Room 5

1Taraken nɔ, ya yarada aa gela Korowii lɛ yaa kɛ nɛndɛɛga ya waa su o siwi nɔ, ya Dɔɔ Yeesu Kristo nɛɛ a che asɛ ya ne Korowii pɛ. 2Yaa yarada Yeesu dɛ kpɔ ya te tɛo la, a taa a che o gel Korowii ɛɛ na ya sum dɛɛ cha yaa gɛ waa dɛ cha yaa nɔ. Anomanta ya sie lɛo, dɛkalkɛŋɔ ya jemɔ kɛŋɔ bela Korowii aa lole o waa dɔ jirima kohona la, ya gee do belaa. 3A gbo ta laa ya dɔ silɛɛ. Ya sie dɛ lɛ ya wahala yaa dɛ na nɔ ta, dɛkalkɛŋɔ ya jemɔ kɛŋɔ anee dɛɛ ba gela ya dɔ bambile. 4Bambile dɔe nɔ taa aa ba chega asɛ dɛ Korowii daah yaa na naa, ya waa won dɔ kasinteŋ. Ya waa dɔ kasinteŋ Korowii be naa, an dɛɛ ba gela ya dɔ hwɛga. 5Hwɛga yaa dɔa nɔ, aa pɛɛ ɛ, dɛkalkɛŋɔ Korowii tɛ yaa o Domadɛɛge la ásɛ ya jemɛ o nyina waa dɛ nyin yaa kohona. 6Maa dɛ ŋɔ nɔ, ya fa toole ane bɛlbwa bini Korowii ŋwɛnɛdɛɛge la be pera. Dɛ ya faa Korowii ŋwɛnɛ ta teŋɛ. Kɛ tɔpere Korowii aa doa la aa tela la, Yeesu lɛ ya wechɔg-ɛɛra seo dɛ sewɛ. 7A kpegri kɛŋɔ nɛn lɛ nɛndɛɛge kwaraa seo dɛ sewɛ. Nɛn waa dɛ nyin nɛn la te, bɛl lole nomɛl ken ɛɛ wonoo lɔ bambile lɛ o seo dɛ sewɛ. 8Maa dɛ ŋɔ nɔ, hé na gɛ Korowii tea aa dɛ domɛ nɛwɛnyini nɛ. Gɛ saŋ ya taa ɛ wechɔg-ɛɛra la, a taa Yeesu Kristo lɛ ya seo dɛ sewɛ. 9Yeesu Kristo seo taa a che asɛ Korowii gel ya ɛ nɛndɛɛga ya waa su o siwi. Aah dɛ Korowii bwaawee baa ir nɛra nɛ aa, a te taa Yeesu Kristo aa wola won lɛ yaa aa? 10Dɛ ya ne Korowii fa dɔmɔ, asɛ o che o Bie Yeesu seo la ta dɛ gel ya ne o pɛ aa, ya ne Korowii aa pɛa taraken nɔ, a te ta kwaraa laa wɛɛ ba o Bie Yeesu seo ta ira ne o le doe nɔ waa koeh dɛ lɛ yaa aa? 11A gbo laa. Ya sie lɛ Korowii nɛɛ kohona ya Dɔɔ Yeesu Kristo nomanta. O nɛɛ a che ya ne Korowii pɛ. 12Nɛmbeŋkpoŋ nɛɛ a che wechɔga ba harɛ nɔ ta, asɛ a che o wechɔga ta seo ba harɛ ta. A waa seo bu nɛwɛnyini bwa la, dɛkalkɛŋɔ nɛwɛnyini bwa ɛ wechɔga. 13Korowii aa wola Mosis Mmara la ne balɛ mɔɔ la, dɛ wechɔga lole. Kɛ bela mmara aa wola toole la, baa wechɔga nkontaah bu. 14Kɛ le Adam bere saŋ la ba le Mosis bere saŋ la, dɛ seo chɔ le tɛ nomɛlbwa. Hale nɛra ba faa wola Korowii nyoa vɛɛh kɛ Adam la bwaa fa dɛ serewe. Adam chaaree naate ba faa ŋɔa o dɛ ba bala la. Onee Yeesu Kristo. 15Kɛ Adam ne Yeesu waa ta beŋkpoŋ ɛɛ, dɛkalkɛŋɔ chae Korowii aa na ya sum dɛ cha yaa la, a ne Adam wechɔga ta beŋkpoŋ ɛɛ. A gwaala kohona. Nɛmbeŋkpoŋ wechɔga taa a che seo ba nomɛlbwa nɛ. Nɛmbeŋkpoŋ alaworomɛ gee nɛra bwa di. Onee Yeesu Kristo. O nɛɛ Korowii che dɛ sune nomɛlbwa nɛ, dɛ cha yaa kohona a gwaa Adam wechɔga la. 16A berɔ do kɛŋɔ chae Korowii aa cha yaa la ne waa aa le nɛmbeŋkpoŋ la wechɔga ta la ta beŋkpoŋ ɛɛ. Wechɔge beŋkpoŋ taa a che Korowii pa ya bwa bolchɔge. Asɛ wechɔga aa wara la, Korowii na ya bwa sum dɛ cha yaa dɛ lɛ yaa kɛŋɔ nɛndɛɛga ya waa su o siwi. 17Nɛmbeŋkpoŋ wechɔga taa seo che dɛɛ di kora nɛwɛnyina nɛ. Gɛɛ a che nɛmbeŋkpoŋ nɛɛ asɛ Korowii na nɛwɛnyina sum kohona kwaraa dɛ cha yaa ya won ɛ nɛndɛɛga ya waa su o siwi pɛɛpɛɛ dɛ di kora mkpa aa wola jaga dɔe la ta. Onee Yeesu Kristo. 18Gɛ Adam wechɔge beŋkpoŋ aa lɛ chɔgre tɛ nɛwɛnyini bwa la, gɛɛ Yeesu Kristo wedɛɛge beŋkpoŋ waa ɛa gel Korowii lɛ yaa kɛŋɔ nɛndɛɛga ya waa su o siwi, asɛ nɛwɛnyini bwa won dɔ mkpa aa wola jaga dɔe bwa. 19Dɛkalkɛŋɔ gɛ nɛmbeŋkpoŋ deŋnekpeg aa gela nɛra bwa ɛ wechɔg-ɛɛra la, gɛɛ a che nɛmbeŋkpoŋ pwɛre waa doa ta asɛ Korowii lɛ nɛra kɛrɛdɛ kɛ nɛndɛɛga ba waa su o siwi. 20Mmara balɔ dɛ́ gel wechɔga warɛ. Kɛ, wechɔga aa dɛ dawɛ la, a taa Korowii na nɛwɛnyini sum dɛ cha yaa kohona. 21Gɛ wechɔga aa chegɛ seo nɛɛ dɛɛ di kpegri la, gɛɛ Korowii suna waa dɛ sune nɛwɛnyini nɛɛ la ge che gɛ Korowii aa ɛ yaa nɛndɛɛga ya waa su o siwi la ta dɛɛ di kpegri, asɛ ya won dɔ Korowii mkpa aa wola jaga dɔe bwa la, dɛkalkɛŋɔ ya Dɔɔ Yeesu Kristo gelɔ nɛra ɛ nɛndɛɛga ba waa su Korowii siwi.

will be added

X\