwee tama bane gelaa, ya fe ɛɛ tonɔɔ kwaraa kɛŋɔ Sodom ne Gomoora tena." 30Ɛrɛɛ yaa ba ŋɔe yɔ? Nɛra baa wola Israel tena ɛɛ la, ba siwi aa wola swɛɛrɛ kɛŋɔ Korowii lɛɛ ba kɛ nɛndɛɛga ba waa su o siwi la, ba yarada nomanta, Korowii siwi su ba. 31Kɛ Israel tena te aa swɛɛ siwi dɛ kpɔ ba sie do Mmara ta teŋa ta, dɛ ŋɔ an dɛ gel Korowii lɛɛ ba kɛ nɛndɛɛga ba waa su o siwi la, o siwi ta ba te kwaraa sui. 32Aah dɛ bɔkwaa gela a ba gɛ nɔ? Baa wola sie kpɔe dawɛ Korowii yaradae ta, dɛ kpɔ sie dawɛ ba we-ɛɛla ta kɛŋɔ an dɛ gel Korowii siwi su ba la, a waa. Anomanta ba lɔ naa Bwe nɛra aa lɔ naa o ta dɛɛ chole la ta. 33O waa ba chwerɛ Korowii Tɔn bini la. Ba chwerɔ ŋɔ, "Mɛɛ kpɔ Bwee cheg Saayɔn, asɛ nɛra ɛɛ lɔ naa o ta dɛɛ chogli. Kɛ nomɛlbwa waa yaradao la, sihiih aa o kpoe ba."

will be added

X\