Room 7

1Yabalawa, he jemɛ mmara wa, anomanta he jemɔ kɛ harɛ ta gboo mmara dɔ kpegri nɛra nɛ. 2Haah waa yala la, dɛ o jaa ta sewaa, hahmor mmara vɔrɔwo, o ɛ o jaa la gbo haah. O jaa sewɔ te naa, dɛ hahmor mmara ta on vɔrɔwɛ kpa. 3Kɛ dɛ o jaa ta soge le, asɛ o ne banfale ge berɛ do le ja aa, baa yerɔ hanjwamanee. Dɛ o jaa sewɔ te naa, dɛ hahmor mmara ta on vɔrɔwe kpa. O yalɛ banfale aa, dɛ o ta jwamane bɔe. 4Yabalawa, Yeesu Kristo seo waa sewa la, a ɛo kɛŋɔ he ne onee pɛa sewɛ. Anomanta he toole Mmara lɔga. Mmara la aa kpegri di he nɛɛ kpa kɛŋɔ haah jaa sewaa, waa wola toole hahmor mmara lɔga kpa la. He berɔ ɛ Yeesu Kristo waa ir seo ta la nɛra, asɛ dɛ won ɛ Korowii toma, he waa dɔ tɔnɔ o be. 5Saŋ la yaa lɔ wechɔga ya nɛwɛnyini mar nɔ wechɔga aa suu nɔ aa dɛ nyin la ta dɛɛ ɛ la, dɛ Mmara la dɛ ir ya bambile wechɔga ɛɛ ta, asɛ wobɛlbwa yaa dɛ ɛ la, aa kaa ya ne seo ta. 6Taraken te ya fooro, Mmara la ta yaa dɔe kpa, dɛkalkɛŋɔ ya ne a gɛ Mmara nɔ o faa kpɔ yaa berɛ yoma la toole wobɛlbwa bini kpa. Ya ɛo kɛ yaa serewa. Yaa Mmara ŋwɛnɛ ta kpɔe dɛɛ tomɛ Korowii kpa. Korowii Domadɛɛge laanee dɛɛ bagle yaa ŋwɛnɛfale yaa tomɛ Korowii taraken. 7Aa do gɛ nɔ, dɛ Mmara la aa were kɛɛ? O wer, kɛ on gela n jemɛ kɛŋɔ komɛl lole baa yerɔ wechɔga. Dɛ Mmara la fe ta ŋɔe ŋɔ nɛwɛnyini bɛ gel o sie begre o dɔŋ kon aa, n fe aa jemɛ kɛŋɔ sibegra aa were. 8Liichɔga nao kɛŋɔ aa wonoo che mmara Korowii aa doa la ta dɛ gel n ɛ wechɔga. Liichɔga aa na gɛ la, a chegɛ mmara la ta dɛ gel n sie ɛɛ begre komɛlbwa ta. Dɛ mmara toole naa, wechɔga ta kpegri dɔe. 9Mmara aa wola toole la, dɛ wobɛlbwa toole n baŋa n so. Kɛ mmara aa bala la, belaa liichɔga ge ir, asɛ n na kɛŋɔ n sewɔ. 10Mmara o fe aa chɛ kɛ o ba mkpa ne la, seo nee o ba. 11Liichɔga nao kɛŋɔ a dɔ bɔr name. Mmara taa a che dɛ neg mɛ, dɛ tag mɛ do seo ta. 12Ya jemɔ kɛŋɔ Mmara la ɛ kondɛɛge, asɛ o bini wobɛlbwa ge togre dɛ do wer. 13Aah dɛ kon waa wera nɔ, o taa a berɛ che mɛɛ ba seo dɔe yaa? O ta laa. Liichɔgaa chegɛ kon waa wera ta dɛ gel n dɔ seo, dɛ bagle o dor ásɛ n jemɔ kɛrɛdɛ. Mmara la taa a che asɛ ya jemɛ kɛŋɔ liichɔga doŋo, aa wola were kwaraa. 14Ya jemɔ kɛŋɔ Korowii Domadɛɛge bee Mmara la le dɛ do wer. Kɛ n te, nɛwɛnyinii men, anomanta wechɔga yag mɛ. 15Waa maa dɛ ɛ kwaraa la nɔ, n ta wone jemɛ wee la aa gela mɛɛ ɛa, dɛkalkɛŋɔ maa waa n fe aa dɛ nyin ɛɛ la ɛ. Waa maa wola nyin laanee mɛɛ ɛ. 16Maa wola waa maa dɛ ɛ nyin dɛ gee ɛa la nɔ, a baglɔ kɛŋɔ n sɛoh kɛŋɔ Mmara la wer. 17Anomanta la nɔ, n gbagba laa dɛɛ ɛ a gɛ wechɔga nɔ. Liichɔga aa lɔ n bini la, an gela mɛɛ ɛa. 18N jemɔ kɛŋɔ liidɛɛga bɛlbwa toole n bini. N nɛwɛnyini mar nɔ wechɔga aa suu nɔɔ n ŋɔ nɔ. Maa dɛ ŋɔ nɔ, n dɛ nyin wedɛɛga ɛɛ, kɛ maa won an ɛ. 19Wedɛɛga maa dɛ nyin ɛɛ la, a laa mɛɛ ɛ. Wechɔga maa wola a ɛɛ nyin la, anee mɛɛ ɛ. 20Dɛ waa maa wola ɛɛ nyin la, dɛ anee mɛɛ ɛ aa, a baglɔ kɛŋɔ n gbagba laa dɛɛ ɛa kpa, dɛ liichɔga aa lɔ n bini laanee dɛɛ ɛa. 21Waa maa naa laanee kɛŋɔ n dɛ nyin wedɛɛga ɛɛ yaa, dɛ komɛl ŋɔ n bɛ ɛ. 22N bambile fe lawɛ Korowii mmara la ta teŋa, 23kɛ n bwadabii ge berɔ do dor bɛl. O dɛ vuugi n bambile. N bwadabii aa Korowii mmara la aa lɔ n bambile bini la ta teŋa nyin. Liichɔgaa gela n bwadabii aa wola Korowii mmara la ta teŋa nyin nɔ. A gɛ liire nɔ yag mɛ yom. 24Akwe! Bɔkwa waa na mɛ kenɔ? Umee dɛ lɛɛ mɛ bwadabii nɔ waa dɛ kaa n ne seo ta nɔ nɔn ta nɔ? 25Korowii jam. Ya Dɔɔ Yeesu Kristo alaworomɛ, Korowiirii dɛ lɛɛ mɛ. Anomanta n bambile bini te, Korowii mmara taa mɛɛ teŋɛ. Kɛ n nɛwɛnyini mar wechɔga aa suu nɔ be pera te, wechɔga taa mɛɛ teŋɛ.

will be added

X\