Room 8

1Taraken nɔ nɛra ba ne Yeesu Kristo aa pɛa la te aa bolchɔge dii ba ba tɛr ba deŋne. 2Maa dɛ ŋɔ nɔ, Korowii Domadɛɛge lɔga maa lole dɛ dɔ mkpa nɔ taa Yeesu Kristo che dɛ lɛɛ mɛ le wechɔga ne seo lɔga n faa lole la ta. 3Nɛwɛnyini mar aa do gɛ, waa wola kpege dɛɛ tɔ Mmara ŋwɛnɛ, asɛ Mmara lɛ nɛwɛnyini kahonɛ la, Korowii te wono lɛ nɛwɛnyini. O gelɔ o Bie tenten kpɔ nɛwɛnyini mar wechɔga aa suu nɔ dɔŋ dɛ ba chɔg liichɔga kpegri o faa dɔa nɛwɛnyini nɛɛ la dɛ laa wechɔga kpɔ, 4ásɛ ya waa do sweih kɛŋɔ Mmara la aa bagla ŋɔ yá do la. Yaa nɛwɛnyini mar liichɔga aa suu nɔ waa ta teŋɛ, Korowii Domadɛɛge waa taa yaa teŋɛ. 5Nɛra baa dɛ teŋɛ nɛwɛnyini mar liichɔga aa suu nɔ tetoowaa ta la, a taa ba ge liire do. Nɛra ba ge aa dɛ teŋɛ Korowii Domadɛɛge waa ta la, a taa ba liire do. 6He kpɔ liire do nɛwɛnyini mar nɔ liichɔga waa ta naa, he ne sewee. Kɛ he kpɔ liire do Korowii Domadɛɛge tetoowaa ta naa, he dɔ mkpa dɛ dɔ deŋnesɔɔhna. 7Nomɛlbwa waa kpɔ o liire do bwadabii waa ta dɛ gwaa wobɛlbwa la, o som laa Korowii, waa Korowii mmara ta teŋɛ. Waa won teŋɛ Korowii mmara ta ge bwa. 8Nɛra baa kpɔ ba liire do nɛwɛnyini mar wechɔga aa suu nɔ dɛ gwaa wobɛlbwa la, ba waa aa won too Korowii tea bwa. 9He te la, he ta he nɛwɛnyini mar nɔ wechɔga aa suu nɔ som kpɔe gwaa wobɛlbwa. Dɛ Korowii Domadɛɛge lɔ he nɛ aa, gɛ waa dɛ bagle heyaa laanee hɛɛ ba dɛɛ ɛ. Nomɛlbwa waa wola Domadɛɛge Yeesu Kristo aa dɛ tɛ la dɔe la, dɛ Yeesu nɛn laa on. 10Dɛ Yeesu Kristo Domadɛɛge la lɔ he nɛ aa, wechɔga nomanta he bwadabii ɛɛ sewɔɔ te. Kɛ Korowii aa lɛ heyaa kɛ nɛndɛɛga he waa su o siwi nomanta, he lileore ɛɛ dɔ mkpaa. 11Korowii waa ir Yeesu seo ta la, dɛ o Domadɛɛge lɔ he nɛ aa, gɛ Korowii aa iru seo ta la, wɛɛ che o Domadɛɛge la taa dɛ tɛ he bwadabii aa dɛ ba pɔeh kerekere nɔ mkpa. 12Anomanta yabalawa, waa dawɛ ya nɛ, ya di kem, kɛ ya nɛwɛnyini mar nɔ wechɔga aa suu nɔ kem laa ya di á ɛ kɛŋɔ yaa teŋɛ o nɛ, 13dɛkalkɛŋɔ dɛ nɛn teŋɛ nɛwɛnyini mar wechɔga aa suu nɔ pɛla waa ta naa, waa mkpa dɔe ba. Kɛ dɛ nɛn chegɛ Korowii Domadɛɛge la nɛɛ dɛ vɛh o bwadabii pɛla wobɛlbwa naa, wɛɛ dɔ mkpaa. 14Nɛra baa kpɔ ba te tɛ Korowii Domadɛɛge wɛɛ bag ba ŋwɛnɛ la, Korowii biirii ban. 15Korowii Domadɛɛge la waa kpɔa tɛ heyaa la, o ta gelɛ he ne Korowii baah do kɛŋɔ nɛn ne o yom asɛ hɛɛ ɔmɔ. O gelɔ he ɛ Korowii bii. O alaworomɛ ya won wii dɛ yerɛ Korowii "n Mɛɛ," kɛŋɔ bie aa dɛ yerɛ o mɛɛ gɛ la. 16Korowii Domadɛɛge yon gel ya jemɛ ya bambile bini kɛŋɔ Korowii biirii yaa. 17Yaa ɛ Korowii bii nomanta, dɛ ya sɛoh dɛ na wahala Yeesu Kristo aa naa la aa, ya gee di o kapɛrɛɛ kɛŋɔ Yeesu Kristo aa dɛ di la, asɛ Korowii kpɛɛ yaa gɛ waa kpɛɛ Yeesu Kristo la. 18Wahala nɔ yaa dɛ na taraken nɔ, he nyiŋi som yaa dɛ ba nae kerekere la aa, a ta wahala ɛɛ kwaraa. 19Korowii kontaala bwa siwi swɛɛrɔ aa kpa tɔɔ la wee Korowii aa bagle nɛra baa ɛ o bii la. 20A dɛ yo dɛ yo kaahonɛ, dɛkalkɛŋɔ a ta a te dɔe. Korowiirii taa o tetoora ta kɛŋɔ a bɛ kpegri dɔ. Kɛ a dɛ hwɛgɛ 21kɛŋɔ tɔpebɛl Korowii ɛɛ geloo a foo dɛ le kpegri bɛ dɔe nɔ ta, aa wola pɔh kpa, dɛ ja Korowii bii nɛɛ dɛ ge na som kɛŋɔ baa foora la. 22Ya jemɔ kɛŋɔ ba le fini, Korowii kontaala bwa bwara dɛ nyɛg, aa pɛmɛ kɛŋɔ lol tea lɔ haah o yon dɛɛ pɛmɛ la. 23Maa dɛ ŋɔ nɔ, Korowii kontaala gbo bwara laa dɛɛ nyɛg. Ya nɛra yaa dɔ Korowii Domadɛɛge kɛŋɔ kwaa Korowii aa ba tɛ yaa la bini konlogle la, ya gba bwara dɛ nyɛg. Ya dɛ nyiŋi Korowii ŋwɛnɛ kɛŋɔ wɛɛ ba ɛ yaa o biirii, dɛ lɛ ya bwadabii wechɔga ne seo nɔn ta. 24Korowii aa lɛ yaa la, dɛ gɛ hwɛga nɔɔ ya dɔ. Kon nɛn aa dɔa la, waa berɛ dɛɛ hwɛgɛ o waa kɛŋɔ wɛɛ dɔɔ kpa, dɛkalkɛŋɔ kon waa wola nɛn nɔn ta joɛ la, o waa baa hwɛgɛ. 25Ya te la, kon waa wola ya nɔn ta joɛ mɔɔ la, o waa yaa hwɛgɛ. Yaa too. 26Gɛ ya hwɛga yaa dɔa la aa lawɛ yaa ya wahala bwa bini la, gɛɛ Korowii Domadɛɛge gee cha yaa, dɛkalkɛŋɔ ya yarada aa kanɛ. Yaa jemɛ gɛ aa chɛ kɛ yaa soŋe Korowii kwara. Korowii Domadɛɛge soŋo dɛɛ tɛ yaa mmɔbɔrɔ ne nɛn aa wola won bagle kwara. 27Korowii te jemɛ nɛn bambile bini waa bwa, dɛ jemɛ o Domadɛɛge la nyu bini, dɛkalkɛŋɔ gɛ Korowii aa dɛ nyin la, gɛɛ o Domadɛɛge la soŋo dɛɛ tɛ o nɛra. 28Ya jemɔ kɛŋɔ nɛra baa dɛ nyin Korowii la, wobɛlbwa aa puu ba la, o gelɔ a ɛ wedɛɛga dɛɛ tɛɛ ba. O tetooraa o lee ba ba ɛ o bii. 29Nɛra Korowii aa jemɛ ba waa cheg wubwa la, waa wola ban tae mɔɔ la, dɛ o tɔ sie lee ba ŋɔ bá ba do kɛŋɔ o Bie la ken, ásɛ ba bwa ɛ o Bie la nimanar, asɛ o ge ɛ ba Dɔɔ. 30Anomanta nɛra Korowii aa tɔ sie lee ba gɛ la, o lee ba ŋɔ bá ɛ o toma. Waa lee ba ŋɔ bá ɛ o toma la, o lɛɛ ba kɛ nɛndɛɛga ba waa su o siwi, asɛ o tɛɛ ba ŋwɛnɛ kɛŋɔ ba ba so o jwɛh dɛ dɔ jirima. 31Ya ta sie nyiŋi anɔ bwa na naa, ɛrɛɛ yaa ba ŋɔe yɔ? Dɛ Korowii teŋɛ ya nɛ aa, umee dɛ won ɛ yaa waane ɔ? 32Nɛn waa wola yaa o Bie kwaraa vɔmɛ, dɛ koh ya bwa waa kpɔɔ do nɛwɛnyini nɔn ta ba kpoo la, bɔkwaa bala waa wola tea ta dɛ tɛ yaa komɛlbwa dɛ ja o Bie la nɛɔ? 33Umee dɛ won na Korowii bii waa lee ba nɔ bwara wechɔge bɛl dɛ bolɔ? Korowii kwara waa dɛ pa bole la, o ŋɔ ba waa wer dɛɛ su o siwi. 34Aah dɛ umee dɛ won pa ba bolchɔge ɔ? Yeesu Kristo kɛɛ? Sewaa o te koh ya waa sewɛ, kɛ a gbo laa. O berɔ ir seo ta dɛ ka so nomombɔr Korowii dig ta, dɛ soŋo dɛɛ tɛ yaa. 35Bɔkwaa dɛ won pere ya ne Yeesu Kristo baah waa wola yaa nyina ba kpaɔ? Noe aa dɛ no yaa kɛɛ wahala yaa dɛ na, kɛɛ chega nɛra aa chegɛ ya nɛ, kɛɛ lɔr, kɛɛ nyaa, kɛɛ dɛ ya chegɛ seo nyoao, kɛɛ sewɔ? 36Gɛ Korowii Tɔn aa dɛ bagle la, "He nomanta ya chegɛ seo nyoa saŋ bɛlbwa. Saŋ bɛlbwaa baa ɛ yaa kɛŋɔ peera baa dɛ la ka kpoa la ken." 37Anɔ bwa sekwaraa ta la, ya jemɔ kɛŋɔ yaa yoo le. Yeesu Kristo waa nyin yaa la nɛɛ yaa ba chega dɛ le. 38N jemɔ kɛŋɔ wobɛlbwa toole dɛ tɔ yaa ŋwɛnɛ waa wola ya waa nyina ba. Seo kɛɛ mkpa aa won tɔ yaa ŋwɛnɛ. Nyundua toroma kɛɛ Bɔnsam toroma aa bea yaa wola an na aa won tɔ yaa ŋwɛnɛ. Waa aa dɛ ɛ fini nɔ kɛɛ anɔ la aa dɛ ba ɛɛ kerekere ge aa won tɔ yaa ŋwɛnɛ. Kwaa aa dɔ kpegri bɛlbwa sese ge aa won tɔ yaa ŋwɛnɛ. 39Komɛlbwa toole dɛ do nyundua kɛɛ harɛ bobɛlbwa dɛ won tɔ yaa ŋwɛnɛ. Korowii kontaala bini komɛlbwa toole dɛ won pere yaa le Korowii nyina aa chegɛ ya Dɔɔ Yeesu Kristo nɛɛ wɛɛ nyin yaa la ta.

will be added

X\